Mairk 11 - Tha Fower Gospels ïn Ulstèr-Scots 2021

Tha croods walcum Jesus tae Jerusalem

¹ An whaniver the' got near tae Bethphage an Bethanie on tha ootskirts o Jerusalem nixt tha Moont o Olives, Jesus bïd twa o hïs follaers tae gang on aheid.

² He saed, “Gae ïntae tha clachan fornent ye, an as shuin as ye gae ïn, ye'll fin a cowlt tyed up, that naebodie haes iver sut on. Lowse ït, an brïng ït here!

³ If oniebodie axes ye, ‘Whut ir ye daein?’, jist tell thaim, ‘Tha Loard haes need o ït, an ye'll get ït bak afore lang.’ ”

⁴ Sae aff the' went, an fun tha cowlt tyed tae a dure ootbye on tha street. An the' lowsed ït.

⁵ Noo some o tha yins stannin roon axt thaim, “Whut ir ye daein, lowsin that cowlt?”

⁶ Tha twa follaers answert whut Jesus haed toul thaim tae say, an tha fowk lut thaim gang on aheid.

⁷ Sae the' brocht tha cowlt tae Jesus, an throwed thair claes ower ïts bak. An Jesus got up on ït.

⁸ An a lock o fowk stannin alang tha róad spreed thair claes on tha pad, an ither yins cut doon leafie brenches oot o tha fiels an the' strewed thaim afore hïm.

^9-10 An afore an behin fowk wur cryin oot, “Hosanna! Blisst be tha Yin that cums ïn tha name o tha Loard! Blisst be tha cumin Kïngdom o oor faither Davit. Hosanna ïn tha heichest heiven!”

¹¹ Sae Jesus went ïntae Jerusalem, an on ïntae tha Hoose o God. An whan he haed lukt roon, an haed tuk iveriethin ïn, he left fer Bethanie agane wi hïs twal follaers, becas ït wus gettin late on ïn tha day.

Tha fïg tree wi nae fruit

¹² Tha nixt day, whan the' wur leain Bethanie, Jesus wus hung'rie.

¹³ An he notyshed a fïg tree a guid wye aff wi leafs on ït, sae he went tae see ïf ït haed onie fruit; but ït haed naethin on ït apairt frae leafs, fer ït wusnae tha richt time o yeir.

¹⁴ An hïs follaers heerd hïm sayin tae tha tree, “Nae man wull iver ait fruit frae you agane!”

Reddin oot tha dailers

¹⁵ The' cum tae Jerusalem. An Jesus went strecht ïntae tha Hoose o God, an he begun reddin oot tha dailers that wus buyin an sellin ïn tha coortyaird. He coupt tha tables o tha siller changers, an whammelt tha saits o thaim that wus sellin doos.

¹⁶ He wudnae alloo fowk tae cairrie oniethin ïntae tha Hoose o God fer tae be soul.

¹⁷ An he gien thaim thïs lesson. Saed he, “Is ït no writ doon, ‘Ma hoose wull be caad a hoose o prayer fer aa nations’? But yous hae turnt ït ïntae a den o robbers!”

¹⁸ An whaniver tha heid preeshts an tha maistèrs o tha Laa heerd thïs, the' wantit tae dae awa wi hïm, fer the' wur feart o hïm, becas aa tha fowk wur wile taen on wi hïs taichin.

¹⁹ An at dailygan the' went oot o tha cïtie.

Tha fïg tree noo wuthert

²⁰ An ïn tha moarn, whaniver the' passt tha fïg tree, ït wus aa wuthert, ay, richt doon tae tha ruits.

²¹ An Petèr mindit tha day afore an saed, “Luk, Rabbi, tha fïg tree ye curst ïs aa weezened up an deid!”

²² Jesus saed bak tae thaim, “Hae faith ïn God.

²³ Fer A tell yis thïs, whaiver wull say tae thïs muntin, ‘Be shïftit frae whar ye ir, an cast yersel ïntae tha sea!’; ïf tha same man haesnae onie doot ïn hïs hairt, but believes ïn hissel that thïs wull raelie cum aboot, then God wull dae ït fer hïm!

²⁴ Sae A say tae yis, aa tha thïngs yis ax fer ïn prayer, believe yis wull hae thaim, an shair eneuch, yis wull.

²⁵ An whan yis stan up tae pray, forgie oniebodie that haes daen yis wrang, sae that yer heivenlie Faither wull forgie you tha wrangs yous hae daen.

²⁶ [If yis dïnnae forgie ither fowk, nether wull yer heivenlie Faither forgie yous!]”

Wha gien ye tha thortie?

^27-28 An the' went bak agane tae Jerusalem an ïntae tha Hoose o God. An as he wus waakin aboot, tha heid preeshts, tha maistèrs o tha Laa an tha eldèrs cum up tae hïm an saed, “Bi whut thortie ir ye daein these thïngs, an wha gien ye ït?”

²⁹ An Jesus saed bak tae thaim, “A want tae ax ye yin question, an whaniver yis gie me tha answer, A wull tell yis bi whut thortie A dae these thïngs.

³⁰ Whaniver Jhone wus baptisin, wus thïs frae heiven or jist a notion o man? Answer me that!”

³¹ Noo the' taakt thïs ower amang thairsels, an the' thocht: “If we say ‘Frae heiven’, then he'll say, ‘Sae hoo cum yis dïdnae believe hïm?’

³² But ïf we say, ‘It wus frae men’, whut then?” Fer the' wur feart tha fowk wud turn on thaim, becas they aa thocht Jhone wus a proaphit.

³³ Sae the' saed, “We cannae tell.” An whaniver Jesus heerd thïs, he saed, “Then A'll no be tellin yis ether bi whut thortie A dae these thïngs!”