Solomon 8 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ E manẹ wọ dia kerẹ oniọvo kẹ vwẹ, Ọ ro ji vievie re oni mẹ, Me da vwa wẹ vwẹ otafe, ke mia fiọnfiọn owẹ unu, Ohwo ọvuọvo a sa jẹ vwẹ fia-a.

² Ki mi sun we, ke me reyọ owẹ kpo uwevwi rẹ oni mẹ, kpo obo uvun rẹ ohwo rọ mrevun mẹ. Me vwẹ omamọ re udi ro gbo ọnrhe egẹn kẹ wẹ da ame ri pomegranate mẹ.

³ E manẹ obọhwẹre nana sa dia obotọ rẹ uyovwi mẹ vwonẹ rọ da ghwẹ obọrhe rọye kpahe ovwẹ.

⁴ Mi ju we riẹn, E emetẹ ri Jerusalẹm, ne wọ rhariẹ-ẹ eye wọ nẹrhẹ urhuru rẹ ẹguọnọ siohwo-o bẹsiẹ ro vwo nwe.

Ẹguọnọ pha Gangan kerẹ ughwu

⁵ Oyono re yan nẹ evun rẹ aghwa na cha na, Rọ vwẹ oma rẹrẹ ọnse rọye na? Vwẹ obotọ rẹ orhomrẹ na me da rhọvwọ owẹ. Etiyin oni wẹn da chuvwiẹ wẹ, Etiyin ohwo ro vwiẹ wẹ na da chuvwiẹ.

⁶ Gbe ku vwe kerẹ isa phihọ udu wẹn, gba gba vwẹ mu obọ kerẹ evwarha; kidie ẹguọnọ pha gangan kerẹ ughwu; omẹriọ pha brabra kerẹ ushi. O muẹ la kerẹ erhanre, ogidi erhanre rode gangan.

⁷ Urhie rẹ ame se furhie ẹguọnọ-ọ, eyẹ oghwe se sio divwẹ-ẹ. O da dianẹ ohwo de ze izobo kẹ ẹguọnọ. Efe rẹ uwevwi rọye ejobi kẹ ehwẹjẹ.

⁸ Avwanre vwo Ọniọvo rẹ ọmọtẹ otete, ọ je kpọghọ ivie-e kidie avwanre che ru kẹ oniọvo re avwanre na, vwe ẹdẹ ra da cha ta ota kpahọ na?

⁹ O da dianẹ ke igbẹhẹ o ruẹ, ke avwanre bọn igbẹhẹ rẹ ofovwi rẹ idọnọ efuanfon phihọ; ẹkẹvuọvo ke ẹchẹ o ruẹ, kẹ ephapha rẹ igedu a vwọ karọ.

¹⁰ Mẹvwẹ igbẹhẹ jovwo, ivie mẹ de mudia kerẹ ohẹrhẹ, ke me epha vwẹ ẹro rọye kerẹ ohwo rọ ghwa ufuoma cha.

¹¹ Solomọn de vwo udju ri vain vwi Baalhamọn, ihwo da yarọ mie; osa ra hwa phihọ ibi rọye da dia isene efuanfon uriori.

¹² Udju ri vain mẹ na, ọ rọ obọ mẹ, ekpuyovwi mẹ ri vworo. Wẹ, E Solomọn, wo se vwo uriori na, ihwo re yare udju na ke rha uri.

¹³ E wẹ rọ dia evun rẹ idju na, Otu mẹ ra kerhọn rẹ urhuru wẹn, gbe jẹn uvwe nyo

¹⁴ Jọ phẹre, ọnse mẹ, ru wọ dia kerẹ orhua, eyẹ upene re odẹ vwẹ enu re ugbenu ro gbo ọnrhe rẹ egẹn.