Urhi Rivẹ 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Izrẹl phi Ọg ri Bashan kua

¹ Kẹsiẹye avwanre ke rhẹriẹ oma yeri kpo idjerhe ri Bashan; Ọg, ovie ri Bashan, da rhe vwọ so avwanre, ọ vẹ ihwo rọye ejobi, rhi phi ofovwi vwẹ Edrei.

² Ọrovwohwo da vuẹ vwẹ, nẹ, Wọ dje oshọ-ọ rọye-e; kidie te ọye vẹ ihwo rọye ejobi, kugbe otọ rọye, Mi phiro phihọ obọ wẹn nure; wo che ruo kirobo wo ruẹ Sihọn ovie rẹ ihwo rẹ Amọr rọ dia Hẹshbọn na.

³ Etiyin na Ọrovwohwo Ọghẹnẹ rẹ avwanre de ghinẹ phi Ọg ovie ri Bashan na phihọ obọ rẹ avwanre te ọye vẹ ihwo rọye ejobi, avwanre de hwe bẹsiẹye rẹ ohwo ọvuọvo rhe chekọ kẹ-ẹ.

⁴ Ọke yena avwanre da reyọ irere rọye ejobi o vwo orere ọvuọvo rẹ avwanre jẹ ayen emie-e; irere ujorha, ubrakpọ rẹ Agọb soso rọ dia uvie rẹ Ọg vwi Bashan.

⁵ Enana ejobi irere ra gba ogba riariẹ te enu, te anurhoro, vẹ itehru, irere ra gba ogba riariẹ-ẹ ji buebu.

⁶ Avwanre da ghwọrọ orere korere rẹ ihwo dia ejobi, kugbe eshare, vẹ eya te imitete ejobi.

⁷ Ẹkẹvuọvo avwanre da ghwẹ eranvwe na ejobi, vẹ imu rayen reyọ kẹ oma rẹ avwanre.

⁸ Ọke yena avwanre da reyọ otọ na nẹ obọ rẹ Ivie ivẹ rẹ ihwo rẹ Amọr na, e re obovrẹn ri Jọdan, nẹ iyara rẹ Anọn re te ugbenu ri Hammọn;

⁹ (ihwo ri Saidọn se Hammọn Siriọn, yẹ ihwo rẹ Amọr se Sinir;)

¹⁰ irere rẹ otọ ro shaton na ejobi, kugbe Giliad na ejobi, vi Bashan ejobi, re te Saleka vẹ Edrei, irere re uvie rẹ Ọg vwi Bashan.

¹¹ (Kidie Ọg ovie ri Bashan na ọvo chekọ vwi Rifem; nighe, ehwa rọye ehwa rẹ utehru; ehwa na rha hẹ Raba rẹ ihwo rẹ Ammọn? ugrogro rọye kubit irhiri, ohẹhẹre rọye kubit ẹne, kirobo rẹ ichihi rẹ ohwo epha?

Reubẹn, Gad, vẹ Ẹbẹre ẹvo ri Manasse Muerhọn hẹ obaro ọnre ri Jọdan

¹² Otọ nana avwanre reyọre vwo ru asan ra dia vwẹ ọke yena; nẹ Aroer, rọ akakọ rẹ iyara rẹ Anọn na, kugbe abọvo rẹ orere rẹ ugbenu ri Giliad na, vẹ irere re herọ ejobi, Me vwọ kẹ ihwo ri Reubẹn vẹ ihwo ri Gad;

¹³ abọ ri Giliad ro chekọ, vi Bashan rẹ uvie rẹ Ọg ejobi, Me vwọ kẹ abọvo rẹ orua ri Manasse; ubrakpọ rẹ Agọb ejobi, tobọ Bashan ejobi (Ọ re ji se otọ ri Rifem.

¹⁴ Jaia rẹ ohwo ti Manasse da reyọ otọ rẹ Agọb ejobi, kọye, Bashan, re te ughwru rẹ ihwo ri Geshuo vẹ ihwo ri Meakat; ọ da vwẹ odoma rọye Bashan-havot vwo se ayen, rhi te nonẹ na).

