Urhi Rivẹ 9 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ọrovwohwo cha guọghọ ẹgborho ri Kenan

¹ Nyo, E Izrẹl; wọ ra wan Jọdan vrẹn nonẹ na, ra ro evun rẹ ẹgborho re rho nọ wẹ re je gan nọ wẹ, irere na iride a je ogba riariẹ ayen re te enu,

² ihwo ride grogro, emọ rẹ Anakim, ihwo ro wẹ riẹnre, ihwo wo ji nyo ra ta kpahe nẹ, Ono se mudia vwẹ obaro rẹ ọmọ rẹ Anak?

³ Vwẹ ọtiọye na ko wọ riẹn nonẹ na, nẹ Ọrovwohwo Ọghẹnẹ wẹn na ohwo rọ wan vrẹn karo kẹ wẹ kerẹ erhanre rọ ghwọrọ; ọ cha ghwọrọ ayen, ọ cha vwẹ ayen totọ vwẹ obaro wẹn; eriyin wọ cha djẹ ayen phia, wo mi ru ayen re ghwọrọ phẹrẹkpẹ, kirobo rẹ Ọrovwohwo ta kẹ wẹ vẹrhe.

⁴ Wọ je ta vwẹ udu wẹ-ẹn, serẹ Ọrovwohwo Ọghẹnẹ wẹn da djẹ ayen nẹ obaro wẹn nu, nẹ, fọke rẹ ọvwata mẹ Ọrovwohwo vwọ reyọ ovwẹ rhi vwo yere otọ nana; ji fọke rẹ umwemwu rẹ ẹgborho nana Ọrovwohwo vwọ djẹ ayen phia nẹ obaro wẹn.

⁵ Ọ dia fiki rẹ ọvwata wẹn eyẹ ẹvun ẹfuọ wẹn wọ ra vwọ dia otọ na-a; ẹkẹvuọvo fiki rẹ umwemwu rẹ ẹgborho nana Ọrovwohwo Ọghẹnẹ wẹn vwọ djẹ ayen nẹ obaro wẹn, rere ọ mrasan ru ive ro veri kẹ esẹ rẹ ovwan na gba, kẹ Ebraham, kẹ Aizik, ki Jekọp.

⁶ Vwẹ ọtiọye na wọ Me riẹn nẹ, Ọrovwohwo Ọghẹnẹ wẹn na kẹ wẹ otọ esiri na dia vwi fiki rẹ ọvwata wẹ-ẹ, kidie wẹ ohwo rọ gan udu gangan.

Izrẹl gbe Ozighi vwi Horẹb

⁷ Karohọ, wo jo chọrọ owẹ ẹro-o, obo wọ nẹrhẹ Ọrovwohwo wẹn mu ophu vwẹ evun rẹ aghwa na, nẹ ẹdẹ ru wo vwo vrẹn nẹ otọ rẹ Ijipt rhe, rhi te etinẹ na, ọye wo vwo mu kpahe Ọrovwohwo na.

⁸ Eriyin wa nẹrhẹ Ọrovwohwo mu ophu vwẹ obi Horẹb, Ọrovwohwo de mu ophu kẹ ovwan nẹ ọye ghwọrọ ovwan.

⁹ Ọke mi vwo yeri kpenu rẹ ugbenu na ra reyọ ẹbẹre rẹ eragha na, kọye ẹbẹre rẹ eragha rẹ ọphọ rẹ Ọrovwohwo nene ovwan re na, Etiyin Me da dia enu rẹ ugbenu na ẹdẹ ujuvẹ vẹ ason ujuvẹ; Me re emu-u Me je da ame-e.

¹⁰ Ọrovwohwo da vwẹ ẹbẹre rẹ eragha ivẹ rẹ Ọghẹnẹ ọvo vwẹ obọ rọye si na kẹ vwẹ; esi phihọ ayen ọtiobo rẹ eta na ejobi epha e rẹ Ọrovwohwo nene ovwan ta vwẹ evun rẹ erhanre vwẹ ugbenu vwẹ ẹdẹ rẹ ukoko na.

¹¹ Ọ rhi vwo te oba rẹ ẹdẹ ujuvẹ vẹ ason ujuvẹ na re, Ọrovwohwo da vwẹ ẹbẹre rẹ eragha ivẹ rẹ olalọ na kẹ vwẹ, kọye ẹbẹre rẹ eragha rẹ ọphọ na.

¹² Ọrovwohwo ke ta kẹ vwẹ nẹ, Vrẹn, wo nẹ etinẹ yara phẹrẹkpẹ; kidie ihwo wo si nẹ Ijipt rhe na miovwo oma rayen; ayen kurhẹriẹ ruẹ akakọ nẹ idjerhe ri mi jiji kẹ ayen; ayen ma ema kẹ oma rayen.

