Urhi Rivẹ 1 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Mosis rhoma keri ive rẹ Ọrovwohwo kẹ Izrẹl vwi Horẹb

¹ Enana eta ri Mosis ta kẹ ihwo rẹ Izrẹl ejobi vwẹ abọ oboyi ri Jọdan vwẹ evun rẹ aton na, vwẹ Araba ro hirhe aro ku Sọf, vwẹ uherevie ri Paran, vi Tofẹl, vi Leban, vẹ Hazerọt kugbe Dizabab.

² Nẹ Hotẹb re te Kedesh-banea da dia oyan rẹ ẹdẹ uhwọvo siẹ ra da wan Ọ rẹ ugbenu ri Sia.

³ Ro rhi vwo te ẹgbukpe ujuvẹ, vwẹ ẹdẹ rẹ ẹsosuọ rẹ emeranvwe uhwọvo rọye re, Mosis da ta ota kẹ ihwo rẹ Izrẹl, kerẹ obo rẹ Ọrovwohwo ji iji kẹ nẹ Ọ vuẹ ayen,

⁴ ro vwo phi Saihọn ovie rẹ Amọr kuanu, ohwo rọ dia Heshbọn, kugbe ọg, ovie ri Bashan, ro dia Ashtarọt, rẹ Edrei;

⁵ vwẹ ovrẹn ri Jọdan vwẹ otọ ri Moab, Mosis de mu urhi nana phihọ eghwoghwo, nẹ

⁶ Ọrovwohwo Ọghẹnẹ rẹ avwanre ta kẹ avwanre vwi Horẹb, nẹ, Wa dia ugbenu nana rere;

⁷ wa rhẹriẹ oma re we mu oyan rẹ ovwan phihọ, re wo kpo ugbenu rẹ Amọr vẹ asan kasan rọ kẹrẹ ejobi, vwẹ Araba, vwẹ evun rẹ ugbenu na, vẹ iyara na, vi Nẹgẹb, kugbe orhoma rẹ abadi, re hẹ otọ rẹ ihwo ri Kenan, vi Lẹbanọn, re te urhie rode na, urhie ri Yufretis.

⁸ Nighe, mi phi otọ rẹ Ọrovwohwo ve kẹ esẹ rẹ ovwan, kẹ Ebraham, Aizik, kugbe Jekọp, nẹ ọye vwọ kẹ ayen vẹ emọ rẹ ayen che vwiẹ.

Iguẹdjọ re vwo mu

⁹ Me ta kẹ ovwan vwẹ ọke yena ne, Mẹvwẹ ọvo sa ghwa oghwa rẹ ovwa-an;

¹⁰ Ọrovwohwo, Ọghẹnẹ rẹ ovwan ru ovwan bu phihọ, nighe, nonẹ na, ovwan buru kerẹ isio re obenu,

¹¹ Ọrovwohwo Ọghẹnẹ rẹ esẹ rẹ ovwan ru ovwan bu phihọ abọ uriori vrẹn obo re ovwan bute vẹrhe, o bruba kẹ ovwan, ọtiobo ro veri kẹ ovwan na!

¹² Mavọ mẹvwẹ ọvo ru ghwa oghwa ọhọhọ vẹ ohọnre rẹ ovwan na?

¹³ Sanọ eshare ri vwo ẹghwanre, vẹ ẹriẹn kugbe evughe, vwẹ asan rẹ uvwiẹ rẹ ovwan teri, rere Me vwẹ ayen mu isun kẹ ovwan.

¹⁴ Wa da kpahe kẹ vwẹ nẹ, Emu wọ ta kẹ avwanre fobo ri Me ru.

¹⁵ Ọtiọye Me da reyọ ihwo ri vwo uyovwi vwẹ uvwiẹ rẹ ovwan, re dia ihwo re ghwanre, re je riẹn, vwo mu isun kẹ ovwan, re dia isun rẹ uriori, vẹ isun rẹ ujori, vẹ isun rẹ ujuvẹ gbe ihwe, kugbe isun rẹ ihwe, kugbe inotu, ọtiobo rẹ uvwiẹ rẹ ovwan epha.

¹⁶ Mi de ji iji kẹ ibrorhiẹ rẹ ovwan vwẹ ọke yena, nẹ, Wa Me kerhọn rẹ iguegun re herọ vwẹ uherevie rẹ imoni rẹ ovwan, we brorhiẹ rẹ esiri rẹ ohwo vẹ omoni rọye, eyẹ ọrhorha rọ vẹ ọye gba dia.

