Ọbe ri Pọl si rhe Ihwo ri Rom 9 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ẹsanọ rẹ Ọghẹnẹ sanọ Izrẹl

¹ Me ta uyota vwẹ evun ri Kristi, me vwọnrọn efia-an; kidie udu mẹ se oseri kẹ vwẹ vwẹ evun rẹ Erhi Ọfuanfon,

² nẹ osọnọ rẹ ivun emiovwo vọn udu mẹ.

³ Kidie me tobo guọnọ nẹ a harhe ovwẹ ekan re a hẹriẹ ovwẹ nẹ oma ri Kristi fiki rẹ imoni mẹ, ihwo mẹ Izrẹl.

⁴ Ayen hẹ ihwo rẹ Izrẹl, ayen e se emọ, ayen vwo urinrin, vẹ ọphọ, ayen a vwẹ urhi na kẹ, vẹ ẹga, kugbe ive na;

⁵ ayen a vwẹ esẹ ride na kẹ, uvwiẹ rayen, vwẹ ọ rẹ ugboma, kọye Kristi nurhe. Ọghẹnẹ rọ hẹ enu rẹ ayen ejobi ọye ebruba kẹ bẹdẹ. Isẹ.

⁶ Ọ dianẹ kẹ ota rẹ Ọghẹnẹ je ruo gba-a. Kidie ọ dia ihwo ejobi ri nẹ uvwiẹ rẹ Izrẹl rhe hẹ ihwo rẹ Izrẹli-i,

⁷ ọ je dia ayen ejobi hẹ emọ rẹ Ebrahamu-u fiki robo rẹ ayen vwọ dia uvwiẹ rọye-e; ẹkẹvuọvo vwẹ oma rẹ Aizik a wan se odẹ rẹ uvwiẹ wẹn.

⁸ Kọye ọ dia emọ rẹ ugboma na hẹ emọ rẹ Ọghẹnẹ-ẹ, ẹkẹvuọvo emọ rẹ ive na eye e keri phihọ uvwiẹ kẹ.

⁹ Kidie ọna hẹ ota rẹ ive na, Vwẹ ọtiẹ ọke ọtiọna ki mi che rhivwi rhe, Sera ko che vwiẹ ọmọ.

¹⁰ O je dia ọtiọye ọvo-o, Rebeka je mrevun kẹ ohwo ọvo, ọsẹ rẹ avwanre Aizik,

¹¹ dede na ye ji vwiẹ aye-en re ji vughe erhuvwu vẹ obrabra raye-en, rere idjerhe rẹ Ọghẹnẹ vwọ sanọ ihwo vwo mudia, ọ dia fiki rẹ iruo-o ẹkẹvuọvo fiki rẹ use rọye,

¹² a da ta kẹ oni rayen nẹ, ọ rẹ okpako cha ga ọ rẹ otete.

¹³ Kirobo re siro, Ivun ri Jekọp vwerhe ovwẹ, ẹkẹvuọvo oma rẹ Isọ tuvwe.

¹⁴ Kidie avwanre rha ta? Kẹ Ọghẹnẹ ru chọ? Kaka vwo!

¹⁵ Kidie ọ ta kẹ Mosis, Mi ni arodọvwẹ kẹ ohwo rẹ arodọvwẹ fori, me rha re ehrọre kẹ ohwo rẹ ehrọre fori.

¹⁶ Vwẹ ọtiọye na ọ dianẹ kẹ obo rẹ ohwo guọnọ te-e eyẹ obo rọ wian te-e, ẹkẹvuọvo arodọvwẹ rẹ Ọghẹnẹ.

¹⁷ Kidie ọbe ọfuanfon na ta kẹ Fero, Fiki rẹ ọnana me vwọ kpare owẹ kpenu rere me vwọ mrasan vwẹ ogangan mẹ phia vwẹ oma wẹn, re odẹ mẹ vwo kperi usi ro akpọ na ejobi re.

