Livitikọs 6 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Ọrovwohwo da ta kẹ Mosis,

² Ọ da dianẹ ohwo ọvo ru umwemwu rọ da chọ urhi rẹ esegbuyota rẹ Ọrovwohwo na rọ da phiẹn ọrivẹ rọye vwọ ghware vwẹ oma re emu kemu ra vwọ kẹ yọnre eyẹ igho re vwo bru osa re emu ra dẹre, eyẹ kẹ uji echo, eyẹ oshenyẹ rẹ ọrivẹ rọye,

³ eyẹ kemu kemu ro ghwruru ọye ọ mrẹre rọ da vwọnrọn ofian kpahọ, ro de duvwu iyori rẹ efian eyẹ kẹ eghẹre re imu etiọye efa rẹ ihwo dia de ruẹ na keye o ruru ro de ru umwemwu,

⁴ rẹ ohwo ro ru umwemwu tiọnana da re abe, kọ vwẹ emu ro chori na kpo adia rọ da reyọ, eyẹ obo rọ vwẹ oshenyẹ vwo na, eyẹ emu ra vwọ kẹ yọnre na, eyẹ obo ri ghwruru rọ mrẹ rhọrọ,

⁵ eyẹ kemu kemu ro duvwu iyori re eku phihọ na; ọ Me hwa ayen ejobi tototo, ọ Me rha hwa abọ ọvo rẹ ẹbẹre iyori kpahọ vwọ kẹ ohwo ro vwo emu na, vwẹ ẹdẹ ro de che ze izobo fiki rẹ abe rọye.

⁶ Kọ vwẹ emu re izobo rẹ abe rọye vwo rhe Orherẹn na ro ze kẹ Ọrovwohwo, egbo ro vwo eka-an vwẹ usun rẹ uchuru na, ro mu uwan rẹ izobo rẹ abe na,

⁷ Orherẹn na Me reyọ vwọ gọ iye rẹ arhuẹrẹ kẹ Ọrovwohwo re a vwọ gọ ẹgua no oma vwẹ obaro rẹ Ọrovwohwo, ke vwo ghovwo emu kemu rẹ ohwo ruẹ ọ Me re abe.

Irhi rẹ Izobo Efa

⁸ Ọrovwohwo ke rha ta kẹ Mosis nẹ,

⁹ Ji urhi kẹ Erọn ve emeshare rọye, Ọnana urhi rẹ izobo rẹ ẹtorhẹ na. E jẹn izobo rẹ ẹtorhẹ na dia enyerhanre rọ enu rẹ agbada na nẹ ason re te irhiọke, erhanre rẹ agbada na Me a la vwọ ọke ejobi.

¹⁰ Orherẹn na mi ku ewun ọfuanfon phihọ oma o mi rhe ku ewun rẹ awọ ọfuanfon phihọ, o mi hwerhe iwurhie rẹ izobo rẹ ẹtorhẹ na nẹ enu rẹ agbada na, o mi ku ayen phihọ akakọ rẹ agbada na.

¹¹ Kẹsiẹye orherẹn na ki ku iwun rọye nẹ oma, o mi ku iwun efa phihọ, ọ Me ghwa iwurhie na nẹ erhọn rọ hẹ otafe kpo asan rọ fonro.

¹² Erhanre rọ hẹ enu rẹ agbada na yọ je la vwọ, o gbi fu-u, Orherẹn na Me vwẹ irhe mu erhanre na kirhiọke kirhiọke, ọ Me nabọ rhuẹrẹ izobo ra cha torhẹ na phihọ, ọ Me torhẹ ivwri rẹ izobo rẹ ufuoma na vwẹ enu rọye.

¹³ Kẹdẹ kẹdẹ ọye erhanre na vwọ la vwẹ enu rẹ agbada na, e jẹn erhanre rọye fuẹ-ẹ.

¹⁴ Ọnana ke rha urhi rẹ izobo rẹ ọka. Emọ re Erọn keye vwẹ ayen ze izobo kẹ Ọrovwohwo, vwẹ obaro rẹ agbada na.

¹⁵ Omwọvo Me ghwẹ ẹkuobọ vọn nẹ eka na ra nabọ duvwu na vwọ ba evwri rọye kugbe adjija na rọ hẹ enu rẹ izobo rẹ ọka na, ọ Me torhẹ Ọnana rọ dia ẹkẹn rẹ ẹkarohọ vwẹ enu rẹ agbada na, ro gbo ọnrhe ororo kẹ Ọrovwohwo.

