Ioane 20 - Miriam Mer Gospels 1902

¹ Kekiam gerger sefen, Maria Magadalena tabakeam, bane ge, aoem, a baker dasmer, emetu adem aolam.

² E koreder emerilu, a Simona Peteruim tabarki, pako nerute memeg le Iesu nasge, a uiabi daratager, kega, Uiaba emetu Opole egaret aolam, keriba umer kak nade uiaba abi ikedi.

³ Peteru, pako abele nerute kaimeg osmelei, a bakeamulei aoem.

⁴ Ui koreder emerilei: nerute kaimeg Peteru esaimeda, a ao ge kekiam tabarki;

⁵ E diketilu, a uali dasmer ipe; E nole bao.

⁶ Simona Peteru ko tabarki, abi irmili, a ao ge balu; a uali lino dasmer ipe,

⁷ Pako mog uali abara kerem sopem, nole netate ipe kemem uali lino, tepteb ipe nerute uteb nole atarat kak.

⁸ Nerute kaimeg balu ko, abele le kekiam aoem tabarki, E ko dasmer, a oituli.

⁹ Uiaba nole akmer kak abele mer detali, kega, Abkoreb abim iako eded akaida eudelam.

¹⁰ Neisi kaimeg iako tabara uteb bakeamudariei.

¹¹ Maria tekue adige ao ge ezoli: E tegreamalu a ezoli, a dasmer muige abele ao ge;

¹² E neisi angela darasmer, zazer uali darame eder emrilei, nerute kerem ge, a nerute teter ge, abele uteb Iesu ra gem ikedilu.

¹³ Uiaba abi detager, kega, Kosker, nalugem mama ezoli? E uiabim detaut, kega, Abelelam uiaba kara Opole egareda, kaka umer kak abele uteb uiaba abi ikedarare.

¹⁴ Emetu abele detager, E egreamalu, a Iesu dasmer tekue, E nole umer kak Iesu pedali.

¹⁵ Iesu abi detaut, kega, Kosker, nalugem ma ezoli? ma niti deraimeri? E dikiapor E gedub paret arup le, E abi detaut, kega, Kole, ese mama abi egaret, kari natager abele uteb mama abi ikedi, ueakai kaka ko abi agaretelu.

¹⁶ Iesu abi detager, kega, Maria. E tegreamalu a abi detager, kega, Raboni: tonar, Ereue le.

¹⁷ Iesu abi detaut, kega, Nole kari atutir kak; abelelam kaka nole karba Babim ogi: bakeamulu uiabim kara keimer giz, a uiabi daratagerare, kega, Kaka Abem pako uaba Aba ogi, kara Ade a uaba Ade.

¹⁸ Maria Magadalena kei bakeamulu, a kaimeg giz daratagerare, kega, Kaka emetu Opole dasmer; pako tonar E emetu detager abele abim.

¹⁹ Ki ge abele gerger, kekiam gaire sefen, emetu demare gaire te abele uteb uiaba netate gedim, abelelam uiaba Iudaia le geum ge, Iesu tabakeamulu a eipu ekueilu, a uiabi detager, kega, Mapodan uabim.

²⁰ Emetu abele detager, E abara neisi tag a abara ber uiabi natomelu. Abara kaimeg giz sererge Opole dasmer.

²¹ Iesu iako uiabi detager, kega, Mapodon uabim: kaka uabi namarida mokakalam Baba kare namarida.

²² E emetu abele detager, E uiabim nerezi, a detager, kega, Lamar Zogo egaret:

²³ Abele gaire le la uit uaba ko emarik, abele ko uiabim emarik: abele uaba dekaer, abele ko dekaer.

²⁴ Toma, nerute tuelf lelam, nei atker Didumo, nole uiabi dog kerker Iesu tabarki.

²⁵ Kaimeg giz abi detager, kega, Keriba emetu Opole dasmer. E uiabim detaut, kega, Ese kaka nole dasmer sok tulik ziz abara neisi tag, a kara baur kei sok tulik ziz ge aziriklu, a kara tag abara ber ge aziriklu, kaka nole uatur kak.

²⁶ Gaire gerger eit iobaru, abara kaimeg giz muige meta, a Toma uiabim kemem. Gaire te emetu demare, Iesu batimedilu, a uiabim eipu ekueilu, a detager, kega, Mapodan uabim.

²⁷ E Toma detager, kega, Mabara baur kei tekau, a dasmer kara neisi tag; a mabara tag tekau, a kara ber ge aziriklu: ma nole uatur kak, debele oituli.

²⁸ Toma abi detaut, kega, Kara Opole, a kara Ade.

²⁹ Iesu abi detaut, kega, Toma ma oituli abelelam ma kari dasmer: uiaba uerkab le gaire le oituli, a nole asmer kak.

³⁰ Dordor atamelam Iesu ikelare opem abara kaimeg giz, a nole detali abele jauali ge:

³¹ Emetu abele gaire lu detali ueakai uaba dikiaporauem, kega, Iesu Keriso kar, Ade ra Uerem: ueakai uaba onatereda, uaba ko eded nagri abi neilam.