Jhone 10 - Tha Fower Gospels ïn Ulstèr-Scots 2021

Tha Shepherd an hïs flock

¹ “Noo here's tha truith o ït,” qo Jesus, “tha man that daesnae cum ïntae tha ree bi tha yett, tae get amang tha sheep, but spiels ïn bi some ither róad, ye can be shair he's a thief or a reiver.

² Tha man that cums ïn bi tha yett ïs tha hird o tha sheep.

³ Tha herd-han apens tha yett fer hïm, an tha sheep hear tha shepherd's voice. He caas hïs sheep bi name an leads thaim oot eftèr hïm.

⁴ Whaniver he haes brocht oot aa hïs ain sheep, he waaks aheid o thaim, an hïs sheep follae hïm, fer the' ken hïs voice.

⁵ The'll no follae a stranger but; na, the'll rin aff whan the' hear a voice the' dïnnae ken.”

⁶ Jesus gien thaim thïs pictèr tae pit ower hïs mainin, but the' dïdnae unnèrstan whut he wus taakin aboot.

⁷ Sae Jesus toul thaim yinst mair, “Here's tha truith o ït. A be tha yett fer tha sheep.

⁸ Aa thaim that cum afore me wus thiefs an reivers, but tha sheep tuk nae heed o thaim.

⁹ A be tha yett; hïm that cums ïn throu me wull be saved. He wull gang ïn an oot, an fin guid gress.

¹⁰ Tha thief jist cums fer tae wreck an rob an kïll; A hae cum that the' micht hae life, an hae ït ower an abain.

¹¹ A be tha guid shepherd. Tha guid shepherd gies hïs ain life fer tha sheep.

¹² Tha hired han ïs no tha shepherd, an he daesnae own tha sheep ether. Sae whan he sees a wolf cumin, he rins aff an leas thaim. An then tha wolf lays hoult o tha flock an skails ït.

¹³ Tha man rins awa, fer he ïs a hired han an he cares naethin fer tha sheep.

^14-15 A be tha guid shepherd; A ken ma sheep an ma sheep ken me - jist laik tha Faither kens me an A ken tha Faither - an A gie ma ain life fer tha sheep.

¹⁶ A hae ither sheep that daesnae belang tae thïs ree. A maun brïng thaim forbye. The'll tak heed o ma voice anaa, an thair wull be yin hirsle an yin shepherd.

¹⁷ Tha raison ma Faither loves me ïs thïs: A gie up ma ain life - jist fer tae tak ït bak agane.

¹⁸ Naebodie taks ït frae me, but A gie ït up o ma ain wull. A hae tha thortie tae gie ït up, an A hae tha thortie tae tak ït bak agane. Thïs ïs tha chairge A hae got frae ma Faither.”

¹⁹ Becas o whut he saed, tha Jews wur at odds wi yin anither yit agane.

²⁰ Monie o thaim saed, “He's bin tuk ower wi a divil, an he's haiverin! Whut wud ye lïsten tae hïm fer?”

²¹ But ithers saed, “Thon's no tha wurds o a man taen ower wi a divil. Cud a divil apen tha een o tha blin?”

Jesus says he's tha Sinn o God

^22-23 Roon cum tha Faist o Dedication. It wus wuntèrtim, an Jesus wus ïn tha Temple gruns, waakin alang unnèr Solomon's Airches.

²⁴ Tha Jews gethert roon Jesus, quïzzin hïm, “Hoo lang wull ye keep iz wunnèrin? We'r deein tae fin oot. If ye'r tha Christ, tell iz strecht!”

^25-26 Jesus reponed, “A hae aareadie toul ye, but yis dïnnae believe me. Tha warks A dae ïn ma Faither's name baks me up, but tha raison yis dïnnae believe me ïs that ye'r no ma sheep.

²⁷ Ma sheep hears ma caa; A ken thaim, an the' follae me.

²⁸ A gie thaim ayelastin life, an the' wull niver perish; naebodie can wheek thaim oot o ma han.

²⁹ Ma Faither, that gien thaim tae me, ïs ower ocht; naebodie can wheek thaim oot o ma Faither's han.

³⁰ Me an tha Faither ïs yin.”

³¹ Yinst mair tha Jews gethert stanes fer tae clod hïm.

³² But Jesus toul thaim, “A hae showed ye onie amoont o guid warks wrocht bi tha Faither. Whut yin o thaim ir ye stanein me fer?”

³³ “We'r no stanein ye fer ocht o thaim,” tha Jews reponed, “but fer blesphemie! You ir jist an ordinarie man, an yit ye mak yersel oot tae be God.”

³⁴ Jesus answert thaim, “Is ït no writ ïn yer ain Laa: ‘A hae toul ye, yis ir gods’?

^35-36 Noo, ïf he caad thaimins that tha wurd o God cum tae, ‘gods’ - an mine you, tha Scrïptures stan fer iver an aye - whut aboot tha yin that tha Faither set apairt as hïs verie ain an sent ïntae tha warl? A saed, ‘A be God's Sinn’, an fer that yis chairge me wi blesphemie?

³⁷ If A'm no daein tha thïngs ma Faither daes, then dïnnae believe me.

³⁸ But ïf A dae thaim, tha mair ye dïnnae believe whut A tell ye, jist believe whut tha warks thairsels tells ye. That wye yis'll unnèrstan fer shair that tha Faither ïs ïn me, an me ïn tha Faither.”

³⁹ Agane the' tried tae lay houl o hïm, but he gien thaim tha slip!

⁴⁰ Eftèr that, Jesus gaed bak ower tha Joardan tae tha place whar Jhone baptised at tha furst. He stapt thonner a wee while,

⁴¹ an monie fowk cum tae hïm. The' saed, “Fer aa that Jhone niver daen onie mïraclis signs, iveriethin Jhone saed aboot thïs man wus tha truith.”

⁴² An ïn thon place monie fowk püt thair faith ïn Jesus.