Livitikọs 7 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Ọnana urhi rẹ izobo rẹ ohwo rọ re abe. Ọye ọ rọ ma fon;

² vwẹ asan re de hwe eranvwe ra vwọ torhẹ izobo na Etiyin e de hwe eranvwe re vwo ze izobo rẹ abe na, e mi ku ọbara rọye ku enu rẹ agbada na yariẹ phihọ.

³ A Me vwẹ ivwri rọye ejobi vwo ze, te urhurhuvwu rọye vẹ ivwri ri rhurhu ivun rọye,

⁴ ibiehu ivẹ na vẹ ivwri ri rhurhu ayen ra ruẹ ikpoghoawọ, kugbe ekuakua rẹ irhue re bru nene ibiehu na;

⁵ Orherẹn na Me torhẹ ayen vwẹ enu rẹ agbada na rọ dia ẹkpẹvwẹ re erhanre kẹ Ọrovwohwo, Ọnana izobo rẹ abe.

⁶ Kọshare kọshare rọ ohri rẹ irherẹn na sa re emu rẹ ẹkpẹvwẹ nana, ka riọ vwẹ ẹdia ọfuanfon kidie ọye ọ rọ ma fon.

⁷ Izobo rẹ abe ẹriọ na kugbe izobo rẹ umwemwu na oghẹre ọvuọvo, urhi ọvuọvo re herọ kẹ ayen, orherẹn rọ gọ ẹgua na kọye reyọ.

⁸ Orherẹn ro ze izobo rẹ ẹtorhẹ na kẹ ohwo kọye re reyọ ophiẹn rẹ eranvwe re vwo ze izobo na.

⁹ Izobo kizobo rẹ eka ra kakare vwẹ enyerhanre vẹ e ra vwẹ oze kaka eyẹ e ra vwẹ ẹvwẹrẹ kake ejobi ye ẹkẹn ro te orherẹn ro vwiro ze izobo na.

¹⁰ Izobo kizobo rẹ eka re duvwuru, ra vwẹ evwri gua eyẹ ọyaya ejobi ke dia ẹkẹn ro te emọ rẹ Erọn ejobi, ọ ro te ọvo ri te ọrivẹ.

¹¹ Ọnana ke rha urhi rẹ izobo rẹ ufuoma rẹ ohwo se ze kẹ Ọrovwohwo.

¹² Ọ da dianẹ ohwo rhi ze izobo rẹ ẹkpẹvwẹ, ọ Me vwẹ ikara phepheghe ra vwẹ evwri gua kugbe vwọ ba ẹkpẹvwẹ rọye na, ọ Me rha reyọ ikara ro jephuo ra vwẹ evwri ghworo vẹ ikara rẹ eka rẹ evwri muru vwọ ba.

¹³ Ọ Me reyọ ikara ro phuru vwọ ba izobo rẹ ufuoma rọye ro zeri vwo ru ẹkpẹvwẹ.

¹⁴ Vwẹ ọtiọye na ikara ọvo kọye o vwo ze vwẹ oma rẹ izobo ọvuọvo, rọ dia ẹkpẹvwẹ kẹ Ọrovwohwo, kọ dia ẹkẹn ro te orherẹn ro ku ọbara rẹ izobo rẹ ufuoma na.

¹⁵ Eranvwe re vwo ze izobo rẹ ufuoma rọye na rọ vwọ kpẹvwẹ akpẹvwẹ na ka ghwa riọ ejobi re vwẹ ẹdẹ ọvuọvo yena, o jẹn emerha rọye chekọ re te urhiọke-e.

¹⁶ Ẹkẹvuọvo izobo rọye da dia ẹkpẹvwẹ rẹ ive eyẹ ẹkpẹvwẹ ro nẹ udu rhe, ka riọ vwẹ ẹdẹdẹ yena, o de chekọ asan riọ vwẹ ọke rhieri rọye,

¹⁷ ẹkẹvuọvo eranvwe rẹ izobo na de ji chekọ te ẹdẹ rẹ erha ka torhẹ kufia.

¹⁸ Ọ da dianẹ eranvwe rẹ izobo rẹ ufuoma phrọke re te ẹdẹ rẹ erha ra da riọ, yẹ ohwo ro ze izobo na gbe reyọ-ọ, o gbi fi erere kẹ-ẹ; kẹ ẹgua kọye ọ epha, ohwo rọ rerọ kọ ghwa orukuruku rọye.

¹⁹ Eranvwe ro te emu kemu ro jẹfuọn ejobi e jo ohwo riọ-ọ, a Me torhẹ kufia. Ihwo re oma rẹ ayen fonro ejobi sa re eranvwe,

²⁰ ẹkẹvuọvo ohwo ro vwo ẹgua vwẹ oma rọye da re eranvwe re vwo ze izobo rẹ ufuoma kẹ Ọrovwohwo, ke mu ohwo yena imu.