¹⁷ We nẹ opharo rẹ ohwo brorhiẹ-ẹ; wa Me kerhọn rẹ ihwo irere vẹ ihwo ride abavo; wa djẹ oshọ rẹ opharo rẹ ohwo-o; kidie orhiebro ọ rẹ Ọghẹnẹ; ẹdjọ rọ bẹ ovwan ebro ovwan vwo rhe vwe, rere mi nyo.

¹⁸ Obo rẹ ovwan ru ejobi mi ji iji rọye kẹ ovwan vwẹ ọke yena.

E ji Ihwo re Dọrhẹ rẹ Otọ na vwi Kadẹsh-banea

¹⁹ Avwanre da yan nẹ Horẹb, wan vrẹn aton rode ro mu oshọ na, ọ rẹ ovwan mrẹre na, wan idjerhe na re te ugbenu rẹ ihwo rẹ Amọr, kirobo rẹ Ọrovwohwo Ọghẹnẹ rẹ avwanre ji iji kẹ avwanre; avwanre de rhi te Kedesh-banea.

²⁰ Me da ta kẹ ovwan nẹ, We te ugbenu rẹ ihwo rẹ Amọr re, ọ rẹ Ọrovwohwo Ọghẹnẹ re avwanre vwọ kẹ avwanre na.

²¹ Nighe, Ọrovwohwo Ọghẹnẹ rẹ ovwan na phi otọ na phihọ obaro rẹ ovwan re; wa gba ra re wa ra reyọ, kirobo rẹ Ọrovwohwo Ọghẹnẹ rẹ esẹ rẹ ovwan ta kẹ ovwan; wa djẹ oshọ-ọ we brudu-u.

²² Ovwan ohwo ọvuọvo de si kẹrẹ ovwẹ, tanẹ, Jẹn avwanre ji ihwo karo rere ayen re ni otọ na kẹ avwanre re ayen rhivwi cha ayen vuẹ avwanre idjerhe rẹ avwanre wan vẹ irere rẹ avwanre che te.

²³ Emu na de je vwe gangan; Me da reyọ eshare ihwivẹ vwẹ uherevie rẹ ovwan, ọshare ọvuọvo nẹ uvwiẹ ọvuọvo rhe;

²⁴ ayen de kuoma rhẹriẹ yeri kpo orho rẹ ugbenu na, rhi te iyara rẹ Ẹshkol, ayen da fuẹrẹ,

²⁵ ayen da vwẹ abọ rayen reyọ ekakọn rẹ otọ na, ayen da ghwa ayen rhe avwanre, rhe ta kẹ avwanre, nẹ, Otọ rẹ Ọrovwohwo Ọghẹnẹ rẹ avwanre vwọ kẹ avwanre na omamọ rẹ otọ.

²⁶ Dede na avwanre rhọvwe ra-a, wa da chọ urhi rẹ Ọrovwohwo Ọghẹnẹ rẹ ovwan;

²⁷ kọye ovwan de wrẹn vwẹ evun rẹ itughẹ rẹ ovwan, nẹ, Fiki rẹ obo rẹ Ọrovwohwo vwo mu kpahe avwanre, o vwo si avwanre nẹ otọ rẹ Ijipt rhe, rhi phi avwanre phihọ abọ rẹ ihwo rẹ Amọr, re ghwọrọ avwanre.

²⁸ Bovọ avwanre fọke yere ra na? Imoni rẹ avwanre da nẹrhẹ udu rẹ avwanre hra vwẹ evun rẹ avwanre, nẹ, ihwo na rhoro i ji gro wan avwanre; irere na erhuarho a ke je gba ogba yariẹ ayen phihọ re te enu; yẹ avwanre je mrẹ emọ rẹ Anakim vwẹ Etiyin.

²⁹ Kẹsiẹye Me ke ta kẹ ovwan nẹ, We guegue-e, we bru udu raye-en.

