Livitikọs 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Izobo rẹ Ufuoma

¹ Ọ da dianẹ ẹkpẹvwẹ rẹ ohwo vwọ rhe kẹ izobo rẹ ufuoma eranvwe na da dia erhuẹn rẹ ọshare eyẹ ọ rẹ aye, ọ Me dia ọ ro jẹ eka ọvuọvo evwo vwẹ obaro rẹ Ọrovwohwo.

² Ọ Me ghwe obọ rọye kpahe uyovwi rẹ eranvwe na, o mi hwe vwe anurhoro rẹ utughẹ re a da vwa oma na; emọ re Erọn rẹ irherẹn na ki ku ọbara rọye riariẹ agbada na phihọ.

³ Vwẹ oma rẹ izobo rẹ ufuoma na, rọ dia ẹkpẹvwẹ ra vwẹ erhanre torhẹ kẹ Ọrovwohwo na, Ọ Me vwẹ ivwri ri rhurhu evun re eranvwe na ejobi vẹ ivwri rẹ oma rẹ ivun rọye ejobi,

⁴ vwọ ba ibiehu ivẹ rọye na kugbe ivwri ri rhurhu ayen ra ruẹ ikpoghoawọ rọye, kugbe ekuakua rẹ irhue rọye re bru kugbe ibiehu na.

⁵ Kẹsiẹye emọ rẹ Erọn ke torhẹ vwẹ enu rẹ agbada ra torhẹre rọ enu rẹ ituerhanre vẹ erhanre rọ enu rẹ agbada na; Ọnana ẹkpẹvwẹ rẹ erhanre, o ro gbo ọnrhen ororo kẹ Ọrovwohwo.

⁶ Ọ da rha dianẹ ogodẹ eyẹ ẹvwe ọ rẹ ọshare eyẹ ọ rẹ aye kọye o vwo ze izobo rẹ ufuoma kẹ Ọrovwohwo, Ọ Me dia ọ ro jẹn ekan ọvuọvo evwo.

⁷ Ọ da dia omogodẹ o rhi vwo ze izobo, ke ze vwẹ obaro rẹ Ọrovwohwo,

⁸ ọ Me ghwẹ obọ rọye kpahe uyovwi rẹ izobo na o mi hwe vwẹ obaro rẹ utughẹ ra da vwa oma na, emọ re Erọn mi ku ọbara rọye ku agbada na ejobi riariẹ,

⁹ Vwẹ oma rẹ izobo rẹ ufuoma na, ro dia ẹkpẹvwẹ ra vwẹ erhanre torhẹ kẹ Ọrovwohwo na, ọ Me vwẹ ivwri rọye vwọ ba urhurhuvwu rọye ra nabọ bru ruẹ ubeku rẹ ugbuko mamọ, o vẹ ivwri rẹ ivun rọye ejobi,

¹⁰ kugbe ibiehu rọye ivẹ na te ivwri ri rhurhu ayen ruẹ ikpoghoawọ, kugbe ekuakua rẹ irhue rọye re bru nene ibiehu na vwo ze.

¹¹ Orherẹn na kọ torhẹ ayen vwẹ enu rẹ agbada na, kọ dia emu rẹ a vwẹ erhanre torhẹ vwọ kẹ Ọrovwohwo.

¹² Izobo na da dia ẹvwe, kọ vwọ kpẹvwẹ Ọrovwohwo,

¹³ ọ Me ghwẹ obọ rọye kpahe uyovwi rọye, o mi hwe vwẹ obaro rẹ utughẹ ra da vwa oma na; emọ re Erọn mi ku ọbara rọye riariẹ agbada na phihọ.

¹⁴ Ọ Me reyọ ivwri ri rhurhu ivun rọye vẹ e re enu rayen, vwo ze izobo rẹ ẹtorhẹ na kẹ Ọrovwohwo,

¹⁵ kugbe ibiehu ive na vẹ ivwri ri rhurhu ayen ruẹ ikpoghoawọ rọye, kugbe ekuakua rẹ irhue rọye re bru nene ibiehu na.

¹⁶ Orherẹn na kọ torhẹ ayen vwẹ enu rẹ agbada na kọye emu re vwo ze izobo rẹ erhanre ro gbo ọnrhen ororo. Ivwri re eranvwe ejobi e rẹ Ọrovwohwo.

¹⁷ Ọnana urhi rọ dia iji kẹ ovwan nẹ edje ta ruẹ edje, vwi kasan kasan rẹ ovwan cha dia ejobi nẹ ovwan rha re ivwri eyẹ ọbara rẹ eranvwe ọfa-a.