²¹ Ohwo da rha vwẹ oma te emu ro jẹfuọn, o wene ijẹfuọn na dia ọ rẹ ohwo rẹ akpọ eyẹ ọ re eranvwe ro jẹfuọn eyẹ ẹgua rẹ ijẹfuọn ọfa dede ohwo yena da re emu re vwo ze izobo rẹ ufuoma kẹ Ọrovwohwo na, ke ji mu ohwo yena imu.

²² Ọrovwohwo na da ta kẹ Mosis nẹ,

²³ Ta kẹ ihwo rẹ Izrẹl nẹ ovwan ria ivwri-i, ọ rẹ erhuẹn ọshare eyẹ ọ rẹ ogodẹ eyẹ ọ rẹ ẹvwe.

²⁴ Ivwri rẹ eranvwe ro ghwughwu rẹ obọ rọye kugbe ivwri eranvwe rẹ eranvwe ọfa hweri we se vwo ru emu kemu ro jẹ ovwan ejobi, ẹkẹvuọvo o vwo ọke ọvo rẹ ovwan vwọ riọ-ọ.

²⁵ Kidie ohwo kohwo rọ re ivwri rẹ eranvwe ra vwọ torhẹ izobo kẹ Ọrovwohwo ke mu ohwo yena imu.

²⁶ Ọfa ovwan ria ọbara kaka-a, owene ọ dia ọbara rẹ eranvwe vẹ iphoro eyẹ eranvwe rọ otọ na rẹ ovwan dia na ejobi.

²⁷ Ohwo kohwo rọ re ọbara ejobi, ke mu ohwo yena imu.

²⁸ Ọrovwohwo da ta kẹ Mosis nẹ,

²⁹ Ta kẹ ihwo rẹ Izrẹl nẹ, Ohwo ro che ze izobo rẹ ufuoma kẹ Ọrovwohwo jọ vwẹ ẹkpẹvwẹ rọye rhe Ọrovwohwo; nẹ oma rẹ izobo rẹ ufuoma rọye na.

³⁰ Ọ Me vwẹ abọ rọye reyọ ẹkpẹvwẹ rẹ erhanre na rhe Ọrovwohwo, ọ Me reyọ ivwri kugbe evie rẹ eranvwe na rhe, rere e vwo kpogho ivie na rọ dia ẹkpẹvwẹ rẹ edjuo kẹ Ọrovwohwo.

³¹ Orherẹn na Me torhẹ ivwri na vwẹ enu rẹ agbada na, ẹkẹvuọvo ivie rẹ eranvwe na kọ dia kẹ Erọn vẹ emọ rọye.

³² Ekpoghoawo rẹ obọrhe rọ eranvwe na wọ Me vwọ kẹ orherẹn na rọ dia ẹkpẹvwẹ ro nẹ izobo rẹ ufuoma rẹ ovwan rhe;

³³ Orherẹn na rọ hẹ ohri rẹ emọ rẹ Erọn na rọ reyọ ọbara vẹ ivwri rẹ eranvwe na ze izobo rẹ ufuoma na kọye ri vwo ekpoghowọ rẹ obọrhe rẹ eranvwe na.

³⁴ Kidie Me reyọ ivie rẹ eranvwe na re kpoghori na kugbe ekpoghowọ ra vwọ kpẹvwẹ na, nẹ oma rẹ izobo rẹ ufuoma rẹ ihwo rẹ Izrẹl ejobi, Me da vwẹ ayen kẹ Erọn orherẹn na ọ vẹ emọ rọye ejobi, rọ dia osa rẹ ihwo rẹ Izrẹl hwa kẹ ayen bẹdẹ bẹdẹ.

³⁵ Ọnana ẹkẹn ro te Erọn vẹ emọ rọye vwẹ oma rẹ izobo ra torhẹ kẹ Ọrovwohwo na, re ru fon kẹ ayen vwẹ ẹdẹ rẹ a vwẹ ayen mu irherẹn nẹ ayen ga Ọrovwohwo,

³⁶ Ọrovwohwo ri jiji nẹ ihwo rẹ Izrẹl vwẹ Ọnana kẹ ayen, vwẹ ẹdẹ ra vwọ vwẹ evwri ghworo ayen, Ọnana ẹkẹn osa ro te ayen bẹdẹ nẹ edje ra ro edje.

³⁷ Ọnana urhi rẹ Izobo rẹ ẹtorhẹ na, ọ rẹ izobo rẹ ọka, ọ rẹ izobo fiki rẹ izobo rẹ umwemwu, o rẹ izobo rẹ abe, ọ rẹ izobo rẹ evwomuo, kugbe ọ rẹ izobo rẹ ufuoma,

³⁸ e rẹ Ọrovwohwo na ji urhi rọye kẹ Mosis vwẹ enu rẹ ugbenu ri Sinae vwẹ ẹdẹ ro vwo jiji kẹ Ihwo rẹ Izrẹl nẹ ayen vwẹ ẹkpẹvwẹ rayen rhe Ọrovwohwo vwẹ evun rẹ aton ri Sinae na.