Maika 1 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

A Viẹ kẹ Sameria Kugbe Jerusalẹm

¹ Ota rẹ Ọrovwohwo na ro bru Maika rhe ohwo ri Moreshet vwẹ ọke ri Jotam, Ahaz, kugbe Hẹzikaya, ivie ri Juda, rọ mrẹre kpahe Sameria kugbe Jerusalẹm.

² Nyo, ihwo na, ovwan ejobi; kerhọn E otọ na, vẹ obo re herọ ejobi; gbe jẹn Ọrovwohwo Ọghẹnẹ na se iseri hwe we, Ọrovwohwo rọ dia uwevwi ọfuanfọn rọye na

³ Gbe nighe, Ọrovwohwo wotọ nẹ ẹdia rọye rhe, ko che wotọ rhe rhi chiyi asan ri kpenu vwẹ akpọ na.

⁴ Igbenu na ke cha wran vwẹ obotọ rọye iyara na ki vwo egbogho, kerẹ erhan vwẹ oma rẹ erhanre, kerẹ ame re ku phihọ ọghwrọrọ.

⁵ Enana ejobi ki fiki rẹ ogbeku ri Jekọp kugbe fiki rẹ umwemwu rẹ uwevwi rẹ Izrẹl. Die tobọ hẹ ogbeku ri Jekọp vwọ? Ọ dia Sameria-a? Die tobọ rha hẹ imwemwu rẹ uwevwi ri Juda? Ọ dia Jerusalẹm vworẹ?

⁶ Fiki rẹ ọtiọye na ki mi vwi Sameria ru erhurhu vwẹ obo uphẹphẹ rẹ orho na, asan ra kọn vain phihọ, ki mi ku ibieragha rọye phihọ evun rẹ iyara, ka fa ichivwo rọye rhiephihọ.

⁷ Ema rọye ejobi ke che hwe ayen vworovworo, otu ro durhieri ejobi ka vwẹ erhanre torhẹ ayen, ẹdjọ rọ kare ejobi ka guọghọ ayen kufia, kidie igho rẹ igberadja rọ mrẹre ọye ọ vwọ dẹ ayen, obọ rẹ igberadja ayen ji che rhivwi ra.

⁸ Fiki rẹ ọnana Me vwọ viẹ beroma; ke Me ghwiẹ amwa nu Me ba phihọ; ke Me viẹ kerẹ erha, mi muomahọ kerẹ ogomugoro.

⁹ Kidie ora rọye na e se sivwo-o; o te Juda re, o te anurhoro rẹ ihwo mẹ rẹ, o te Jerusalẹm rẹ.

¹⁰ Wo gbe ikun rọye vwi Gat rẹ wọ viẹ kakaka-a; vwi Bẹtlẹ-afra-a vwẹ oma wẹn ghworo iwurhie.

¹¹ Yan kpo obo wọ ra, ihwo re dia Shafir, vwẹ ẹbẹba vẹ omaẹvuọ, Ihwo re dia Zaanan cha ro uphephẹ-ẹ; ọmaebere ri Betezẹl cha reyọ asan ro mudia na mie we.

¹² Kidie ihwo re dia Marọt ra rua ẹnwan hẹrhẹ erhuvwu rọ cha, kidie emu umwemwu neẹ obọ rẹ Ọrovwohwo rhire rhi te anurhoro ri Jerusalẹm re.

¹³ Nabọ rhuẹrẹ asan re tidia vwẹ akpẹrẹ na, ihwo re dia Lakish; ovwan ẹtuọhọ rẹ umwemwu kẹ emetẹ ri Zayọn, kidie evun wẹ a da mrẹ ogbeku rẹ Izrẹl.

¹⁴ Fiki rẹ ọtiọye gbe ru ẹse rẹ ukpukpo kẹ Mọreshet-gat; uwevwi rẹ Akzib kọ dia emu rẹ ophiẹvwe kẹ ivie rẹ Izrẹl.

¹⁵ Ki mi se ihwo ri phi we kua rhe we, ihwo re dia Maresha, urinrin rẹ Izrẹl ke cha rhe Adulam

¹⁶ Gbe oma wẹn akpan re wo bru ẹton wẹn nu, fiki rẹ emọ re vwerhe owẹ oma; gbe gbe oma wẹn akpan kerẹ ugo, kidie ayen che vrẹn nẹ uwe oma kpo ighuvwu.