Mairk 4 - Tha Fower Gospels ïn Ulstèr-Scots 2021

Tha parable o tha fairmer skailin seed

^1-2 Yinst mair Jesus begun lairnin fowk alang tha loch shore. A wile thrang o fowk haed gethert roon aboot hïm, sae he got ïntae a bóat that wus oot on tha wattèr. He sut doon an toul tha yins on tha shore a hale wheen o thïngs bi parables. Amang thaim wus thïs yin.

³ “Lïsten here [noo]! Thair wus thïs fairmer went oot tae saa seed.

⁴ Whan he wus scattèrin tha seed, some drapt doon alang tha pad an tha burds flew doon an peckt ït up.

⁵ An some fell on roakie grun whar thair wusnae much clye. It sprung up quïck, becas tha clye wus shalla,

⁶ but as shune as ït brairdit an tha sin cum oot, tha plants wus scorcht, an the' deed aff acause the' haed nae ruits.

⁷ Ither seed faad doon amang thoarns, an tha thoarns sprung up, tuk ower an chokt ït. Sae thair wus nae yiel.

⁸ But a lock drapt on tae guid grun. It daen weel an gien a guid hairst: thurtie, sïxtie or a hunnèr times mair.”

⁹ An Jesus saed, “Let hïm that haes ears ïn hïs heid tak tent!”

¹⁰ An whan he wus on hïs ain, some o tha fowk that wus alang wi tha Twal axt hïm aboot hïs parables.

¹¹ “Tha saicret o tha Kïngdom o God haes bin gien tae ye,” saed Jesus, “but tae thaim that's ootside tha Kïngdom, A taak ïn parables;

¹² sae that ‘The' micht aye be lukkin, but niver see, an aye lïstenin, yit niver unnèrstan; less the' micht turn an [thair sïns] be forgien.’ ”

¹³ An Jesus saed, “If ye dïnnae unnèrstan thïs parable, hoo ir ye gaun tae unnèrstan aa tha rest?

¹⁴ Tha bodie that scattèrt tha seed wus sowin tha wurd o God.

¹⁵ Then some fowk ïs laik tha seed that faad doon nixt tha pad. As shune as the' hear tha wurd, alang cums Satan an taks ït oot o thair hairts.

¹⁶ An ït's jist tha same wi tha seed that fell on tha staney grun. The' hear tha wurd an richt awa tak ït ïn wi a gled hairt.

¹⁷ But the' hae nae ruit sae the' cannae houl on tae ït whan haird times an trouble cums acause o God's wurd, an sae the' jist gie up.

¹⁸ An thair's ither fowk akin tae tha seed that wus sowed amang tha thoarns.

¹⁹ The'r aye worryin, rinnin eftèr money an hung'rin fer thïngs the' hinnae got. An sae thair's nae crap, fer tha wurd haesnae a chaunce tae growe.

²⁰ Ither fowk ïs laik tha seed sowed on guid grun. The' hear tha wurd, tak ït tae thair hairts, an ït gies a guid yiel: thurtie, sïxtie an a hunnèr times mair.”

Tha parable o tha lamp

²¹ An Jesus saed tae thaim, “Wud ye iver thïnk o brïngin ïn a lamp an pittin ït unnèr a boul or tha bed? Na. Ye wud pit ït up on a stan.

²² Fer thair's naethin hïd that'll no be brocht oot ïntae tha licht, an thair's nae saicret that'll no be brocht oot ïntae tha apen.

²³ Let hïm that haes ears ïn hïs heid tak tent!”

²⁴ An he saed tae thaim, “Mine hoo yis lïsten. Fer tha misure yis gie wull be tha misure yis get. Ay, an ït'll be even mair.

²⁵ Fer hïm that haes plentie wull be gien mair. An hïm that haes lïttle, even whut he haes wull be tuk awa frae hïm.”

Tha parable o tha growein seed

²⁶ An Jesus saed, “Tha Kïngdom o God ïs jist laik thïs. Tha fairmer scattèrs seed on tha grun.”

²⁷ “Day an nicht, nae mettèr ïf he's up an aboot or sleepin, tha seed sprouts up an growes, tha mair he daesnae unnèrstan whut maks ït growe.

²⁸ Tha seed growes ïn tha clye ïtsel, furst tha braird shows, then tha staaks, an then tha heids cums on tha tap o tha staaks.

²⁹ Then whan tha crap ïs ripe, tha fairmer taks tha heuk tae ït, fer hairvest time ïs cum.”

Tha parable o tha mustèrt seed

³⁰ An agane he saed, “Whut d'ye thïnk tha Kïngdom o God ïs laik? Noo, whut storie cud A tell that wud pit ït ower tae ye?

³¹ It ïs laik a wee bït mustèrt seed plantit ïn tha grun, tha weeest seed o aa.

³² But whan ït growes, ït gets bïgger an bïgger, tae ït's tha bïggest plant ïn tha gairden, wi a spreed o brenches tha burds can roost unnèr, ïn oot o tha sin.”

³³ An Jesus toul a hale wheen o parables laik these tae tha fowk, tae halp thaim unnèrstan.

³⁴ He niver saed ocht tae thaim wi'oot uisin parables. But whan hïm an hïs follaers wur on thair ain, he toul thaim whut ït aa mained.

Tha stoarm on tha loch

³⁵ Whan evenin cum roon, he saed tae hïs follaers, “C'mon an we'll gang ower tae tha ither side o tha loch”.

³⁶ Whaniver tha thrang wus sent hame, Jesus wus aareadie ïn tha bóat, sae the' stairtit oot alang wi some ither wee bóats fer tha faur side.

³⁷ Aa at yinst, a bïg wun ris up. Thair wus a pooerfu stoarm an tha waves wus batin ower tha side o tha bóat tae ït wus near fu o wattèr.

³⁸ Jesus wus sleepin ïn tha bak o tha bóat, on a pïlla. Hïs follaers ris hïm yellin, “Maistèr, dae ye no care ïf we aa droon?”

³⁹ Up he got, he chackt tha wun an he saed tae tha waves, “Be quait! Lown doon!”. Then tha wun drapt an ït wus aa peace an quaitness.

⁴⁰ An Jesus saed tae thaim, “Hoo cum yis ir sae feart? Hae ye nae faith yit?” Eftèr aa thïs,

⁴¹ the' wur hairt-scarred an saed tae yin anither, “Whut kine o a man ïs thïs? Even tha wun an tha waves daes as he bïds thaim!”