³⁰ Ọrovwohwo Ọghẹnẹ rọ karo kẹ ovwan na, cha họnre kẹ ovwan, kirobo ro ru kẹ ovwan vwẹ otọ te Ijipt vwẹ aro rẹ ovwan na;

³¹ kugbe evun rẹ aton, asan rẹ ovwan da mrẹ obo rẹ Ọrovwohwo Ọghẹnẹ rẹ ovwan na ghwa ovwan te, kirobo rẹ ọshare ghwa ọmọ rọye rẹ ọshare, vwẹ asan kasan rẹ ovwan rare ejobi, bẹsiẹye rẹ ovwan rhi vwo te etinẹ.

³² Dede na ovwan se Ọrovwohwo Ọghẹnẹ rẹ ovwan na gbuyota vwẹ evun rẹ emu nana-a,

³³ ohwo ro karo kẹ ovwan vwẹ idjerhe na, rere Ọ guọnọ asan rẹ ovwan bọn itughẹ phihọ kẹ ovwan, vwẹ evun rẹ erhanre vwẹ ason vwo dje idjerhe rẹ ovwan wan kẹ ovwan, uvo kẹ egho.

Ọghẹnẹ Hwe Izrẹl

³⁴ Ọrovwohwo vwo nyo urhuru rẹ eta rẹ ovwan, ophu de muo ọ de ve, tanẹ,

³⁵ Omuẹro, ọvuọvo rẹ ihwo vẹ edje umwemwu nana na ro se te otọ esiri ri mi veri nẹ Me vwọ kẹ esẹ rẹ ovwan na herọ-ọ.

³⁶ jokpa ri Kalẹb ọmọ ri Jẹfunẹ, ọye Me cha vwẹ otọ ro chiri na kẹ jite emọ rọye rhe; fikiridie ọye nabọ nene Ọrovwohwo!

³⁷ Ọtiọye rhe Ọrovwohwo ji mu ophu kpahe ovwẹ fiki rẹ ovwan, tanẹ, Wọ je sa ruẹ Etiyin na-a;

³⁸ Joshua ọmọ ri Nun, ro mudia obaro wẹn na ọye cha ruẹ Etiyin na; wọ phi udu phihọ awọ; kidie ọye che ru Izrẹl riuku rọye.

³⁹ Dede na imitete rẹ ovwan, rẹ ovwan tare nẹ e che muẹro na, kugbe emọ rẹ ovwan re riẹn erhuvwu eyẹ umiovwo nonẹ-ẹ na, eye ri che yere otọ na, ayen Me cha vwọ kẹ, ayen che yere

⁴⁰ Ẹkẹvuọvo ovwan ke rhẹriẹ oma, re ovwan mu oyan rẹ ovwan phihọ kpo evun rẹ aton wan idjerhe rẹ Abadi Ọvwavware na.

Ephi Izrẹl kparobọ vwi Họrmah

⁴¹ Ovwan da kpahe ta kẹ vwẹ nẹ, Avwanre ru umwemwu kpahe Ọrovwohwo, avwanre ra họnre, kirobo rẹ Ọrovwohwo Ọghẹnẹ ji iji kẹ avwanre na ejobi. Dohwo dekuakua rẹ ofovwi rọye da ghwẹhọ, ayen de roro nẹ e se yeri kpo orere rẹ ugbenu na.

⁴² Ọrovwohwo da ta kẹ vwẹ nẹ, Ta kẹ ayen nẹ, Ayen yere kpo enu-u, ayen je họnra-a, kidie Me hẹ uherevie rẹ ovwa-a ivwighrẹ rẹ ovwan de rhe phi ovwan kparobọ.

⁴³ Me da vuẹ ovwan, wa kerhọ-ọn; ẹkẹvuọvo wa da chọ urhi rẹ Ọrovwohwo vwẹ eheri yeri kpo enu rẹ ugbenu na.

⁴⁴ Ọye rẹ ihwo rẹ Amọr re dia ugbenu na de rhi she rhurhu ovwan, ayen da djẹ ovwan, kirobo rẹ enyọ ghwe rhurhu ohwo, ayen de hwe ovwan toto vwi Sia re te Họrmah.

⁴⁵ Ovwan de rhivwi rhe viẹ vwẹ obaro rẹ Ọrovwohwo; ẹkẹvuọvo Ọrovwohwo rha kerhọ rẹ oviẹ rẹ ovwa-an, o nyo kẹ ovwa-an.

⁴⁶ Ọ da nẹrhẹ ovwan dia evun ri Kadẹsh ẹdẹ buebu, kerẹ uchẹdẹ rẹ ovwan dia oboyi te.