¹⁵ Me da vwi Giliad kẹ Makia,

¹⁶ te ihwo ri Reubẹn vẹ ihwo ri Gad Me vwẹ Giliad kẹ re te iyara rẹ Anọn, uherevie rẹ iyara na, kugbe ughwru rọ herọ ejobi re te urhie ri Jabọk, rọ dia ughwru rẹ emọ rẹ Ammọn;

¹⁷ ji te Araba, kugbe Jọdan vẹ ughere rọye, nẹ Kinẹrẹt re te urhie rẹ Araba na, Abadi rẹ Ughweraka na, obotọ rẹ ọghwrọrọ ri Pisga, vwẹ obaro ọnre.

¹⁸ Mi de ji iji kẹ ovwan vwẹ ọke yena, nẹ, Ọrovwohwo rẹ Ọghẹnẹ rẹ ovwan na vwẹ otọ nana kẹ ovwan nẹ ovwan dia nure; egba rẹ ovwan cha ghwẹ ekuakua rẹ ofovwi phihọ oma wan vrẹn obaro rẹ imoni rẹ ovwan ihwo rẹ Izrẹl.

¹⁹ Ẹkẹvuọvo eya rẹ ovwan, vẹ imitete rẹ ovwan, kugbe eranvwe rẹ ovwan, (Me riẹnre nẹ we vwo eranvwe buebu) ke dia evun rẹ irere rẹ Me kẹ ovwan na;

²⁰ bẹsiẹye rẹ Ọrovwohwo vwọ kẹ imoni rẹ ovwan omerovwo, ọtiobo ra kẹ ovwan na rere ayen ji dia otọ rẹ Ọrovwohwo Ọghẹnẹ rẹ ovwan na vwọ kẹ ayen vwẹ ovrẹn ri Jọdan; kẹsiẹye re ovwan dohwo dẹdia rọye ki rhivwi ra, ẹdia ra kẹ ovwan na.

²¹ Mi ki ji iji kẹ Joshua vwẹ ọke yena nẹ, Ẹro wẹn mrẹ obo rẹ Ọrovwohwo Ọghẹnẹ rẹ ovwan ru uvie ejobi rẹ ovwan cha wanvrẹn na; ọtiọye Ọrovwohwo ji ru kẹ ivie rẹ ovwan re cha wanvrẹn na.

²² Wa djẹ oshọ raye-en kidie Ọrovwohwo Ọghẹnẹ rẹ ovwan na, ọye re họnra kẹ ovwan.

Arhọvwere nẹ Mosis ruẹ Kenani-i

²³ Me da rẹ Ọrovwohwo vwẹ ọke yena, nẹ,

²⁴ E Ọrovwohwo Ọghẹnẹ, wo mu ọrho wẹn vẹ obọ ọgangan wẹn phihọ e djẹ kẹ odibo wẹn; didi ẹdjọ vwẹ odjuvwu eyẹ akpọ na ro se ru oghẹre rẹ iruo wẹn ride nana?

²⁵ Me rẹ wẹ, ju vwe wanvrẹn ra mrẹ otọ esiri rọ hẹ ovrẹn ri Jọdan na, ugbenu esiri yena, kugbe Lẹbanọn na.

²⁶ Ẹkẹvuọvo Ọrovwohwo de mu ophu kpahe ovwẹ fiki rẹ ovwan, ọ gbe kerhọn mẹ-ẹ; Ọrovwohwo ke vuẹ vwẹ, nẹ, Ọ te kẹ wẹ, re, wọ gbe ta ota nana kẹ vwẹ ọfa-a.

²⁷ Yeri kpo enu ri Pisga, wọ kpare opharo wẹn kpenu re ni obuko ọnre, vẹ obọhwẹre ọnre vẹ obọrhe ọnre kugbe obaro ọnre, re wọ vwẹ ẹro wẹn mrẹ; kidie wọ cha wan Jọdan nana vrẹ-ẹn.

²⁸ Ẹkẹvuọvo ji iji ki Joshua, phi udu phihọ awọ, wo ruoma gan; kidie ọye cha wan aro rẹ ihwo na vrẹn ọ Me nẹrhẹ ayen riuku rẹ otọ wọ cha mrẹ na.

²⁹ Eriyin na avwanre da dia evun rẹ iyara ro hirhe aro ku Bẹtpeọr na.