Matiu 26 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Isun na ro ero Riariẹ Jesu Phihọ

¹ Rẹ ọke rhi vwo te, ri Jesu vwọ ta eta nana ejobi nu, ọ da ta kẹ idibo rọye nẹ,

² Ovwan riẹnre nẹ ẹdẹ ivẹ da wan nu orẹ rẹ Ẹwanvrẹn na ko te otọ, ka cha vwẹ ọmọ rẹ ohwo phia rere a karọ mu agbagba.

³ Etiyin otu rẹ ilori rẹ irherẹn kugbe ekpako rẹ ihwo na ejobi de rhi se oma koko, vwẹ ọgua rẹ olori rẹ irherẹn rode, re se Kaifas;

⁴ Aye da jẹ iroro kugbe obo rẹ ayen sa vwẹ aghwanre mu Jesu rere ayen hwe.

⁵ Ẹkẹvuọvo ayen da ta nẹ, E jọ dia orẹ na-a, ihwo na de rhe do.

A vwẹ Ori Ghworo Jesu vwi Bẹtani

⁶ Asakiephana ri Jesu vwọ hẹ Betani, vwẹ uwevwi ri Saimọn ọhọvwoti na,

⁷ aye ọvo de bro rhe ọ vẹ ọgọ rẹ udẹ rọ ghare ro gbo vwevwerhe, o de kuo ku uyovwi, ro vwo tidia udemu.

⁸ Ẹkẹvuọvo ọke rẹ idibo na vwọ mrẹ, ivun de miovwo ayen gangan ta nẹ, Die sorọ ra vwọ rhaphie udẹ nana.

⁹ Ọ dianẹ a shẹ udẹ nana, ọ ghare gangan ra da vwẹ igho na kẹ ivwiogbere.

¹⁰ Ẹkẹvuọvo Jesu riẹn iroro rẹ udu rayen, ọ da ta kẹ ayen nẹ, Die we vwo kpokpo aye na? Kidie o ru emu esiri kẹ vwẹ.

¹¹ Kidie igbere na vẹ ovwan re dia vwẹ ọke ejobi, ẹkẹvuọvo me vẹ ovwan sa dia vwẹ ọke ejobi-i.

¹² Kidie udẹ nana ro ku ku vwe na, o ruro hẹrhẹ esho mẹ.

¹³ Uyota me ta kẹ ovwan, kasan kasan ra da ta ota rẹ iyẹnrẹ esiri na vwe akpọ na, ọ rẹ aye nana ruru na a je vwọ karophihọ.

Judas Rhọvwere nẹ ọye shẹ Jesu

¹⁴ Ọvo vwẹ ihwivẹ na, re se Judas Iskariọt da yan bru ilori rẹ irherẹn na.

¹⁵ Ọ da ta nẹ, Die ovwan sa kẹ vwẹ, ri mi de muo kẹ ovwan? Ayen de kere idọnọ efuanfon ọgban vwọ kẹ.

¹⁶ Nẹ ọke yena yanran kọ guọnọ obo ro ru muo kẹ ayen.

Jesu vẹ Idibo Rọye Re Orẹ rẹ Ẹwanvrẹn na

¹⁷ Vwẹ ẹdẹ rẹsosuọ rẹ ikara ro jephuo na, idibo na de bru Jesu rhe nẹ, Tivọ wọ guọnọre nẹ avwanre rhuẹrẹ phihọ otọ kẹ wẹ, re wọ da re emu rẹ Ewanvrẹn na?

¹⁸ Ọ da ta nẹ, yanran kpo evun rẹ orere na bru oghẹre rẹ ohwo ọtiọna, re wọ ta kẹ nẹ, Oyono tare nẹ, Me cha re emu rẹ Ẹwanvrẹn na vwẹ uwevwi wẹn kugbe idibo mẹ.

¹⁹ Idibo na de ru kirobo ri Jesu ji ayen, ayen da rhuẹrẹ emu rẹ Ewanvrẹn na phihọ otọ.

