Nehemaya 5 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

A pho urhi rẹ Igho esuo

¹ Asakiephana edo de rhi mu vwẹ ohri rẹ ihwo na vẹ eya rẹ ayen vwọ kpahe iniọvo rayen rẹ ihwo ri Ju na.

² Kidie ihwo ẹvo herọ tanẹ, avwanre vẹ emeshare kugbe emetẹ rẹ avwanre, bute, jẹn avwanre ghwe ọka, rere avwanre re re avwanre rhọ.

³ Ẹvo je herọ re tanẹ, Avwanre vwẹ aghwa re avwanre, ogba ri vain re avwanre, ve uwevwi re avwanre vwo viẹnwan rere avwanre vwo eka, kidie owẹvwe na fie.

⁴ Ẹvọ jẹ tanọ, Avwanre momo igho rere avwanre vwọ hwa osa re otọ vẹ ogba ri vain kẹ ovie.

⁵ Asakiephana ugboma rẹ avwanre vẹ ugboma rẹ iniọvo rẹ avwanre, omaọvo emọ re avwanre vẹ erayen je vwẹ omaọvo, yẹ avwanre ra gba emeshare vẹ emetẹ rẹ avwanre vwo ruẹ eviẹn, ọ guakẹ nẹ a vwẹ ẹvo vwe usun re emetẹ rẹ avwanre na vwo ru eviẹn nure, ẹkẹvuọvo avwanre gbi se vwo ẹgba ra vwọ tan aye-en, kidie avwanre vwẹ idju re avwanre ve ogba ri vain rẹ avwanre viẹnwan nure.

⁶ Ophu de mu vwe gangan ri mi vwo nyo enuebro rayen vẹ eta nana.

⁷ Mi de nene oma mẹ je iroro, me da ghwọ ku ehọnvwọre na vẹ iruiruo na me da ta kẹ ayen, Ovwan suẹn igho ke iniọvo rẹ ovwan. Mi de se ọghwẹgbe rode rhi vwo guẹdjọ kpahe ayen,

⁸ me da ta kẹ ayen, Kirobo re avwanre se ru, me tan iniọvo re avwanre ihwo ri Ju na ra shẹ ke ẹgborho efa na hirhe, ẹkẹvuọvo wa vwẹ ẹro gba na shẹ iniọvo rẹ ovwan rere a vwọ rhoma shẹ ayen kẹ avwanre! Ayen ki gbiein, ayen gbe mrẹ ota ọvuọvo ta-a.

⁹ Etiyin me da ta, Obo rẹ ovwan ruẹ na yovwiri-i. O rhe fo rere ovwan yan vwẹ oshọẹdjẹ rẹ Ọghẹnẹ rẹ avwanre rere e vwọ nabọ rẹ ehwẹjẹ rẹ ivwighrẹ rẹ avwanre ihwo re ẹgborho ẹga na?

¹⁰ Ọrọmarho mẹvwẹ vẹ iniọvo mẹ vẹ idibo mẹ momo igho vẹ eka vwọ kẹ ayen. E jẹn avwanre siobọ ne igho esuo na.

¹¹ Nonẹ na we re siobọ nẹ idju rayen kẹ ayen, ogba ri vain rayen, ogba rẹ ọliv vẹ iwevwi rayen, kugbe abọvo vwẹ ujori rẹ igho, ọka, wain, kugbe evwri ru wọ karhiẹn mie ayen vwọ ke ayen.

¹² Ayen da ta, Avwanre rhan keẹ ayen. Avwanre je nekpẹn rẹ emuọvo vwẹ obọ raye-en. Avwanre ru kirobo re wọ tare na. Mi de se irherẹn na, me da vwẹ ayen duvwu iyori nẹ ayen ru kirobo re ayen veri na.

¹³ Mi de ji tuetue ishamwa me, me da ta, Ọtiọye Ọghẹnẹ ji tuetue kohwo kohwo nẹ uwevwi rọye, kugbe iruo rọ e ro je ive rọye ẹyọnrọn. Kẹ ọtiọye e ji tuetue kufia ro dia ofefe. Ọghwẹgbe na ejobi da tanẹ, Isẹ. Ayen de jiri Ọghẹnẹ, ihwo na de ru kirobo rẹ ayen veri.

¹⁴ Ọrọmarho vwọ ne ọke re a vwọ reyọ ovwẹ vwo mu osun rẹ otọ ri Juda, vwo nẹ ẹgbukpe uje re te ẹgbukpe ọgban gbẹ ivẹ rẹ Arta-xerxes rẹ Ovie, kọye ikpe ihwivẹ, te ekpuyovwi mẹ eyẹ iniọvo mẹ na re ẹkẹn emu ra ghare te osu-un.

¹⁵ Isun rẹ ẹsosuọ re karo kẹ vwẹ, kru oghwa ọhọhọhọ nyẹ ihwo na, ayen de mie ayen emuọre vẹ idi, a ke mrẹ shẹkẹl ujuvẹ rẹ idọnọ. Ekpuyovwi rẹ idibo rayen je vwẹ oma ruẹ Osun kẹ ihwo na. Ẹkẹvuọvo mi se ru ọtiọye-e, fiki rẹ oshọ rẹ Ọghẹnẹ.

¹⁶ Mi de churobọ mu iruo rẹ igbẹhẹ nana, Avwanre reyọ otọ ọvuọvo mie aye-en, idibo mẹ ejobi da ghwẹ oma koko etiyin ruiruo.

¹⁷ Ọrọmarho ihwo ujori gbẹ ujuvẹ gbẹ ihwe ri tidia riariẹ imẹjẹ mẹ, ihwo ri Ju vẹ iruiruo vwọ ba ihwo ri nẹ ẹgborho na rhe re riariẹ avwanre phihọ na.

¹⁸ Asakiephana eranvwe re vwo chere emu kẹ vwẹ ẹdọke da dia erhuẹn ọshare ọvo vẹ omamọ rẹ igodẹ esan, ayen ji ghwe chere ehọ kẹ vwẹ, ẹdẹ ihwe ayen vwọ muẹ eghwara rẹ udi buebu rhe vwe, vwẹ evun rẹ egbodugbu nana ejobi na me nọ ekpẹn rẹ igho re cmu ra hwa kẹ ọsu-un, fiki rẹ oghwa ọhọhọhọ re kru nyẹ ihwo nana.

¹⁹ Karophihọ ovwẹ vwẹ ọresiri, E Ọghẹnẹ mẹ, fiki rẹ emu ejobi ri mi ru kẹ ihwo nana.