MAREKO 6 - Miriam Mer Gospels 1902

¹ E bakeam ab gedelam, a tabara ged ge tabarki; abara kaimeg giz abi irmili.

² Sabath ge, E ditimeda sunago ge ereuerem; gaire le asereda damreda, kega, Nagelam abele gaire dorge abi dog? nako pardali abi ikuar, ueakai gaire dorge adigir mokakalam abara tag ikeli?

³ Nako nole tonar le abele? nako nole Maria rauerem, Iakobo ra keimer, a Iose, a Iuda, a Simona? nako abara berbet nole meribi dog? uiaba abi derar.

⁴ Iesu uiabi daratagereda, kega, Nole perofeta ekekri, tepteb abara ged ge, a abara boai, a abara uteb ge.

⁵ E nole umer kak nerut adigir ikeli peike, abele dorge tepteb, abara tag gaire gim le dikmerik, a uiabi nadgirauem.

⁶ E au damreda uiabielam uatur kak. E bakeamuda deraueida abele gaire kebi uteb ge, a okadeskeda.

⁷ E tuelf le darabgerare, a ditimeda uiabi namarida neisi le a neisi le; a adigir uiabi nakuarare tumem gaire uite lamar;

⁸ E uiabi mer tigri, kega, Lu aisis kak abele bakeam, no koket tepteb; nolo epei kak, nole leuer kak, a nole mani kak muige uak;

⁹ A no teter gab ameare; a nole neis am uali ameare.

¹⁰ E uiabi daratagereda, kega, Uaba nerute meta ge badari, emri abele, a iako bakeauare.

¹¹ Uiaba le giz uabi agared kak, a nole uabi asor kak, uaba bakeam abele gedelam, sep ditkeda uaba teter gablam uiabi atamelam. Ageakar, kaka uabi detagereda, kega, Niaiem gerger itmer, kebi bodamalam Sodomaem a Gomoraem tumem abele ged ge.

¹² Uiaba bakeauda, a marau, kega, Mamor uaba gaire le obazegeda.

¹³ Gaire uit lamar uiaba namuda, a gaire gim le uiaba ide epaitered, a uiabi nadgirare.

¹⁴ Heroda opole asoli, abelelam abara nei ekoseli; E detager, kega, Ioane Bapataiso eded akaida eudelam, abelelam E gaire adigir ikeli.

¹⁵ Uader detager, kega, Elia pedali. Uader detager, kega, Perofeta pedali, abelelam E nerute perofeta mokakalam.

¹⁶ Heroda asoli, E detager, kega, Ioane pedali, karielam abara kerem derapeida, E eded akaida eudelam.

¹⁷ Emetu Heroda namarkare Ioane terpeirare, a abi didbare muige au dubare meta ge Herodialam, Filipo ra kosker abara narbet: abelelam E abi ispilu.

¹⁸ Abelelam Ioane Heroda detager, kega, Nole marim abkoreb mara narbet ra kosker ispida.

¹⁹ Abelelam Herodia Ioane urker, a E lagelag abi ipit; a nole umer kak;

²⁰ Abelelam Heroda Ioane geum, E opasereret Ioane barkak tonar, a zogo le, E abi asesereda. E abi asoli, a ikeli gaire dorge, a abi sererge asoli.

²¹ Gerger abkoreb tabarki, abele gerger Heroda eosmelu, E dersemer uiabim gaire opole giz, a gaire kole, a gaire tarim le Galilaia ge;

²² Herodia ra neur balu, a ginar diger, Heroda pako uiaba abi dog emri a sererge; opole neur detager, kega, Kari nautumer lu mara laglag, kaka mari nakuar.

²³ E abi mer nakesmulu detager, kega, Kaka mari nakuar gaire lu mama kari nautumer, mokakalam kara baselaia mog.

²⁴ E teosmeda, a abara apu detager, kega, Nalu kaka damos? Abara apu detager, kega, Ioane Bapataiso ra kerem.

²⁵ Sobkak E iako opole badari, a abi detager, kega, Kaka laglag mama mena kari nakuar Ioane Bapataiso ra kerem abele tanelu ge.

²⁶ Opole ra nerkep beber barki; epe E nole abi azer kak, abele mer akesmulam, a uiabielam abi dog bamer leuer eroare.