²⁰ Ọke rẹ ovwọnvwọn vwo te, ọ vẹ idibo ihwivẹ na de tidia udemu;

²¹ Rẹ ayen vwo ria emu na, ọ da ta nẹ, Uyota me ta kẹ ovwan, ọvo vwẹ usun rẹ ovwan na cha shẹ vwẹ.

²² Ayen de muomahọ gangan, ayen ọvuọvo da ta nẹ, Mẹvwẹ Ọrovwohwo?

²³ Ọ da kpahe ta nẹ, Ohwo rẹ ọ vẹ ovwe gbe duvwu obọ phihọ emu na ẹsiẹvo, ọye re cha shẹ vwẹ na.

²⁴ Ọmọ rẹ ohwo cha yanran, kirobo re siro kpahọ; ẹkẹvuọvo ekan kẹ ohwo yena ra wan oma roye shẹ! o gbi fo rere e vwiẹ ohwo yena jovwo-o.

²⁵ Judas rọ shẹrẹ na da kpahe ta nẹ, Mẹvwẹ vwọ, Onini? Ọ da kpahe kẹ nẹ, We re tare.

Evwomuo rẹ Emu rẹ Ovwọnvwọn rẹ Ọrovwohwo na

²⁶ Rẹ ayen vwọ ria emu na, Jesu da reyọ ikara, ọ da nẹ ẹrhovwo ọ de bro, ọ da vwọ kẹ idibo na, ọ da ta nẹ, Reyọ ona re, ọnana oma mẹ.

²⁷ Ọ da reyọ uko ọ da kpẹvwẹ, ọ da vwọ kẹ ayen nẹ, Ovwan ejobi da ọnana.

²⁸ Kidie ọnana ọbara mẹ rẹ ọphọ ọkpokpọ na, ro hwẹri kẹ otu buebu, fiki rẹ evworhovwo rẹ umwemwu.

²⁹ Ẹkẹvuọvo me ta kẹ ovwan nẹ, me gbe sa da ame ri vain ọfa-a, bẹsiẹ me vwọ rhoma da ọkpokpọ vwẹ uvie rẹ Ọsẹ mẹ.

³⁰ Ọke rẹ ayen vwọ so me nu, ayen da yanran kpo ugbenu rẹ Oliv.

Ota kpaho Ẹsiọn ri Pita

³¹ Eriyin Jesu da ta kẹ ayen nẹ, Ovwan ejobi cha sen vwẹ vwẹ ason nana; kidie e siro nẹ, Me cha ghwiẹ osun igodẹ na, igodẹ na ke cha hra.

³² Ẹkẹvuọvo ọke mi de vrẹn nu, ke me karo kẹ ovwan kpo obi Galili.

³³ Pita da kpahe ọ da ta kẹ nẹ, Ihwo na ejobi da sen wẹn, Me cha sa sen wẹ bẹdẹ-ẹ.

³⁴ Jesu da ta kẹ nẹ, uyota me ta kẹ wẹ na, vwẹ ason nana, bẹsiẹ rẹ ọhọ vwo bo, wọ sen vwẹ asiarha.

³⁵ Pita da ta kẹ nẹ, Ọ da dianẹ me vẹ owẹ ghwu dede, me cha sa sen wẹ-ẹ. Ọtiọye idibo ri chekọ na ejobi je ta.

Jesu nẹ Erhovwo vwi Getsimani

³⁶ Jesu vẹ idibo rọye da rhe asan re se Getsimani, ọ da ta kẹ idibo rọye nẹ, We tidia etinẹ, re mi kpo oboyi ra nẹ ẹrhovwo.

³⁷ Ọ da reyọ Pita kugbe emọ ri Zẹbidi ivẹ, o de vwerhi gangan.

³⁸ Ọ da ta kẹ ayen nẹ, Erhi mẹ vọnre vẹ uvwerhe, kugbe omaẹghwọrọ kẹ ughwu; we mudia etinẹ, rere we nene uvwe rhẹrẹ.

