Solomon 5 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Mi de rhi te ogba mẹ, oniọvo mẹ, ọpha mẹ, Me da ghwẹ egẹn mẹ vẹ ugboduma mẹ, Me da vwẹ ọnyọn mẹ rẹ evwavwa mẹ? Me da vwẹ ame rẹ ivie da udi mẹ Re E igbeyan, re wọ da; Da udi vọn oma, E ense mẹ.

Omaevwerhe rẹ Orọvwe rọ Fanre

² Me vwerhẹre, ẹkẹvuọvo udu mẹ da rhọvwọ. kerhọn! ọnse mẹ ro je vwe re hworo ẹchẹ. Rhie kẹ vwẹ, oniọvo mẹ, ọnse mẹ, ilekuku mẹ, ọvuọvo mẹ rọ gbare, kidie uyovwi mẹ kpọrhọre vẹ irho, osusu mẹ vẹ irho rẹ ason.

³ Mi ku ewun mẹ nu, komavọ mi vwo se kuo phihọ? Me hworhẹ awọ mẹ nure, komavọ me rha vwẹ ayen gbe otọ?

⁴ Ọnse mẹ ro je vwe, da vwẹ obọ hworo ẹchẹ, oma ko mu vwe sanvwa vwẹ evun mẹ.

⁵ Mi de vrẹn ri mi rhie ẹchẹ kẹ ọ ro je vwe, abọ mẹ ki bo she vẹ adjija, irhiabọ mẹ da kpọrhọ vẹ ame rẹ adjija na, re me vwọ ghwabọ kpahe usiaphrẹ na.

⁶ Mi de rhie ẹchẹ kẹ ọ ro je vwe na, ẹkẹvuọvo ọ ro je vwe na chuko ku ọ da yanran. Udu de nu uvwe awọ rọ vwọ ta ota na, Me guọnerọ, ẹkẹvuọvo me rha mrẹ-ẹ, Mi sere, ẹkẹvuọvo ọ kpahe ota-a.

⁷ Erhẹrotọ na da mrẹ vwẹ, re ayen vwọ yan vwẹ evun rẹ orere, Ayen de hwe vwe, ayen da wan vwẹ oma, Ayen da ghwiẹ ewun mẹ reyọ, otu re rhẹrẹ igbẹhẹ yena.

⁸ Mi ju we riẹn, E emetẹ ri Jerusalẹm, ọ da dianẹ wọ mrẹ ọ ro je vwe na, gba ta kẹ nẹ urhuru rọye si vwe

Ọpha na jiri Ọshare rẹ Ọpha na

⁹ Die ọ ro je vwe na rhe vwo yovwi nọ ọfa, E ọ ro me yovwi vwẹ ohri rẹ eya? Die ọ ro je vwe na rhe vwo yovwi nọ efa, ru wọ vwi fiki rọye je avwanre riẹn?

¹⁰ Ọ ro je vwe na pha lukuluku wrowro, e vughe vwẹ asan rẹ uriori ihwe epha.

¹¹ Oro ro me yovwi uyovwi rọye a da mrẹ; igo rẹ uyovwi rọye pha pae, biebi kọe kerẹ ọkan udẹ.

¹² Ẹro rọye pha kerẹ ilekuku rọ rhan mu asan ogbugbu rẹ ame, rọ vwẹ ame rẹ ivie họ, rọ nabọ ghwẹ phihọ.

¹³ Egban rọye kerẹ ekru re egẹn, ro gbo phaphapha. Ẹbẹrunu rọye epha kerẹ ododo ro bo ame rẹ adjija.

¹⁴ Ọ gba igbabọ re oro phihọ, kugbe evwarha ra gba phihọ Ugboma rọye kerẹ ekoeni, Ọ da gba ivie phihọ.

¹⁵ Awọ rọye da họhọ ọgọ rẹ ishani, re mu kpahe usikẹ rẹ oro Erhuvwu rọye kerẹ Lebanọn, yoyovwi kerẹ igẹdu

¹⁶ Ota rọye miẹmiẹ, o di muẹ ohwo jẹ. Ọnana ọ ro je vwe na, Ọnana ugbeyan mẹ, E emetẹ ri Jerusalẹm.