Mattha 19 - Tha Fower Gospels ïn Ulstèr-Scots 2021

Jesus axt aboot divorce

¹ Whaniver Jesus wus daen sayin these thïngs, he left Galilee. He gaed ïntae Judea an crosst ower tha rïver Joardan.

² Bïg croods follaed hïm, an he hailt tha seeck amang thaim.

³ Some Pharisees cum up tae hïm, an tae pit hïm tae tha test the' axt hïm, “Is a man allooed tae pit awa hïs wife fer onie an iverie raison?”

⁴ “Hae ye no read,” Jesus answert, “that richt frae tha stairt tha Creator ‘made men an he made weemen,’

⁵ an that he saed, ‘Fer thïs raison a man wull lea hïs faither an hïs mither an be joint tae hïs wife, an tha twa wull becum as yin’?

⁶ An noo the' ir nae mair twa seprit fowk, but the' ir yin. Sae whut God haes püt thegither, let nae man püll sinnerie.”

⁷ “Whut fer then,” the' axt hïm, “whut fer dïd Moses say that a man cud gie hïs wife a notysh o divorce an pit hir awa?”

⁸ Jesus saed, “Moses allooed ye tae divorce yer wifes acause yer hairts wus haird. But thïs wusnae tha wye o ït frae tha stairt.

⁹ A tell ye that oniebodie that pits awa hïs wife, fer ocht ither ner rinnin aff wi anither man, an then merries anither wumman - that man commïts adultèrie.”

¹⁰ Hïs follaers saed tae hïm, “If that's tha wye o ït wi a man that haes a wife, shair ït wud be faur bettèr no tae merrie ava!”

¹¹ Jesus saed, “It's no iveriebodie can hannle that, jist thaim that's halpt bi God.

¹² Fer some ir eunuchs acause the' wur boarn that wye; ithers wur made that wye bi men; an ithers haes gien up tha chaunce o merriage acause o tha Kïngdom o Heiven. Tha yin that can hannle thïs shud accept ït.”

Jesus blisses tha wee weans

¹³ Some weans wur brocht tae Jesus fer hïm tae pit hïs hans on thaim an pray fer thaim. Hïs follaers scoult tha yins that brocht thaim,

¹⁴ but Jesus saed, “Alloo tha weans cum tae me, an dïnnae houl thaim bak, fer tha Kïngdom o Heiven belangs tae tha laiks o thaim.”

¹⁵ An eftèr he püt hïs hans on tha weans tae bliss thaim, he gaed on frae thair.

Walth ïn heiven

¹⁶ Noo, alang cum thïs man tae Jesus an axt hïm, “Maistèr, whut guid thïng maun A dae tae hae iverlastin life?”

¹⁷ “Whut dae ye main bi ‘guid’?” Jesus saed. “Thair ïs Yin alane that ïs guid. If ït's iverlastin life ye'r wantin, dae whut tha commauns bïds ye!”

¹⁸ “Whutch yins?” tha man axt. Jesus saed, “ ‘Dïnnae murdèr’. ‘Dïnnae commït adultèrie’. ‘Dïnnae tak whut's no yer ain’. ‘Dïnnae tell lees aboot ither fowk’.

¹⁹ ‘Gie respeck tae yer faither an yer mither’, an ‘Ye maun love yer nighber jist as much as yersel’.”

²⁰ “A hae kep aa these,” tha young man saed. “Whut else dae A hae tae dae?”

²¹ Jesus saed bak tae hïm, “If ye hae a mine tae be perfait, awa an sell aa ye hae got, an gie ït awa tae tha puir, an ye'll hae walth ïn heiven. Then cum bak, an follae me.”

²² Whaniver tha young man heerd thïs, he wus doon ïn tha mooth an went awa, fer he wus quare an weel-aff.

²³ Then Jesus saed tae hïs follaers, “A tell ye tha truith, ït ïs haird fer a bodie that's weel-aff tae git ïntae tha Kïngdom o Heiven.

²⁴ Ay, A'm tellin ye, ït wud be aisier fer a kemel tae gae throu tha ee o a needle ner fer a monied man tae git ïntae tha Kïngdom o God.”

²⁵ Whaniver tha follaers heerd thïs, the' wur stoondit an axt, “Wha ïn aa tha warl can be saved then?”

²⁶ Jesus lukt strecht at thaim an saed, “Wi man thïs ïs no poassible, but wi God aa thïngs ir poassible.”

²⁷ Wi that, Petèr saed bak tae hïm, “Luk, we hae gien up iveriethin tae follae ye! Whut then wull thair be ïn ït fer us?”

²⁸ Jesus saed tae thaim, “A tell ye tha truith, whaniver tha new warl cums aboot, an tha Sinn o Man sïts on hïs throne o glorie, yous that hae follaed me wull sït doon on twal thrones as weel, judgin tha twal clans o Israel.

²⁹ An iverie yin that haes gien up hooses, or brithers, or sïstèrs, or faither, or mither, or [wife, or] childèr, or fairm o lan on accoont o me wull git bak a hunnèr times as much; an he wull inherit iverlastin life.

³⁰ But monies a bodie that's foremaist noo wull be last then, an monie that's last noo wull be foremaist then.”