Livitikọs 22 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ẹfuọn rẹ Izobo

¹ Ọrovwohwo na da ta kẹ Mosis nẹ,

² Ta kẹ Erọn vẹ emeshare rọye nẹ ayen kẹnẹ oma kẹ emu efuanfon rẹ ihwo rẹ Izrẹl, rẹ ayen ru fon kẹ vwẹ, rere ayen vwọ je odẹ ọfuanfon mẹ egbe kuo; Mẹvwẹ Ọrovwohwo na.

³ Ta kẹ ayen nẹ, Ohwo rẹ orua re ovwan na nẹ uvwiẹ re te uvwiẹ de si kẹrẹ emu efuanfon na, rẹ ihwo rẹ Izrẹl ru fon kẹ Ọrovwohwo na, ye ekpuyovwi rọye ji evun ri jẹfuọn, ohwo yena ke bro kufia nẹ obaro mẹ? Mẹvwẹ Ọrovwohwo na

⁴ Ohwo kohwo rọ unurhoro rẹ Erọn ejobi rọ mwa oti eyẹ ko hwẹ ọbara sa re vwẹ emu ọfuanfon na-a bẹsiẹ rọ vwọ fon nẹ ijẹfuọn na, ohwo kohwo rọ vwẹ obọ te emu ro jẹfuọn vwẹ oma rẹ orivwi eyẹ ohwo ro hwẹ ameoma,

⁵ ohwo ro je vwẹ obọ te emu kemu ro kpono ro se gbe ohwo ẹgua ejobi eyẹ ohwo rọ vwẹ oma te emu ẹgha, oghẹre rẹ ẹgua egbe ro rhere ejobi.

⁶ Ohwo yena rọ vwẹ oma te erọvwọ ọtiọye na kọ dia vwẹ ijẹfuọn re te ovwọnvwọn, ọ rha sa re vwẹ emu ọfuanfon na-a jokpa nẹ ọ ra họ oma rọye vwẹ evun rẹ ame.

⁷ Ọnre de kpo otọ nu kẹsiẹye ọ ke fon, tavwe ọ ke sa re vwẹ emu ọfuanfon na, kidie ọyena emu rọye.

⁸ Emu rọ fian ghwu eyẹ ọ re eranvwe hweri e jọ riọ-ọ, o de rhe miovwo oma rọye vwẹ ẹgua egbe. Mẹvwẹ Ọrovwohwo na.

⁹ Gbe jẹn ayen yọnrọn urhi mẹ, ayen de rhe ru imwemwu fiki rọye ayen de rhe ghwu fiki rọye siẹ rẹ ayen de gbe ẹgua vwẹ oma rayen: Mẹvwẹ Ọrovwohwo ro ru ayen fon na.

¹⁰ Ọrhorha sa re vwẹ emu ọfuanfon na-a. Ọrhorha ro wo orherẹn eyẹ ohwo re durhie iruo sa re vwẹ emu ọfuanfon na-a,

¹¹ ẹkẹvuọvo orherẹn da vwẹ igho dẹ ọviẹn kẹ oma rọye, ọviẹn na sa re vwẹ emu na; emọ ra dia uwevwi rọye vwiẹ ejobi sa re vwẹ emu na.

¹² Ọmọtẹ rẹ orherẹn da rọvwọ ohwo gheghe ọmọtẹ yena rha sa re vwẹ emu ọfuanfon re vwo ze izobo na-a.

¹³ Ẹkẹvuọvo ọmọtẹ rẹ orherẹn da dia ayeuku eyẹ kẹ ọshare senrọn, ro rhe vwo ọmọ-ọ, o de kpo kpo uwevwi rẹ ọsẹ rọye rhe dia kerẹ ọke rọ vwọ omotete, kọ sa re vwẹ emu rẹ ọsẹ rọye na, dede na ohwo ọfa rọ obo otafe sa re vwọ-ọ.

¹⁴ Ohwo da re vwẹ emu ọfuanfon na rọ rha riẹ-ẹn, kọ hwa obo rọ rere na akuori ọ Me vwọ kẹ orherẹn na.

¹⁵ E jẹn orherẹn na gbe emu ọfuanfon rẹ ihwo rẹ Izrẹl na ẹgua-a, e rẹ ayen vwo ze kẹ Ọrovwohwo na,

¹⁶ rọ da nẹrhẹ ayen ru umwemwu kugbe abe, vwẹ oma rẹ ẹriọ re emu ọfuanfon na. Kidie Mẹvwẹ Ọrovwohwo ro ru ayen fon na.

