Mairk 3 - Tha Fower Gospels ïn Ulstèr-Scots 2021

Jesus hails on a Sabbath day

¹ An Jesus went bak ïntae tha Meetin Hoose agane, an thair wus a man thair an hïs richt han wus wuthert.

² An tha Pharisees kep thair een on hïm, tae see wud he hail tha man on a Sabbath day, fer ïf he dïd, the' cud hae sumthin agin hïm.

³ Jesus saed tae tha man wi tha baad han, “Stan up whar we can aa see ye!”

⁴ Then he saed tae tha fowk roon hïm, “On tha Sabbath, ïs ït richt tae dae guid or tae dae ïll, tae save life or tae dae awa wi ït?” But the' hel thair wheesht.

⁵ He turnt roon an gien thaim an ang'rie luk, an at tha same time he wus vext the' wur that haird-hairtit. He saed tae tha man, “Streetch oot yer han!” Sae he streetcht ït oot, an hïs han cum as guid as tha ither yin.

⁶ Richt awa tha Pharisees went oot an collogued wi Herod's follaers tae see hoo the' cud dae awa wi Jesus.

A bïg crood follaes Jesus

^7-8 But Jesus tuk hissel aff wi hïs follaers tae tha loch, alang wi a wile thrang o fowk that cum frae Galilee, Judea, Jerusalem an Idumea, frae tha ither side o tha Joardan, an even frae Tyre an Sidon, fer wurd o hïs mïracles haed trevelt faur an wide.

⁹ Tha crood wus that bïg, jundyin roon hïm on tha shore, that he toul hïs follaers tae mak a wee bóat readie fer hïm.

¹⁰ Fer he haed hailt that monie fowk, that aa tha yins wi an ailment püsht forrit tae touch hïm.

¹¹ An whaniver fowk wi ïll spïrits saa Jesus, the' faad doon afore hïm, an tha spïrits cryed oot, “You ir tha Sinn o God!”

¹² An he aye chairged thaim no tae tell oniebodie wha he wus.

Jesus waals tha twal possels

¹³ Then Jesus went ontae a muntin, an he caad tha yins he wantit wi hïm, an the' cum tae hïm.

^14-15 An he pïckt oot twal tae be wi hïm, that he cud senn oot tae praich, an tae hae tha pooer [tae hail tha seeck] an tae drive oot demons. He gien tha twal tha name o “Possels”.

¹⁶ An thïs ïs whut the' wus caad: Simon (that Jesus caad Petèr),

¹⁷ Jeames an Jhone, tha sinns o Zebedee (Jesus caad thaim “Boanerges”, mainin “Sinns o Thunnèr”),

¹⁸ Andra, Phïlip, Bartholomew, Mattha, Tammas, Jeames (tha sinn o Alphaeus), Thaddaeus, Simon tha Zealot,

¹⁹ an Judas Iscariot (tha yin that bethrayed Jesus).

Jesus an Beelzebul

²⁰ Sae Jesus went bak ïntae tha hoose whar he wus stappin ower, an thair wus that monie fowk croodin roon aboot thaim, that the' cud get nae peace tae hae oniethin tae ait.

²¹ Becas o whut wus happenin, Jesus' freens tried tae tak tha houl o hïm, fer the' thocht he wus oot o hïs mine.

²² An some maistèrs o tha Laa cum frae Jerusalem saed, “Beelzebul haes taen hïm ower. It's tha heidyin o tha demons that's giein hïm tha pooer tae cast oot ither demons!”

²³ An Jesus caad thaim ower tae hïm an raisoned wi thaim, sayin, “Hoo can Satan cast hissel oot?

²⁴ If a kïngdom ïs divïd agin ïtsel, ït maun faa sinnerie.

²⁵ An ïf a femlie ïs divïd agin ïtsel, ït cannae stan.

²⁶ Sae ïf Satan rises up agin hissel, an ïs divïd, then he cannae stan, an that's tha enn o hïm!

²⁷ Shair naebodie can brek ïntae a strang man's hoose an ramseck ït, afore he haes tyed up tha strang man. Eftèr that, he can plunner awa!

^28-29 A tell ye thïs, men can be forgien blesphemies an aa ither kines o wrangdaeins. Thair'll be nae forgiein fer hïm that spakes blesphemies agin tha Halie Spïrit, but! Fer that sïn, an tha guilt o ït, bides fer iver an aye.”

³⁰ Noo Jesus saed aa thïs, becas tha fowk cum frae Jerusalem wur chairgin hïm wi haein an ïll spïrit.

Tha true femlie o Jesus

³¹ An tha mither an brithers o Jesus cum lukkin hïm at tha hoose whar he wus stappin, an the' caad fer hïm tae cum oot.

³² Summodie ïn tha crood sïttin lïstenin tae hïm toul hïm, “Yer mither an yer brithers [an sïstèrs] ir ootbye. The' ir wantin ye!”

³³ An Jesus cum bak wi, “Wha's ma mither, an wha's ma brithers?”

³⁴ An he lukt at tha crood sïttin aa roon hïm an saed, “These yins here ir ma mither an brithers!

³⁵ Fer thaim at daes tha wull o God, them's ma brither, ma sïstèr, an ma mither.”