¹³ Ọfa rọye Ọrovwohwo da je vuẹ vwẹ, nẹ, Me mrẹ ihwo nana, ji no, ihwo vẹ udu ọgangan;

¹⁴ ju vwe vwo, re Me ghwọrọ rayen, mi phoro odẹ rayen nẹ otọ rẹ ọnre na; re Me vwẹ owẹ ru ẹgborho rọ rho nọ ayen rọ je gan nọ ayen.

¹⁵ Ọye mi de kuoma rhẹriẹ wotọ nẹ ugbenu na rhe, ugbenu na herọ tua vẹ erhanre, Me yọnrọn ẹbẹre rẹ eragha ivẹ rẹ ọphọ na ivẹ na vwẹ abọ mẹ ivẹ.

¹⁶ Mi vwo ni, gbe nighe, we ghine ru umwemwu kpahe Ọrovwohwo Ọghẹnẹ rẹ ovwan na; wa ma ọmọ rẹ erhuẹn kẹ oma rẹ ovwan; phẹrẹphẹrẹ ọye we vwo kurhẹriẹ ọye we vwo kurhẹriẹ ruẹ akakọ nẹ idjerhe rẹ Ọrovwohwo jiji rọye kẹ ovwan,

¹⁷ Me da yọnrọn ẹbẹre rẹ eragha ivẹ na Me da vwẹ ayen phi otọ hwe vwẹ obaro rẹ ovwan,

¹⁸ Mi de shiguẹ totọ vwẹ aro rẹ Ọrovwohwo, kerẹ ọke rẹ ẹsosuọ yẹ, vwẹ ẹdẹ ujuvẹ vẹ ason ujuvẹ na; Me re emu-u Me je da ame-e; vwi fiki rẹ umwemwu rẹ ovwan ruru, we vwo ru chọ vwẹ obaro rẹ Ọrovwohwo, vwọ nẹrhẹ ophu muo.

¹⁹ Kidie udu ophu vẹ ivuemiovwo rhorhorho rẹ Ọrovwohwo kpahe ovwan na bru vwe nẹ Ọrovwohwo cha ghwọrọ ovwan. Ẹkẹvuọvo Ọrovwohwo ki ji nyo ọke yena rhe.

²⁰ Ọrovwohwo de mu ophu kpahe Erọn gangan nẹ ọye hwe; Me da rẹ fiki rọye vwẹ ọke ọvo na.

²¹ Me da reyọ imwemwu rẹ ovwan, ọmọ rẹ erhuẹn re wa mare na, Me da torhẹ vwẹ erhanre, mi de duvwo je nọ vworovworo, bẹsiẹ o rhi vwo hirhe phihọ ivwivwu, Me da ghwẹ ivwivwu na phihọ evun rẹ uto rọ djẹ nẹ ugbenu na chotọ.

²² Wa nẹrhẹ Ọrovwohwo mu ophu vwẹ obe Tabera, vẹ obe Masa, kugbe obe Kibrot-hataava.

²³ Ọke rẹ Ọrovwohwo vwo ji ovwan nẹ Kedesh-banẹa cha ọ vuẹ ovwan, nẹ, Yeri kpenu, ra reyọ ẹdia vwẹ otọ rẹ Me vwọ kẹ ovwan na, ọye wa da chọ urhi rẹ Ọrovwohwo Ọghẹnẹ rẹ ovwan na, we segbuyota ji nyo urhuru rọye-e.

²⁴ Nẹ ẹdẹ Me vwo riẹn ovwan rhe na, we mu kpahe Ọrovwohwo na gangan.

²⁵ Eriyin mi she teyọ otọ vwẹ obaro rẹ Ọrovwohwo na ẹdẹ ujuvẹ vẹ ason ujuvẹ mi shevwerhẹ otọ; fikiridie Ọrovwohwo tare nẹ, ọye ghwọrọ ovwan.

²⁶ Me nẹ ẹrhovwo kẹ Ọrovwohwo, nẹ, E Ọrovwohwo Ọghẹnẹ, wọ ghwọrọ ihwo wẹn vẹ ukuẹriọ wẹ-ẹn, e rẹ wọ vwẹ ọrho wẹn tan hirhe na, e re wọ vwẹ obọ gangan si nẹ Ijipt rhe na.

²⁷ Karohọ idibo wẹn, Ebraham, vẹ Aizik, kugbe Jekọp; wo nẹ udu ọgangan rẹ ihwo nana-a, wo nẹ orukuruku raye-en, wo ji nẹ umwemwu raye-en:

²⁸ otọ ru wo si ayen nurhe na da rhe ta nẹ, Fikirobo rẹ Ọrovwohwo sa reyọ ayen vwo te otọ ro veri kẹ ayen na-a na, kugbe fikirobo rọ vwọ jẹn ayen eghrẹ na, Ọ vwọ reyọ ayen phia re hwe vwẹ evun rẹ aghwa na.

²⁹ Dede na ihwo wẹn vẹ ukuẹriọ wẹn ayen ruẹọ, e re Wọ vwẹ ogangan Wẹn rode kugbe ugbobọ wẹn reyọ rhe na.