Nahum 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Ekan kẹ orere rẹ ọbara na, rọ vọnre vẹ efian kugbe emu rẹ uji– ugborho na rhe vwo oba-a!

² Edo rẹ uphiẹphiẹ, kugbe edo rẹ adjugẹ, iyesi ri pho kugbe hwrogho hwrogho rẹ akpẹrẹ!

³ Otu re dia enu rẹ iyesi da nyavwẹ oda, oda re djuẹ vẹ ibiri ri lo wrowro, otu re hweri vẹ otọ gbidi, irivwi rẹ ihwo re do koko, irivwi rẹ ihwo ri vwo oba-a, ayen mia yẹghrẹ she teyọ irivwi na!

⁴ Ena ejobi kẹ fiki rẹ ọfanrhie rẹ igberadja na, vẹ erhuvwu kugbe inehweri ọbrabra, rọ vwẹ ọfanrhie rọye shẹ ẹgborho, ọ me rha vwẹ inehweri rọye se ihwo.

⁵ Nighe ki mi mu kpahe owẹ, eriyin Ọrovwohwo rẹ otuofovwi na tare, ke me ghwiẹ abọ rẹ ewun wẹn rhurhu uwe opharo; uvie ke mrẹ ophọphọvwe wẹn.

⁶ Ke me ghwẹ ikueku ku we, ke me vwẹ owẹ jehwẹ, ihwo ke cha tọn ẹro vi we.

⁷ Ihwo re mrẹ we ejobi ki che sioma reyọ tanẹ, A ghwọrẹ Ninivẹ kufia; kono ri muomahọ kẹ? ki tivọ a da mrẹ obruche vwọ kẹ?

⁸ Wo yovwi nọ Tib ro tidia vwẹ orhoma ri Nile, rẹ ame riariẹ phihọ, rọ ghwrọrọ phihọ abadi rẹ ame da rhuọrhuọ igbẹhẹ rọye?

⁹ Itiọpia ọye ogangan rọye, Ijipt rhe, ọyena ji vwo oba-a; Ihwo ri Put vi Libya eye kẹ ichuko rọye.

¹⁰ Dede na ye muro yanran ghẹnẹ, e muro kpo ighuvwu; imitete rọye na a da vwẹ ayen fotọ yẹyẹghẹ vwẹ obo oba rẹ urhuvwu ọvuọvo; ka vwi fiki rẹ ihwo ride re herọ duvwu itẹ, ihwo ride re herọ ejobi a da vwẹ ojọnrọn gba ayen.

¹¹ Udi ko che mu we rhe, ku wo che ni asan ọvo kei; wọ cha guọnọ asan wọ de sioma nu kẹ ovweghrẹ.

¹² Asan odjahọ wẹn kọ họhọ irhe ri fig rẹ ibi rẹ ọtomọ rọye vware– e de kpogho ki she phihọ unu rẹ ọriemu.

¹³ Gbe nighe otuofovwi wẹn ke họhọ eya vwẹ uherevie wẹn. Echẹ rẹ otọ wẹn na rhie phihọ ghwroro kẹ ivwighrẹ wẹn; erhanre tọrhẹ ibregba wẹn re.

¹⁴ We vo ame nene oma kpo imu na, wa nabọ gba ọgba rẹ ovwan gan, wa ra tọn ophiẹn, re we chiyi ema na suesun, reyọ ekpeti ra vwọ ma ikọrekpẹn na!

¹⁵ Etiyin erhanre da cha torhẹ owẹ, oda cha nyavwe owẹ fia. Ọ cha re wẹ kerẹ igurube. Gbe ru oma wẹn buphiyọ kerẹ igurube, buebu kerẹ ebaka!

¹⁶ Wo ru ineki wẹn buebu i bunọ isio rẹ obenu na. Igurube na bẹre ibekpe rọye ọ da rhan yanran.

¹⁷ Isun wẹn họhọ ebaka isiẹbe wẹn kerẹ ekru rẹ igurube re rhan mu ogba vwẹ ẹdẹ rẹ ekpahe– rẹ uvo da bẹre rhe, e me rhan yanran; ohwo ọvuọvo gbe riẹn asan rẹ epha-a.

¹⁸ Isuigodẹ wẹn ra vwerhẹ, E Ovie rẹ Asiria, ehọnvwọre we re gọ ovwerhẹ. Ihwo wẹn hra nene enu rẹ igbenu o rhe vwo ohwo ro se ayen koko-o.

¹⁹ O rhe vwo ohwo ro bruche rẹ odjadja wẹ-ẹn ora wẹn na ọrhuarho ihwo ri nyo ikun wẹn ejobi ke teyọ abọ ghwẹ phihọ owẹ. Kono ọnana je bro cha, rẹ uvumwemwu wẹn jẹ oma e te?