Zekaraya 9 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

A Cha vwẹ Ẹgborho rẹ kẹre na Guẹdjọ Epha

¹ Ota rẹ Ọrovwohwo ta kpahe otọ ri Hadrak ro she kpahe Damaskọs. Kidie Ọrovwohwo ri vwo irere rẹ Aram, kugbe uvwiẹ re Izrẹl ejobi;

² Ji te Ramat ro gbere ughwru na, Taya vẹ Saidọn, owenẹ ayen ghwanre dede.

³ Taya gba ogba yariẹ oma phihọ ọ ghwẹ idọnọ efuanfon koko kerẹ ubu, iro kerẹ ikueku rẹ irhuvwu na.

⁴ Ẹkẹvuọvo gbe nighe, Ọrovwohwo cha ghwẹ ekuakua rọye mie ro de do efe rọye phihọ abadi, erhanre a cha vwọ guọghọ.

⁵ Ashekelọn cha mrẹ udu ko bro, te Gaza, kọ gbune vwe evun rẹ oja; te Ekrọn fikiridie iphiẹrohọ rọye kpoghori. Ovie che ghwu nẹ Gaza, ihwo gbe cha dia Ashekelọni-i.

⁶ Ihwo ọguọgua cha dia Ashdọd, ki mi che fue eheri rẹ Filistia.

⁷ mi che si ọbara rọye nẹ unu rọye, si akon rọye nẹ ẹgua umuku ri chekọ ke dia Ọghẹnẹ rẹ avwanre; kọ họhọ oma vwi Juda, Ekrọn kọ họhọ ihwo ri Jebu.

⁸ Etiyin re ki mi muerhọn riarẹ-ẹ uwevwi mẹ kerẹ ọrhẹrotọ, rere ohwo ọvuọvo vwo jẹ yan cha yan kpo vwọ; ohwo gbi shenyẹ ayen ọfa-a, kidie Me vwẹ ibiẹro mẹ mrẹ re.

Ovie ri Zayọn rọ cha Re Vwobọ

⁹ Ghọghọ gangan, E ọmọtẹ ri Zayọn! Kperi gan, E ọmọtẹ ri Jerusalẹm! nighe, ovie wẹn bru uwe cha ohwo ro phi kparobọ rẹ omavwerha, dẹndẹn ọ gua ekẹtẹkẹtẹ, upene ọmọ rẹ ekẹtẹkẹtẹ.

¹⁰ Mi che si akpẹrẹ nẹ Ifrem kugbe iyesi rẹ ofovwi nẹ Jerusalẹm; e ji si umurhabọ rẹ ofovwi no, kọ ta nẹ ufuoma dia kẹ ẹgborho na ejobi; uvie rọye kọ nẹ abadi re te abadi, ji nẹ Urhie na re te oba rẹ akpọ na.

A Cha vwi Zayọn Rhivwi Rhe

¹¹ Je vwọ kẹ wẹ rhe, fiki re ọbara rẹ ọphọ Mẹ ri mi nene uwe re na, ki mi siobọ nẹ ighuvwu wẹn re hẹ ukpotọ ọyaya na kpo ọphẹ.

¹² Rhivwi kpo odjahọ wẹn, E ihwo re he uwodi ri iphiẹrohọ; nonẹ mi ghwoghwori nẹ mi ru ovwan akuava.

¹³ Mi wurhu Juda kerẹ umurhabọ Mẹ; Me da vwẹ Ifrem ru edada rọye. Mi dju emọ rẹ ovwan, E Zayọn, Me vwẹ emọ rẹ ovwan họnre emọ ri Gris. mi ru uwe họhọ ọlọkọ rẹ ọgbofovwi.

¹⁴ Etiyin Ọrovwohwo kọ cha vwẹ oma phia kẹ ayen odada rọye kọ yanran kerẹ enu rọ nyavwaro. Ọrovwohwo Ọghẹnẹ che hworo owanre na, ọ Me yan phia vwẹ odju rẹ ovwre re hẹ obọrhe ọnre.

¹⁵ Ọrovwohwo rẹ otuofovwi na cha sẹro rayen, ayen cha guọghọ ji chihi otu ri do ibieragha muotọ; ayen cha da ebara rayen kerẹ wain, evun Me vọn ayen kerẹ udjokpo rọ vọnre, rhuọrhuọ kerẹ orhoma rẹ agbada na.

¹⁶ Vwẹ ẹdẹ yena Ọrovwohwo Ọghẹnẹ rayen na che sivwi ayen kidie ayen igegede rẹ ihwo rọye, kerẹ irhu rẹ erhu rẹ ovie ayen che no vwẹ otọ rọye.

¹⁷ Ghine uyota, mavọ oyovwi te, mavọ o fẹro te! Emuọre cha nẹrhẹ imighene na rho, wain ọkpokpọ mi rhe ru emetẹ na rho.