Nahum 1 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ophu rẹ Ihri rẹ Ọrovwohwo

¹ Epha ra bọ kpahe Ninivẹ. Ọbe rẹ emramrẹ ri Nahum ohwo rẹ Ẹlkosh.

² Ọrovwohwo Ọghẹnẹ rọ rioma rọ reihri, Ọrovwohwo na reihri o ki ji mu ophu; Ọrovwohwo reihri vwẹ obọ rẹ ihwo ri mu kpahọ o ji mu ophu kpahe ivwighrẹ rọye.

³ Ọrovwohwo na fobọ mu ophu-u yo vwo ẹgba rhuarho, Ọrovwohwo na ri brorhiẹ hwe ohwo rọ re abe. Idjerhe rọye ọ hẹ evun rẹ ogiribo vẹ urhie rọ họnra, egho rẹ obenu eye hẹ ekpẹn re tamu awọ rọye.

⁴ Ọ ghwọ ku abadi ọ da kpọ yamu, ọ da nẹrhẹ irhie na ejobi kpọ yamu; Beshan kugbe Karmẹl de vwioro, ẹbe djidji ri Lebanọn ejobi fare.

⁵ Igbenu na ki kpogho vwẹ obaro rọye, igbenu rẹ itete de mu wran; otọ na ejobi kẹ ofefe vwẹ obaro rọye, akpọ na kugbe obo re dia evun rọye ejobi.

⁶ Ono ri se mudia hẹrhẹ ophu rọye? Ono se chirako rẹ ọrhorho rẹ ivuemiovwo rọye? Ọ kpare ophu rọye ku kerẹ erhanre, o de hwe eragha na ibribro.

⁷ Ọrovwohwo na yoma, asan odjahọ vwẹ ẹdẹ rẹ ukpokpogho; ọ riẹn ihwo re djẹ sioma nu vwẹ evun rọye.

⁸ Ẹkẹvuọvo ọ cha vwẹ oghwe ro kuẹ vwo furhie otu ri mu kpahọ, kọ cha djẹ ivwighrẹ rọye ra ro evun rẹ ebri.

⁹ Die wa vwọ jẹ iroro umwemwu kpahe Ọrovwohwo? O che furhie re kakare, ọ cha reihri rẹ ivwighrẹ rọye wan obọvo-o.

¹⁰ Kerẹ inwe re gba phihọ eriyin a cha ghwọrọ ayen, kerẹ ehẹbe eyaya.

¹¹ Ohwo ọvuọvo rhe ne obọ me rhe, rọ jẹ iroro umwemwu kpahe Ọrovwohwo, rọ jẹ orharhe rẹ iroro?

¹² Enẹ Ọrovwohwo tare, Owenẹ ayen ganre eyẹ ayen buru, a cha nyavwẹ ayen ghwẹ kufia. Owene mi kpokpo uwe jovwo, mi gbi kpokpo uwe ọfa-a.

¹³ Asakiephana ki mi vwirhi urhekpe rọye nẹ uwe oma ke me sanvwẹ ifi wẹn vwrẹn.

¹⁴ Ọrovwohwo ji urhi kpahe owẹ: O gbi che vwo ohwo ra vwọ karohọ odẹ wẹ-ẹn; ke mi cha nyavwẹ owẹ kufia nẹ uwevwi rẹ edjọ wẹn, oma ra kare kugbe oma ra wranre. Ke me tọn ushi wẹn, kidie orharhe wo ruẹ.

Ikun rẹ Eshe ri Ninivẹ

¹⁵ Nighe, vwẹ obenu rẹ ugbenu na gbe ni awọ rẹ ihwo re ghwa ikun esiri na cha; ri ghwoghwo ufuoma! Re ore wẹn, E Juda, gbe ru ive wẹn gba, kidie ohwo umwemwu gbe cha vwo so wẹ bẹdẹ-ẹ a nyavwerọ kufia tototo.