³⁹ Ọ da yan hẹ ọbaro emerha, o de she diguẹ, ọ da nẹ ẹrhovwo ta nẹ, E Ọsẹ mẹ, ọ da dia ẹrhọvwọ wẹn, jẹn uko nana wan vrẹn vwẹ; ẹkẹvuọvo ọ dia ẹguọnọ mẹ-ẹ, ru ẹguọnọ wẹn.

⁴⁰ O de bru idibo na rhe, ọ da mrẹ ayen re vwerhẹ, ọ da ta kẹ Pita nẹ, Die, wa vẹ ovwẹ gbe sa rhẹrẹ unọkẹ ọvo-o?

⁴¹ Rhẹrẹ wa rẹ, rere we jẹ odavwini ẹruọ; erhi na rhọvwere, ẹkẹvuọvo ugboma vwiẹrẹ.

⁴² Obọ rivẹ o da rhoma yanran ra nẹ ẹrhovwo ta nẹ, E Ọsẹ mẹ, ọnana sa chọ vwẹ ra-a, jokpa nẹ me darọ, gbe ru ẹguọnọ wẹn.

⁴³ O de rhivwi rhe rhe mrẹ ayen re vwerhẹ, kidie ovwerhe sun ayen hwe.

⁴⁴ Ọ da yanran ra nẹ ẹrhovwo obọ rerha, je vwẹ obọ ọvo na.

⁴⁵ Ọ da rhoma bru idibo na rhe, ọ da ta kẹ ayen nẹ, Wa gba vwerhẹ we rovwoma; nighe ọke na tere, a shẹ ọmọ rẹ ohwo kẹ iruimwemwu nure.

⁴⁶ We vrẹn ra yanran; nighe, ọ rọ cha shẹ vwẹ na te etinẹ nure.

Ẹshẹ vẹ Emuo ri Jesu

⁴⁷ Ro ghwa vwọ ta ota na, no, Judas ọvo vwẹ ihwivẹ na da rhe vẹ ihwo buebu, vẹ elọkọ kugbe egbẹ, rẹ ilori rẹ irherẹn kugbe ekpako na ji rhe.

⁴⁸ Ọ rọ shẹrẹ na da vwẹ oka kẹ ayen nẹ, ohwo kohwo re me fiọnfiọn unu ọye, ovwan muo.

⁴⁹ Siẹvuọvo na o de ghwe bru Jesu rhe, o de yere, nẹ, Do, Onini, ọ da fiọnfiọn unu.

⁵⁰ Jesu da ta kẹ nẹ, Oko ru obo wọ vwi fiki rọye rhe. Ayen de ghwe shabọ phihọ, ayen de muo.

⁵¹ Nighe, ọvo vwẹ idibo ri Jesu na, rọ vẹ ọye gba hẹ etiyin na, de yoro ọlọkọ rọye nẹ ako rhe, ọ da nyavwe orhọn rẹ odibo rẹ orherẹn rode na nu.

⁵² Jesu da ta kẹ nẹ, Phi ọlọkọ wẹn vwọ hẹ ako; kidie ohwo ro nyavwe ohwo hwe, ọlọkọ ọ je wa ghwu.

⁵³ Wo rhe roro nẹ, me da rẹ ọsẹ mẹ, ọ gbe sa egbofovwi rẹ emakashe re wan ihwivẹ vwo rhe vwe?

⁵⁴ Mavọ ẹbe ọfuanfon na ru sa gba nẹ, imu nana ejobi ki ru gba?

⁵⁵ Vwẹ ọke yena, Jesu da ta kẹ ihwo na nẹ, Wa vwẹ elọkọ vẹ egbẹ bru vwe rhe kerẹ ohwo ro mu oji? Kẹdẹ kẹdẹ mi vwo yono vwẹ evun rẹ uwevwi rẹ ẹga na, ovwan se mu vwe-e.

⁵⁶ Ẹkẹvuọvo enana ejobi ruru rere ebẹ ọfuanfo na vwọ gba. Idibo na ejobi da yan jovwo, ayen da djẹ.

