Luik 17 - Tha Fower Gospels ïn Ulstèr-Scots 2021

Tha wye tae forgie an hoo tae hae faith

¹ Yin day Jesus saed tae hïs follaers, “Thair'll aye be temptation tae dae wrang, but dear halp tha yin that daes tha tempin!

² It wud be faur bettèr fer hïm ïf a mïllstane wus hung roon hïs neck an he wus drapt ïntae tha sea, rether ner hïm leadin yin o these puir wee craitèrs asthray.

³ Lïsten here, ïf summodie daes ocht agin ye, tell hïm he shudnae hae daen ït, an ïf he says he's sorrie, then forgie hïm.

⁴ An ïf he keeps on daein ye wrang seiven times a day an ïs sorrie iverie time, then ye maun still forgie hïm.”

⁵ An tha possels saed tae tha Loard, “Show iz hoo we can hae mair faith.”

⁶ An tha Loard saed, “If yis haed faith as smaa as a mustèrt seed even, yis cud say tae thïs mulberry tree, ‘Cum oot bi tha ruit an plant yersel ïn tha sea’, an richt awa ït'd dae whut ït's toul.

^7-8 Whaniver yer sarvin man cums ïn frae tha plooin an mindin tha beese, ye wudnae say tae hïm, ‘Sït yersel doon quïck an hae a bite tae ait.’ Rether ye wud tell hïm tae clain hissel up an sarve you furst, an then tak hïs ain eftèr.

⁹ A doot ye wudnae say, ‘Thenks’, tae yer ain man fer daein whut he's pyed tae dae!

¹⁰ In tha same wye, whan ye dae ma bïddin, ye shud say, ‘We'r naethin oot o tha ordinarie! Fer we hae daen nae mair ner we haed tae.’ ”

Ten lepers cured

¹¹ An sae Jesus went on tae Jerusalem, follaein tha mairch atween Samaria an Galilee.

^12-13 As he went ïntae yin o tha vïllages, he saa ten men that wur lepers stannin a wyes aff, an the' caad oot tae hïm, “Jesus, Maistèr, tak peetie on iz!”

¹⁴ An whaniver he saa thaim, he saed, “Awa tae tha preeshts an let thaim luk at ye.” An lo an behoul, as the' went thair wye, the' wur hailt!

^15-16 An yin o thaim, whan he saen he wus cured, turnt bak an cryed oot at tha tap o hïs voice, “Praise God!” Then he faad doon at Jesus' feet an gien thenks. An tha man wus a Samaritan, sae he wus.

^17-18 “Dïd A no cure ten men?” axt Jesus. “Whar's tha ither nine? Hae nane o thaim cum bak tae gie thenks tae God apairt frae thïs foreigner?”

¹⁹ Jesus saed tae tha man, “Rise up an gang yer wye, yer faith haes made ye weel.”

Tha cumin o God's Kïngdom

^20-21 Yin time whaniver tha Pharisees axt Jesus whan God's Kïngdom wud cum, he toul thaim, “Yis cannae say, ‘Here ït ïs!’ or ‘Thair ït ïs!’ Tha Kïngdom o God ïs aareadie here amang yis, sae thair's nae use lukkin fer ït cumin!”

²² An he saed tae hïs follaers, “Tha day wull cum whan yis'll want tae see tha Sinn o Man. Yis'll luk fer me an A'll no be here.

²³ Fowk micht say, ‘He's here or he's thair’, but tak nae notysh, an dïnnae rin eftèr thaim.

²⁴ Fer jist as tha lichtnin fleshes ower tha lïft, that's whut laik ït'll be, tha day tha Sinn o Man cums bak.

²⁵ But afore that, He'll hae tae suffer sair, an tha fowk roon hïm noo wull turn agin hïm.

²⁶ Whaniver tha Sinn o Man cums bak, ït'll be jist laik ït wus ïn Noah's day.

²⁷ Fer fowk wus aitin an drïnkin an gettin merriet, richt up tae tha verie day Noah went ïntae tha airk, then tha wattèr floodit an aa wur droont.

²⁸ It wull be tha same as ït wus ïn tha time o Lot; the' et an the' drunk an the' cairriet on wi thair bïzness o buyin, sellin, fairmin an biggin.

²⁹ But tha verie day that Lot went oot o Sodom, fire an brimstane cum doon frae heiven an the' wur aa kïllt.

³⁰ Tha same wull happen tha day yis see tha Sinn o Man cum bak.

³¹ On that day, naebodie shud lea hïs ruiftap an be gaun bak doon fer ocht ïn hïs hoose, an naebodie shud lea hïs fiel ether, tae gae bak hame.

³² Mine whut happent tae Lot's guidwife!

³³ Whaiver houls on tae hïs life wull loass ït, an whaiver gies up hïs life wull aye hae ït.

³⁴ A'm tellin yis, ïn that nicht, twa fowk wull be ïn tha yin bed; yin wull be tuk an tha ither lef behin.

³⁵ Twa weemen wull be grindin mail thegither; yin wull be tuk an tha ither lef behin. [

³⁶ Twa men wull be ïn tha fiel; tha yin wull be tuk an tha ither lef behin.]”

³⁷ An hïs follaers axt hïm, “Whar wull thïs tak place?” An Jesus toul thaim, “Whar ye see a crood o vultèrs, ye know thair's a deid bodie aboot. Ay, sae whaniver ye see tha signs A'm taakin aboot, then ye'll know weel eneuch!”