¹⁶ Obo ri chekọ vwọ ejobi Erọn vẹ emọ rọye keye re ayen, kẹ ayen re ayen vwẹ ijephuo vwẹ asan ọfuanfon; vwẹ ọguan rẹ utughẹ ra da vwa oma na Etiyin ayen da riọ.

¹⁷ A reyọ obo ri phuẹ vwọ ba ayen kaka-a. Mẹvwẹ ọvo re vwẹ ẹkẹn nana kẹ ayen vwẹ usun rẹ emu rẹ izobo mẹ ra vwẹ erhanre torhẹ na ejobi, Ọnana emu rọ ma fon, vwẹ oma rẹ izobo rẹ umwemwu vẹ izobo rẹ abe ejobi je vwẹ ọtiọye ayen ji ru rhe.

¹⁸ Kọmọshare kọmọshare rẹ orua rẹ Erọn ejobi sa re Ọnana, Ọnana urhi rọ dia kẹ ovwan nẹ edje ra ro edje, emu kemu ejobi re vwo ze izobo ra vwẹ erhanre torhẹ kẹ Ọrovwohwo na, ohwo kohwo rọ vwẹ obo te ayen yo hirhe phihọ ọfuanfon.

¹⁹ Ọrovwohwo na da ta kẹ Mosis nẹ,

²⁰ Ọnana izobo rẹ Erọn vẹ emọ rọye che ze kẹ Ọrovwohwo vwẹ ẹdẹ ra cha vwẹ evwri ghworo na: ẹbẹre ọvo vwẹ ẹkẹn ihwe rẹ iputusẹ rẹ eka re duvwu nure kọye dia ẹkẹn rẹ ayen vwo ze izobo rẹ ọka kọke kọke ejobi, ubro ọvo rọye vwẹ ọke rẹ irhiọke ubro ro chekọ kẹ ọ rẹ ovwọnvwọn.

²¹ A Me nabọ vwẹ evwri gua kugbe vwẹ evun rẹ omoze rẹ ikara na; wọ Me mrẹ nẹ evwri nabọ muo yoyovwi, a nabọ ma ayen uchuche ẹkakọ re vwo ze izobo rẹ ọka vẹrhe na, wọ Me vwẹ ayen ze izobo ri gbo ọnrhen ororo kẹ Ọrovwohwo.

²² Orherẹn ro nẹ ohri rẹ emọ re Erọn na rhe, re vwo mu nẹ, ọ reyọ ẹdia rọye, ko ze izobo kẹ Ọrovwohwo kirobo rẹ urhi rọye dia bẹdẹ, a torhẹ ayen ejobi re kakare.

²³ Izobo re eka kizobo re eka rẹ orherẹn vwọ rhe ejobi a torhẹ ayen re ka-kare, a riọ-ọ.

²⁴ Ọrovwohwo na da ta kẹ Mosis nẹ,

²⁵ Ta kẹ Erọn vẹ emọ rọye nẹ, Ọnana urhi rẹ izobo rẹ umwemwu vwẹ asan re de hwe eranvwe re vwo ze izobo rẹ umwemwu na vwẹ obaro rẹ Ọrovwohwo, ọye ọ rọ ma fon.

²⁶ Orherẹn ro vwi ro ze kẹ umwemwu na kọye re riọ; evun rẹ asan ọfuanfon o da riọ, vwẹ evun rẹ ọguan rẹ utughẹ ra da vwa oma na.

²⁷ Kemu kemu rọ vwẹ oma te eranvwe na ejobi kọ dia ọfuanfon, ọbara rọye de rhe sun ku ewun ku wọ fọnrhọn vwẹ ẹdia ọfuanfon.

²⁸ Ẹvwẹrẹ re vwo chere nu ke hwe, ẹkẹvuọvo ọ da rha dia itaso rẹ ẹrovwo e vwo chere, a Me nabọ phọrọn hworhẹ ghworiẹ fuanfon.

²⁹ Kọshare kọshare vwẹ orhi rẹ irherẹn na sa riọ; ọye hẹ emu rọ ma fon.

³⁰ Ẹkẹvuọvo e jẹn ohwo re eranvwe re vwo ze izobo rẹ umwemwu ra reyọ ọbara rọye rọ evun rẹ utughẹ ra da vwa oma na-a, a vwọ gọ ẹgua vwẹ asan ọfuanfon na, a vwẹ erhanre torhẹ.