Mattha 23 - Tha Fower Gospels ïn Ulstèr-Scots 2021

Seiven waes

¹ Then Jesus saed tae tha croods an tae hïs follaers,

² “Tha maistèrs o tha Laa an tha Pharisees sïts ïn Moses' sait.

³ Sae ye maun obey thaim an dae iveriethin the' tell ye. But dïnnae dae tha same as thaim, fer the' dïnnae prectis whut the' praich.

⁴ The' tye up heavie burdens ower-wechtie tae cairt, an the' pit thaim on fowks' shoodèrs, but they thairsels ir no wullin tae lïft a fïng'r tae halp thaim.

⁵ Iveriethin the' dae ïs daen fer men tae see: the' mak thair phylacteries extrae wide an tha taussels on thair clokes extrae lang;

⁶ the' love tae be at tha tap table at faists, an tae hae tha best saits ïn tha Meetin Hooses;

⁷ the' laik men tae touch thair keps tae thaim ïn tha mairket places, an tae caa thaim ‘Rabbi’.

⁸ But yous ir tae let naebodie caa you ‘Rabbi,’ fer yis hae onlie tha yin Maistèr an yis ir aa brithers.

⁹ An dïnnae caa oniebodie on irth ‘Faither,’ fer yis hae onlie tha yin Faither, an he ïs ïn heiven.

¹⁰ Nether let oniebodie caa ye ‘Leader’, fer yis hae onlie tha yin Leader, an that's Christ.

¹¹ Tha maist impoartin amang ye maun be yer sarvint.

¹² Fer whaiver sets hissel up wull be brocht doon a peg, an whaiver hummles hissel wull be hel ïn heich regaird.

¹³ Wae faa ye, maistèrs o tha Laa an Pharisees, ye hippycrates! Fer ye shut tha dure o tha Kïngdom o Heiven ïn fowks' faces. You yersels dïnnae enter, an yis'll no alloo thaim tae enter that's tryin tae git ïn!

¹⁴ [Wae faa ye, maistèrs o tha Laa an Pharisees, ye hippycrates! Fer ye swallae up weedas' hooses an ye mak lang prayers fer a show; sae yis'll be condemned aa tha mair.]

¹⁵ Wae faa ye, maistèrs o tha Laa an Pharisees, ye hippycrates! Fer ye trevel ower lan an sea tae git a sing'l convert, an whaniver he cums roon tae yer wye o thïnkin, ye mak hïm twice as much a sinn o hell as yis ir yersels.

¹⁶ Wae faa ye, blin guides! Ye say, ‘If oniebodie sweers bi tha Hoose o God, ït mains naethin; but ïf oniebodie sweers bi tha gowld o tha Hoose o God, he'll be hel tae hïs oath.’

¹⁷ Ye blin coofs ye! Whut's mair impoartin: tha gowld, or tha Hoose o God that maks tha gowld halie?

¹⁸ Ye say as weel, ‘If oniebodie sweers bi tha althar, ït mains naethin; but ïf oniebodie sweers bi tha gift on ït, he ïs bun bi hïs oath.’

¹⁹ Ye blin men! Whut's mair impoartin: tha gift, or tha althar that maks tha gift halie?

²⁰ Sae, tha yin that sweers bi tha althar sweers bi ït, ay, an bi iveriethin on ït as weel.

²¹ An hïm that sweers bi tha Hoose o God sweers bi ït, an bi tha Yin that leeves ïn ït.

²² An tha yin that sweers bi heiven sweers bi God's throne, an bi tha Yin that sïts on tha throne.

²³ Wae faa ye, maistèrs o tha Laa an Pharisees, ye hippycrates! Ye gie a tenth o yer gairden spices - yer mint, dill an cummin. But yis hae neglectit tha mair impoartin mettèrs o tha Laa - justice, mercie an faith. Gie yer tenth, but dïnnae ferget tae be fair an kine tae ithers, as weel.

²⁴ Ye blin guides! Ye strain oot a mïdge, but ye swallae a kemel.

²⁵ Wae faa ye, maistèrs o tha Laa an Pharisees, ye hippycrates! Ye waash tha ootside o tha bickers an tha plates, but tha inside o thaim's fu o whut ye got bi yer plunnerin an greed.

²⁶ Blin Pharisee! Furst clain tha inside o tha bicker [an tha plate], an then tha ootside wull be clain as weel.

²⁷ Wae faa ye, maistèrs o tha Laa an Pharisees, ye hippycrates! Ye ir laik white-waashed graves, that luk quare an nice on tha ootside but on tha inside the'r fu o deid men's banes an iveriethin that's no clain.

²⁸ In tha same wye, on tha ootside fowk wud thïnk ye wur guid leevin, but on tha inside ye'r fu o hypocrisie an wïckitness.

²⁹ Wae faa ye, maistèrs o tha Laa an Pharisees, ye hippycrates! Fer yis big tombs fer tha proaphits an fancie monuments fer guid men o lang syne.

³⁰ An ye say, ‘If we haed hae leeved ïn tha days o oor forefaithers, we wudnae hae bin pairtie tae sheddin tha bluid o tha proaphits.’

³¹ In sayin that, ye'r wutnesses agin yersels. Ye'r bred frae thaim that murdèred tha proaphits, sae ye ir.

³² Gang aheid, feenish aff whut yer forefaithers begun!

³³ Ye snakes! Ye shooer o vipers! Hoo wull ye escape bein condemned tae hell?

³⁴ Sae A'm gaun tae senn ye proaphits, an wise men, an taichers. Some o thaim ye'll kïll an hing on a cross; ithers ye'll whup ïn yer Meetin Hooses an ye'll hunt thaim frae toon tae toon.

³⁵ Acause o thïs, on your heids wull faa tha bluid o aa tha upricht fowk that haes iver bin spïllt on tha irth, frae tha kïllin o that guid man Abel tae tha kïllin o Zechariah sinn o Barachiah - hïm that ye murdèred ïn tha Hoose o God atween tha Halie o Halies an tha althar.

³⁶ A tell ye tha truith, tha judgemen fer aa thïs wull faa doon on thïs verie genèration.

Jesus' sorra ower Jerusalem

³⁷ O Jerusalem, Jerusalem, you that kïll tha proaphits an stane thaim that's sent tae ye, monies tha time A wantit tae gether yer weans thegither, laik a hen gethers hir lachter o wee burds unnèr hir wïngs, but yis wudnae let me!

³⁸ Luk, yer Hoose haes bin forsook, an noo ït's empie.

³⁹ Fer A tell ye thïs, ye'll no see me agane til ye say, ‘Blisst ïs tha Yin that cums ïn tha name o tha Loard!’ ”