¹⁸ Vwẹ ọtiọye na ohwo ro jere o nẹ arodọvwẹ kẹ, ọ ro jere o mi rhe ru udu rọye gan.

Ophu vẹ Aruẹdọn rẹ Ọghẹnẹ

¹⁹ Ku wọ rha nọ vwẹ nẹ, Kidie o rhe vwo duota vwo? Kono udu rọye sa gba ọhọre rọye?

²⁰ Ẹkẹvuọvo, kono hẹ owẹ, e ohwo, ru wọ vwọ kpaha kẹ Ọghẹnẹ? Obo ra mare vwo unu rọ vwọ ta kẹ ọ rọ marọ nẹ, Die wọ vwọ ma vwẹ ọtiọna?

²¹ Ọmema rhe vwo ogangan vwẹ enu rẹ ọphiẹ-ẹn, rọ da vwẹ ukori rẹ ọphiẹn ọvuọvo na ma oka rẹ oravwọ ọvo ra vwẹ obo tete kugbe ọfa re vwo gbe otọ-ọ?

²² Kidie ọ da dianẹ Ọghẹnẹ, da guọnọ dje ophu rọye phia rọ da nẹrhẹ a riẹn ogangan rọye, ro de chirako vẹ odiri kẹ ekuakua rẹ ophu ra mare kẹ ẹghwọrọ,

²³ rere ọ vwọ mrasan dje efe rẹ urinrin rọye vwọ kẹ ekuakua rẹ arodọvwẹ, rọ mare jovwo vwọ kẹ urinrin,

²⁴ mrẹmrẹ vwọ kẹ avwanre ro seri nẹ ohri ri Ju ọvo rhe-e ẹkẹvuọvo ji nẹ ohri ri Keferi rhe?

²⁵ Kirobo rọ ghene ta vwi Hosia, Ayen otu re dia ihwo mẹ jowwo-o ki mi se ayen ihwo mẹ, ayen re me guọnọre jovwo na-a ki mi se ọ re me guọnọre.

²⁶ Vwẹ evun rẹ asan ra da ta kẹ ayen, Ovwan dia ihwo mẹ-ẹ, ke che se ayen emọ rẹ Ọghẹnẹ ro je ghwo na.

²⁷ Aizaya de ghwoghwo kpahe Izrẹl. Owenẹ emọ rẹ Izrẹl bu kerẹ ibiekpẹn rẹ abadi, umuku rẹ ayen re cha rhọ;

²⁸ Kidie Ọrovwohwo che brorhiẹ ọgangan kpata kpata hwe akpọ na.

²⁹ Kirobo rẹ Aizaya je mraro, Ọ dianẹ Ọrovwohwo rẹ otuofovwi jẹ emo ẹ vwọ kẹ avwanre vwo-o, avwanre ka dia kerẹ Sodọm ke ru avwanre họhọ Gomora.

Izrẹl vẹ Iyẹnrẹ esiri na

³⁰ Kidie avwanre rha ta? Nẹ ihwo ri Keferi re gbẹn idjerhe rẹ ọvwata jovwo-o rhoma rhe dia evwata, kọye hẹ, ọvwata vwẹ oma rẹ esegbuyota;

³¹ ẹkẹvuọvo nẹ Izrẹl rọ gbẹn idjerhe rẹ ọvwata rọ wan oma rẹ urhi rhe se ru obo rẹ urhi na guọnọre gba-a.

³² Kidie? Fikiridie ayen wan esegbuyota gbẹn idjerhe rọye-e, ẹkẹvuọvo kẹ ayen rori nẹ fiki rẹ iruo. Ọ da nẹrhẹ uchukurhe umwemwu kprọ ayen awọ she,

³³ kirobo re siro, Nighere, me ra reyọ uchivwo vwo mu vwi Zayọn rọ cha nẹrhẹ ihwo yẹnghrẹ uchivwo rọ nẹrhẹ ayen she ọ ro sere gbuyota oma gbe sa vuọ-ọ.