Jesu mudia vwẹ obaro rẹ Ẹguare

⁵⁷ Ihwo ri mu Jesu na, de suo yanran kpo uwevwi ri Kaifas orherẹn rode asan rẹ otu rẹ isiẹbe kugbe ekpako na de koko.

⁵⁸ Ẹkẹvuọvo Pita de nene obobuko, re te ọguan rẹ orherẹn rode na, ọ da ro evun rẹ ọguan na, o de tidia vwẹ ohri rẹ ẹnọkpa na, rere ọ vwọ mrẹ obo re cha phia kẹ.

⁵⁹ Olori rẹ irherẹn na kugbe ihwo rẹ ẹguare na ejobi, da guọnọ iseri rẹ eku se kpahe Jesu, rere ayen mrasan hwe.

⁶⁰ Ayen mrẹ emuọvo-o, dede nẹ iseri rẹ efian buebu yan phia. Ukuko rọye iseri ivẹ efa da rhe.

⁶¹ Ayen da ta nẹ, Ohwo nana tare nẹ, Mi se kporo uwevwi rẹ ishọshi rẹ Ọghẹnẹ, ẹdẹ erha ke me bọn ọfa.

⁶² Ọrherẹn rode na de vrẹn mudia, ọ da ta nẹ, Wọ gbe kpahe emuọvo? Wo nyo ota rẹ iseri na ta kpahe owẹ?

⁶³ Ẹkẹvuọvo Jesu de fotovwi. Ọrherẹn rode na da ta kẹ nẹ, Vwẹ ode rẹ Ọghẹnẹ ri bẹdẹ na, ta kẹ vwẹ, wẹ ghine Kristi na, Ọmọ rẹ Ọghẹnẹ na.

⁶⁴ Jesu da kpahe kẹ nẹ, We re tare. Vwẹ ọ rẹ uyota me ta kẹ wẹ nẹ, Ke etinẹ yanran wọ cha mrẹ Ọmọ rẹ ohwo ro tidia vwẹ obọrhe rẹ ogangan, rọ cha vwẹ irharheghe rẹ odjuvwu.

⁶⁵ Orherẹn rode na da bẹrẹ ewun rọye, ta nẹ, Ọgba rẹ efian na. Didi iseri ọfa a rha guọnọ? Ovwan rha mrẹ efian rọye na.

⁶⁶ Die ovwan rori vwo? Ayen da kpahe nẹ, o fo ughwu.

⁶⁷ Etiyin ayen de dje enya kuo ayen da vwọ jehwẹ; ayen da vwẹ obọ fa,

⁶⁸ ta nẹ, Gba mraro kẹ avwanre; kono re teyẹ owẹ na?

Pita siẹn Jesu

⁶⁹ Vwẹ ọke yena Pita tidia vwẹ otafe rẹ ọguan na, ọmọtẹ ọvo de bro rhe ta nẹ, Wo vi Jesu ri Galili na je hẹ usun.

⁷⁰ Ọ da ghwunu ta nẹ, Me riẹn obo ru wọ ta na-a.

⁷¹ Ro vwo vrẹn kpo unu rẹ ọguan na ọmọtẹ ọfa da mrẹ, o da ta kẹ ihwo rẹ hẹ etiyin nẹ, Ohwo nana vi Jesu ri Nazarẹt je vwẹ usun.

⁷² Ọ da ghwunu duvwu iyori nẹ, Me riẹn ohwo na-a.

⁷³ Emerha ihwo ri mudia kẹrẹ na da ta kẹ Pita, uyota wọ vẹ ohwo na ghine hẹ usun, kidie ephẹrẹ wẹn ọvo tuwe phia.

⁷⁴ Ọ da harhe ekan duvwu iyori nẹ, Me riẹn ohwo na-a. Siẹvuọvo na ọhọ de ghwe bo. Pita da rhe karohọ eyan rọ vi Jesu yanre, ta nẹ, Bẹsiẹ rẹ ọhọ ki bo, wọ sen vwẹ asiarha. Ọ da ro otafe ra viẹ gangan.