Mairk 2 - Tha Fower Gospels ïn Ulstèr-Scots 2021

A paralysed man cairriet tae Jesus

¹ Eftèr a wheen o days, Jesus cum bak tae Capernaum. An wurd went roon that he wus bak hame.

² An monie fowk gethert thegither, an thair wus sitch a thrang, thair wus nae mair ruim, even ootbye tha dure. An Jesus wus praichin tha wurd tae thaim.

³ Then fower men cum tae tha hoose, cairryin a paralysed man.

⁴ An as the' cudnae git near tae Jesus fer tha thrang, the' dïgged a hole ïn tha ruif abain hïm; then the' lut doon tha mat throu tha hole the' haed made, wi thair seeck freen lyin on ït.

⁵ An whan Jesus saa whut faith the' haed, he saed tae tha paralysed man, “Ma sinn, yer sïns ïs aa forgien!”

⁶ Noo some maistèrs o tha Laa wus sïttin thïnkin thïs ower.

⁷ “Hoo cum thïs man dars tae taak laik thïs?” the' thocht. “It's naethin but blesphemie. Wha can forgie sïns but God alane?”

⁸ But Jesus knowed thair thochts an cud read thaim laik a buik. He saed tae thaim, “Hoo cum yis ir thïnkin laik thïs?

⁹ Is ït aisier tae tell a paralysed man, ‘Yer sïns ïs forgien ye’, or tae tell hïm, ‘Get up an waak, an tak yer mat wi ye’.

¹⁰ But jist sae as ye'll ken that tha Sinn o Man haes tha pooer tae forgie sïns here on irth...” - he saed tae tha paralysed man -

¹¹ “A'm tellin ye, get up on yer feet, tak yer mat an awa hame tae yer ain hoose.”

¹² Richt awa, up he got, gethert up hïs mat an waakit oot ïn front o thaim aa. Iveriebodie thocht that thïs wus a wunnèrfu sicht an gien glorie tae God, an saed, “We hae niver saen tha laik o thïs afore!”

Jesus caas Levi

¹³ Yinst mair Jesus gaed doon tae tha loch shore. A bïg crood gethert roon hïm, an he stairtit taichin tha fowk.

¹⁴ Whan he wus waakin alang, he saa Alphaeus's sinn, Levi, sïttin ïn tha tex man's hut. “Follae me”, Jesus telt hïm, an Levi ris up an follaed hïm.

¹⁵ Sae ït cum aboot, whan Jesus wus haein a bite tae ait at Levi's hoose, monie tex getherers an “sïnners” wus aitin alang wi Jesus an hïs follaers, fer thair wus aye a hale crood alang wi hïm.

¹⁶ Whaniver tha taichers o tha Laa an tha Pharisees saen hïm alang wi tha sïnners an tex men, the' axt hïs follaers, “Whut's he daein aitin wi tex getherers an sïnners?”

¹⁷ Whan Jesus heerd thïs, he saed tae thaim, “It's no tha fowk that's weel that haes need o a doctèr, but thaim that's seeck. A hinnae cum fer tae caa guid leevin fowk; ït's sïnners A hae cum tae caa.”

Jesus ïs quïzzed aboot fastin

¹⁸ Noo Jhone's follaers an tha Pharisees wur keepin a fast. An some fowk cum tae Jesus an axt hïm, “Hoo cum tha follaers o Jhone an tha Pharisees keep a fast, but your yins dïnnae?”

¹⁹ Sae Jesus cum bak wi thïs: “Dae ye thïnk fowk wud sït doon at tha spreed ïn a waddin faist alang wi tha bridegruim, an no tak a bite tae ait? Na, as lang as tha bridegruim ïs wi thaim, the' cannae fast!

²⁰ But tha day wull cum, whaniver tha bridegruim wull be tuk awa frae thaim, an cum that day, the'll keep a fast.

²¹ Eftèr aa, ye wudnae shew a bït o new claith, that haesnae bin shrunk, on tae an oul cóat. If ye dae, tha patch wull teer awa tha sides o tha hole, an mak ït waur.

²² Nether wud ye pit new wine ïntae oul wineskïns. Fer ïf ye dae, tha skïns wull brust, an tha wine'll be skailt. An baith tha wine an tha skïns wull be ruint. But ye maun pit new wine ïntae new skïns.”

Jesus ïs Loard o tha Sabbath

²³ Yin Sabbath day, Jesus wus waakin throu tha coarnfiels, an as the' wur makkin thair wye, hïs follaers stairtit tae pluck tha heids aff tha coarn.

²⁴ An tha Pharisees saed tae Jesus, “Luk, the' shudnae be daein that! That's agin tha Laa on tha Sabbath day!”

²⁵ Jesus saed tae thaim, “Hae ye no read aboot whut Davit daen whaniver hïm an hïs freens wus hung'rie an ïn want?

²⁶ Dïd he no gang ïntae tha Hoose o God, whan Abiathar wus tha Heich Preesht, an dïd he no ait tha halie showbreid an gie ït tae tha ithers wi hïm forbye? Shair that wus agin tha Laa, fer naebodie but tha preeshts cud ait ït!”

²⁷ An Jesus went on tae say, “Tha Sabbath wus made fer man; man wusnae made fer tha Sabbath!

²⁸ Sae tha Sinn o Man ïs Loard o tha Sabbath anaa.”