Mattha 16 - Tha Fower Gospels ïn Ulstèr-Scots 2021

Tha heidyins ax fer a sign

¹ Yin day, tha Pharisees an Sadducees cum tae Jesus an tried tae ketch hïm oot bi axin hïm tae show thaim a sign frae heiven.

² He saed, “At dailygan, ye say, ‘Tha weather's gaun tae be guid, fer tha sky ïs rid.’

³ An ïn tha moarnin, ye say, ‘It'll be wundie theday, fer tha sky ïs rid an threatinin.’ Sae yis can tell tha weather bi tha luk o tha sky, but yis cannae wark oot tha signs o tha times!

⁴ A wïckit an adultèrous genèration luks fer a mïraclis sign, but nane wull be gien ït apairt frae tha sign o Jonah.” Jesus then left thaim an gaed awa.

Tha yeast o tha Pharisees an tha Sadducees

⁵ An whaniver the' crosst tae tha ither side o tha loch, hïs follaers dïdnae mine tae tak breid wi thaim.

⁶ “Luk oot,” Jesus saed tae thaim. “Be on yer gaird agin tha yeast o tha Pharisees an tha Sadducees.”

⁷ The' taakt aboot thïs amang thairsels an saed, “It's becas we dïdnae brïng onie breid wi iz.”

⁸ Jesus kent whut the' wur on aboot, sae he saed tae thaim, “Fer why ir ye taakin amang yersels aboot haein nae breid? Hae yis nae faith ava?

⁹ Dae yis still no unnèrstan? Dae yis no mine tha five loafs A gien til tha five thoosan, an aa tha baskets o leains yis gethert up eftèr?

¹⁰ Or tha seiven loafs A gie til tha fower thoosan, an hoo monie creels yis gethert up anaa?

¹¹ Hoo ïs ït yis dïnnae unnèrstan that A wus no taakin tae ye aboot breid? A'm tellin ye, jist be on yer gaird agin tha yeast o tha Pharisees an Sadducees.”

¹² An then the' unnèrstud that he wus no tellin thaim tae gaird agin tha yeast uised ïn breid, but agin tha taichin o tha Pharisees an Sadducees.

Petèr kens Jesus ïs tha Messiah

¹³ Whaniver Jesus cum tae tha dïstrict o Caesarea Phïlippi, he axt hïs follaers, “Wha dae fowk say tha Sinn o Man ïs?”

¹⁴ The' saed, “A wheen say Jhone tha Baptiser; some wud say Elijah; an still ithers, Jeremiah or yin o tha proaphits.”

¹⁵ “But whut aboot yersels?” he axt. “Wha dae you say that A am?”

¹⁶ Simon Petèr saed bak, “You ir tha Christ, tha Sinn o tha leevin God.”

¹⁷ Jesus saed, “Blisst ir ye, Simon sinn o Jonah, fer thïs wus no revealt tae ye bi onie human bein, but bi ma Faither ïn heiven.

¹⁸ A tell ye, frae noo on you ir Petèr, an on thïs roak A wull big ma kirk, an aa tha pooers o hell wull no owercum ït.

¹⁹ A wull gie ye tha keys o tha Kïngdom o Heiven; an whutiver ye bine on irth wull be bun ïn heiven, an whutiver ye lowse on irth wull be lowsed ïn heiven.”

²⁰ Then he bïd hïs follaers no tae tell oniebodie that he wus tha Christ.

Jesus foretells hïs deith

²¹ Frae that time on Jesus stairtit tae mak ït clear tae hïs follaers that he maun gae tae Jerusalem, an he maun suffer monies a thïng at tha hans o tha eldèrs, tha heid preeshts an tha maistèrs o tha Laa. He toul thaim that he maun be püt tae deith an be ris up tae life on tha thurd day.

²² Petèr tuk hïm tae tha yin side an begun tae scoul hïm. “Niver, Loard!” he saed. “Thïs wull niver happen tae you!”

²³ Jesus turnt an saed tae Petèr, “Git ahint me, Satan! Ye ir a thrip-stane tae me; fer ye gie nae thocht tae tha thïngs o God. Yer heid's fu o tha thïngs o men!”

²⁴ Then Jesus saed tae hïs follaers, “If oniebodie wants tae follae eftèr me, he maun ferget aboot hissel aathegither, tak up hïs cross an stïck clase tae me.

²⁵ Fer whaiver wants tae save hïs life wull loass ït, but hïm that loasses hïs life on ma accoont wull fin ït.

²⁶ Whut guid wull ït be fer a bodie ïf he gets tha hale warl, an yit loasses hïs ain sowl? Shair thair's naethin a man cud gie tae get bak hïs ain sowl, ïs thair?

²⁷ Fer tha Sinn o Man ïs gaun tae cum wi hïs angels ïn hïs Faither's glorie, an then he'll reward iverie sing'l bodie accoardin tae whut the' hae daen.

²⁸ A tell ye tha truith, thair's yins stannin here, an ït's fer sartin the'll no dee, afore the' see tha Sinn o Man cumin ïn hïs Kïngdom.”