²⁷ Opole sobkak memeg le namarida, a abi mer tigri, kega, Abara kerem tegaret.

²⁸ E bakeamuda, a Ioane ra kerem derapeida muige au dubare meta ge, a abara kerem tegaret tanelu ge, a neur ikuar; a neur abara apu ikuar.

²⁹ Ioane ra kaimeg giz aserare, ui bakeuare, a abara gem tegardare, a ao ge ikedarare.

³⁰ Iesu ra kaimeg giz tabakeuare abim; a abim daratagerare gaire dorge uiaba ikelare, a uiaba ereuerem.

³¹ E uiabi detagereda, kega, Mi nabakeuare le kak utebem, ueakai ner nabazier. Abelelam gaire le uatupili, a nole uteb ko leuer ero.

³² Uiaba nar ge gumik atiem abele le kak utebem.

³³ Gaire le lakub dasmer uiaba atiem, gaire le abi opaserertem, a koreder ge abim gaire gedelam uridili, uiaba kekiam tabarki, a netat gedim abim.

³⁴ E bakeam a gaire le dasmerauem, a uiabi nasge, abelelam uiaba mokakalam mamoe giz nole le asesered kak; a E uiabi ditimeda ereuerem gaire lu dordor.

³⁵ Kikem, abara kaimeg giz abim tabakeuare, a detager, kega, Soge pur ike, a kikem:

³⁶ Uiabi namarkare gaire gedim, a gaire utebem, leuer arapem uiaba aroem; abelelam uiaba nole leuer kak.

³⁷ E uiabi detagereda, kega, Uaba uiabi leuer nakuarare. Uiaba abi detager, kega, Nako, keriba bakeuare leuer arapem tu handed denari ko bodomalam, ko uiabi asisiem?

³⁸ E uiabi detagereda, kega, Naket areto uabi dog? bakeam dasmer. Uiaba edali, a detager, kega, Faif, a neis lar.

³⁹ E uiabi mer tigri ko nosik bameri tumem abele golegole soge ge.

⁴⁰ Uiaba nosik bameri, uader uan handed nosik, uader fifeti nosik.

⁴¹ E emetu faif areto tais, a neisi lar, E kotor dimiruarti, a esoao, a areto itur; a abara kaimeg giz nakuarare uiaba opem idedi; E neisi lar ditker uiabim uridili.

⁴² Uiaba uridili leuer eroare, a kem osmeda.

⁴³ Uiaba leuer mog, a lar mog etakarare, epe tuelf epei osmeda.

⁴⁴ Mokakalam faif thausan gaire kimiar, areto eroare.

⁴⁵ E sobkak abara kaimeg giz elele daratirieda nar ge bartiri, ko atiem nerut apekem Bethesaida opem, abara dorge gaire le namarida.

⁴⁶ E emetu uiabi namarida, E paserem ogi esorerapare.

⁴⁷ Bakedilu abele kikem, nar eip karem ge, a Iesu tepteb geseb ge emrilu.

⁴⁸ E uiabi darasmerare uzelam sagim, abelelam uag opem uami; ki apek foa, E uiabim tabarki, zauber tum ge ekas; mokakalam E uiaba dege ekas.

⁴⁹ Uiaba abi erdali zauber tum ge ekas, uiaba dikiapor lamar pedali, epe uiaba au ereretikri;

⁵⁰ Abelelam ui uridili abi dasmer, epe uiaba geum. Sobkak E uiabi detagereda, kega, Saserimem; kai nali, nole geum kak.

⁵¹ E uiabim nar ge ekauererti; epe uag ekaida: uiaba abi au kase damereda.

⁵² Uiaba nole akiapor kak abele areto, abelelam uiaba nerkep kelarkelar.

⁵³ Uiaba emetu esaimeda atiem, uiaba tabarki Genesareta ged, a ged ge ekarida.

⁵⁴ Uiaba emetu ekarida narlam, sobkak uiabi abi opasereretem,

⁵⁵ A gedim kored deraueida, a ditimeda gim le giz bakuarda tumem sik, a kei tegardare abele uteb Iesu emri.

⁵⁶ Abele uteb, a ged, a gedub E tabarki, uiaba gaire gim le tegardare ugab ge ikedi, a abi damsare ko abara am uali dege ekpi; uiaba uridili abi ekpi nadgirauem.