¹⁷ Ọrovwohwo na da ta kẹ Mosis nẹ,

¹⁸ Ta kẹ Erọn vẹ emeshare rọye vẹ ihwo rẹ Izrẹl ejobi nẹ, Ọke rẹ ohwo rẹ uwevwi rẹ Izrẹl eyẹ ọrhorha rọ hẹ Izrẹl de rhe ze izobo rọye, owenẹ o dia osa rẹ ive ro veri eyẹ izobo ro di nẹ udu rhe o che ze kẹ Ọrovwohwo kerẹ izobo rẹ ẹtorhẹ,

¹⁹ re a ke reyọ wọ Me reyọ eranvwe ọshare ro vwo oka-a vwo ze, ọ re erhuẹn eyẹ ogodẹ eyẹ ẹvwe.

²⁰ Ovwan vwẹ emu ro vwo eka vwo ze izobo-o kidie a cha reyọ-ọ.

²¹ Ohwo da vwẹ izobo re ufuoma rhi vwo ze izobo kẹ Ọrovwohwo na, ọ da dia ive ro veri eyẹ ẹkpẹvwẹ ro nẹ udu rhe, ọ dia erhuẹn eyẹ ogodẹ, jọ gba dẹn o vwo oka ọvuọvo-o, kẹsiẹye a ke reyọ.

²² Eranvwe ro rhuẹro eyẹ ọ ro vwirhi asan eyẹ ọ rọ mwa ora eyẹ ọ ro kuẹ ivun eyẹ ọ ro mwa evwua, ovwan vwẹ eyena ze izobo kẹ Ọrovwohwo na-a, a je torhẹ etieye na vwẹ agbada re ẹga na vwọ kẹ Ọrovwohwo-o.

²³ Erhuẹn ọshare eyẹ omogodẹ re asan ọvo vwẹ oma rọye de gro nọ ọrivẹ eyẹrẹ kọ krẹ nọ ọrivẹ, asan vwẹ ọyena ze izobo rẹ ẹkpẹvwẹ ro nẹ udu rhe; ẹkẹvuọvo ọ da dia ẹkpẹvwẹ rẹ ive re veri a sa reyọ-ọ.

²⁴ Eranvwe rẹ ivwrite rọye ghwiẹre eyẹ kọ pẹtiẹre eyẹ obruru we vwo ze izobo kẹ Ọrovwohwo-o eyẹrẹ e ze vwẹ otọ rẹ ovwan na-a;

²⁵ eranvwe rẹ ovwan mie ọrhorha we vwo ze izobo rẹ emuọre kẹ Ọghẹnẹ rẹ ovwa-an. Ri vwo oka vwẹ oma na, fikirobo rẹ ayen vwo vwo oka na, a gbe sa reyọ ayen mie we-e.

²⁶ Ọrovwohwo na da rha ta kẹ Mosis nẹ,

²⁷ Erhuẹn eyẹ ogodẹ eyẹ ẹvwe de vwiẹ, ọ vẹ ọmọ ro vwiẹri na Me dia kugbe ẹdẹ ighwrẹn, kẹ ẹdẹ ẹrenren yanran yo teri ka sa reyọ vwo ze izobo rẹ ẹtorhẹ kẹ Ọrovwohwo na.

²⁸ Ovwan hwe otu na vẹ ọmọ rọye ẹdẹ ọvo-o owenẹ ọ dia erhuẹn eyẹ ogodẹ

²⁹ We de ze izobo kẹ Ọrovwohwo na, we mi ruo rere a vwọ sa reyọ mie ovwan.

³⁰ Vwẹ ẹdẹdẹ yena a vwọ riọ, ovwan jẹn emerha rọye vwo phrọke-e, Mẹvwẹ Ọrovwohwo na.

³¹ Vwẹ eriyin na ovwan ke yọnre irhi mẹ re we ru ayen. Mẹvwẹ Ọrovwohwo na.

³² Ovwan rhe miovwo odẹ ọfuanfon mẹ-ẹ, ẹkẹvuọvo e ja vwẹ ọghọ kẹ vwẹ vwẹ ohri rẹ ihwo rẹ Izrẹl :Mẹvwẹ Ọrovwohwo ro ru ovwan fon,

³³ rọ reyọ ovwan vwo nẹ otọ rẹ Ijipt rhe rọ dia Ọghẹnẹ rẹ Ovwan: Mẹvwẹ Ọrovwohwo na.