Jhone 21 - Tha Fower Gospels ïn Ulstèr-Scots 2021

Jesus appears tae seiven o hïs follaers

¹ Latèr on, Jesus appeart agane tae hïs follaers, thïs time on tha loch shore o Tiberias. Here's hoo ït happent.

² Simon Petèr, Tammas (caad Didymus, tha twun), Nathaniel frae Cana ïn Galilee an tha sinns o Zebedee wur aa thegither thonner, wi twa ither follaers.

³ “A'm awa oot tae ketch some fïsh,” Simon Petèr toul thaim, an the' saed, “We'll gang alang wi ye.” Sae oot the' went an got ïntae tha bóat, but the' niver catched ocht ava tha hale nicht.

Tha bïg ketch o fïsh

⁴ In tha smaa oors o tha moarnin, Jesus wus stud on tha shore, but tha follaers dïdnae ken ït wus hïm.

⁵ Jesus caad oot tae thaim, “Freens, hae yis no catched onie fïsh?” “Na,” the' reponed.

⁶ “Pit yer neyt oot,” qo he, “on tha richt-han side o tha bóat an yis'll fin some.” Whaniver the' dïd, the' wurnae fït tae pu ïn tha neyt, thair wus that monie fïsh ïn ït!

⁷ An then tha follaer that Jesus loved saed tae Petèr, “It's tha Loard, sae ït ïs!” Tha mïnit Simon Petèr heerd hïm say, “It's tha Loard,” he lapt hïs ooter claes roon hissel - fer he haed taen thaim aff fer fïshin - an he lep ïntae tha wattèr.

⁸ Tha ither follaers cum alang behin hïm ïn tha bóat, pu'in tha neyt fu o fïsh, fer the' wurnae faur frae shore, nae mair ner a hunnèr yairds.

⁹ Whaniver the' lannit, the' saa a fire o bleezin coals thonner wi fïsh on ït, an some breid.

¹⁰ Jesus saed til thaim, “Brïng some o thaim fïsh ye hae jist catched.”

¹¹ Simon Petèr climmed aboord an dregged tha neyt tae tha shore. It wus fu o bïg fïsh, a hunnèr an fïftie-thrie o thaim, but tha mair ït haed sae monie, ït wusnae tore.

¹² Jesus saed tae thaim, “Cum on an hae yer brekfast.” Nane o tha follaers dar ax hïm, “Wha ir ye?” The' knowed ït wus tha Loard.

¹³ Jesus cum, tuk tha breid an gien ït tae thaim, an he daen tha same wi tha fïsh.

¹⁴ Noo thïs wus tha thurd time Jesus haed appeart tae hïs follaers eftèr he wus ris frae tha deid.

Jesus pits Petèr bak ïn as tha heidyin

¹⁵ Whaniver the' wur daen aitin, Jesus saed tae Simon Petèr, “Simon, sinn o Jhone, dae ye love me mair ner aa these ither yins dae?” “Ay Loard,” qo he, “ye ken that A love ye.” Jesus saed, “Luk eftèr ma lambs.”

¹⁶ Agane Jesus saed, “Simon, sinn o Jhone, dae ye love me?” He answert, “Ay, Loard, ye ken that A love ye.” Jesus saed, “Tak guid care o ma sheep.”

¹⁷ Tha thurd time he saed til hïm, “Simon, sinn o Jhone, dae ye love me?” Petèr wus hurt that Jesus axt hïm tha thrie times, “Dae ye love me?” He saed, “Loard, ye ken iveriethin; ye ken that A love ye.” Jesus saed, “Luk eftèr ma sheep.

¹⁸ Noo here's tha truith o ït. Whan ye wur a young yin, ye püt yer ain claes on bi yersel an ye went whariver ye wantit; but whaniver ye'r oul got ye'll rax oot yer hans an some ither bodie wull pit yer claes on ye, an tak ye whar ye dïnnae want tae gang.”

¹⁹ Jesus saed that fer tae point oot tha wye Petèr wud dee, an hoo he wud brïng glorie tae God. An then he saed til hïm, “Follae me!”

²⁰ Petèr lukt ower hïs shoodèr an saa tha follaer that Jesus loved cumin eftèr thaim - tha yin that haed leant bak agin Jesus at tha supper an axt, “Loard, wha's gaun tae bethray ye?”

²¹ Whaniver Petèr saa that follaer, he axt, “Loard, whut aboot hïm?”

²² Jesus answert, “If A want hïm tae leeve richt up tae tha day A cum bak, whut's ït tae dae wi you? Jist you follae me.”

²³ On accoont o thïs, tha taak went roon tha brithers that thïs follaer wudnae dee. But Jesus niver saed that he wudnae dee; he jist saed, “If A want hïm tae leeve richt up tae tha day A cum bak, whut's ït tae dae wi you?”

²⁴ Thon follaer ïs tha yin that gies wutness tae aa these thïngs an writ thaim doon. We can be shair hïs testimonie ïs true.

²⁵ Jesus daen monie ither thïngs forbye. If iverie yin o thaim wus writ doon, A jalouse that even tha hale warl wudnae hae ruim eneuch fer aa tha buiks that wud be scrievit.