Matiu 19 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Uyono kpahe Obọesiono rẹ aye

¹ Rẹ ọke rhi vwo te, ri Jesu vwọ ta eta nana ejobi nu, o de kpo Galili, kugbe eko ri Judia vwẹ abọ rivẹ ri Jọdan.

² Ihwo buebu de nene; o de sivwi ayen.

³ Ihwo ri Farisi de bro rhe re davwọ ni ta nẹ, Ọ fori rẹ ohwo siobọ nẹ aye rọye?

⁴ Ọ da kpahe ọ da ta nẹ, Ovwan ji se nẹ ohwo rọ ma ayen notọrhe ọshare vẹ aye a ma ayen?

⁵ Ọ da ta nẹ, Fiki rẹ ọnana ọshare vwo jẹ ọsẹ vẹ oni rọye vwo ọ me ra gbanọ aye rọye, ayen ivẹ na ke cha dia oma ọvo.

⁶ Fiki rẹ eriyin na ayen gbe hẹ ihwo ivẹ ọfa, ẹkẹvuọvo ayen kẹ oma ọvo. Obo rẹ Ọgbẹnẹ tan kugbe nu, e jẹn ohwo hẹriẹ-ẹ.

⁷ Ayen da ta kẹ nẹ, Die sorọ ri Mosis rha vwọ ta nẹ e siọbe rẹ obọ esiono rere e siobọ no?

⁸ Ọ da ta kẹ ayen nẹ, fiki rẹ udu ọgangan rẹ ovwan Mosis vwo ji urhi na nẹ we siobọ nẹ aye rẹ ovwan; ẹkẹvuọvo notọrhe ọ dia ọtiọye-e.

⁹ Me ta kẹ ovwan, kohwo kohwo ro siobọ nẹ ayen rọye, jokpa nẹ ko gbe ọfaurhiẹ, rẹ ọ da reyọ ọfa, yo gbe igberadja; ọshare rọ reyọ aye re siobọ nu, yo gbe igberadja.

¹⁰ Idibo rọye da ta kẹ nẹ, Obo rọ epha kẹ ọshare na, ọ da dia ọtiọye o gbi fo rere a rọvwọ-ọ.

¹¹ Ẹkẹvuọvo ọ da ta kẹ ayen nẹ, Ihwo ejobi sa reyọ ota nana-a, jokpa nẹ otu re djere kẹ.

¹² Kidie ihwo evo herọ ri jẹ eya ese nene vwerhẹ. Evo herọ rẹ ihwo rẹ akpọ hirhe phihọ ochibẹ, efa herọ ri hirhe oma phihọ ochibẹ vwi fiki rẹ uvie rẹ Ọghẹnẹ. Ohwo rẹ udu rọye gbarọ e jẹ reyọ ota nana.

Jesu nẹ Ẹrhorwo kẹ Imitete

¹³ Etiyin e de mu imitete vwo bro rhe, re ọ ghwẹ obọ kpahe ayen, re ọ nẹ ẹrhovwo kẹ ayen. Idibo rọye da ghwọ ku ayen.

¹⁴ Ẹkẹvuọvo Jesu da ta nẹ, Jẹn imitete na bru uvwe rhe, wa da ayen jẹ-ẹ kidie edje nana hẹ uvie rẹ Ọghẹnẹ.

¹⁵ Ọ da ghwẹ obọ kpahe ayen ọ da nẹ ẹrhovwo kẹ ayen.

Emeghene ro Feri na

¹⁶ Nighe, ohwo ọvo da rhe o da ta nẹ, Oyono didi emu esiri mi se ru, mi vwo vwo arhọ ri bẹdẹ na?

¹⁷ Ọ da kpahe kẹ nẹ, Die wọ vwọ nọ ekpẹn rẹ emu esiri? Ohwo ọvuọvo ri yoma: ẹkẹvuọvo wọ da guọnọ arhọ na vwo gba yọnrọn irhi na.

¹⁸ Ọ da ta kẹ nẹ, kọ rhọ? Jesu da ta, wo hwe ohwo-o, wo gbe igberadja-a, Wo cho uji-i, Wo se iseri rẹ eku-u,

¹⁹ Vwẹ ọghọ kẹ ọsẹ wẹn vẹ oni wẹn rere wọ rha guọnọ ọrivẹ wẹ kirobo wọ guọnọ oma wẹn.

²⁰ Emeghene na da ta kẹ nẹ, Me yọnrọn irhi na ejobi. Kọ rhọ ji chekọ?

²¹ Jesu da ta kẹ nẹ, Wọ da guọnọ nẹ wọ fon, gba ra she obo ri wo vwori ejobi, re wọ vwẹ ayen kẹ ivwiogbere, ku wo vwo efe vwẹ obo odjuvwu, gba yanrhe ri wo nene uvwe.

²² Ẹkẹvuọvo ọke rẹ emeghene na vwo nyo, o de mu opharo phihọ: kidie o vwo efe buebu.

²³ Jesu da ta ke idibo rọye nẹ, Uyota me ta kẹ ovwan, Ọ bẹre gangan kẹ ọdafe rọ vwọ ro uvie rẹ odjuvwu.

²⁴ Me je rhoma ta kẹ ovwan nẹ, Ọ lọhọre kẹ uyovwi rẹ erhuẹn rọ vwọ wan unu rẹ ukoti vrẹn, vwọ kẹ ọdafe rọ vwọ ro uvie rẹ Ọghẹnẹ.

²⁵ Ọke rẹ idibo na vwo nyo, o de gbe ayen unu gangan, ayen da ta nẹ, kono re sa rhọ vwo?

²⁶ Ri Jesu vwo ni ayen ọ da ta kẹ ayen nẹ, Ihwo ọye ona bẹn kẹ; ẹkẹvuọvo ọ sa bẹn kẹ Ọghẹnẹ-ẹ.

²⁷ Pita da kpahe ọ da ta kẹ nẹ, Nighe, avwanre jẹ emu na ejobi vwo vwo nene uwe re. Kidie avwanre se vwo?

²⁸ Jesu da ta kẹ nẹ, Uyota me ta kẹ wẹ, Ovwan ri nene uvwe na, ọke rẹ Ọmọ rẹ ohwo de che tidia vwẹ enu rẹ ekete rẹ urinrin rọye, ovwan ki ji che tidia enu rẹ ekete ihwivẹ na de guẹdjo rẹ Izrẹl.

²⁹ Kohwo kohwo rọ yan jẹ uwevwi, eyẹ imoni rẹ eshare, eyẹ e re eya, eyẹ ọsẹ, eyẹ oni, kugbe emọ eyẹ etọ vwi fiki mẹ, kọ mrẹ erere kpahe uri akuri kugbe arhọ ri bẹdẹ na.

³⁰ Ihwo re karo jovwo e cha ka uko, e re ka uko e cha karo.