Livitikọs 17 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Asan Ọvuọvo e de ze Izobo

¹ Kọye Ọrovwohwo na da ta kẹ Mosis,

² Ta kẹ Erọn vẹ emeshare rọye, kugbe ihwo rẹ Izrẹl ejobi nẹ, Ọnana emu rẹ Ọrovwohwo na vwo jiji.

³ Ọ da dianẹ ohwo rẹ uwevwi rẹ Izrẹl na de hwe erhuẹn ọshare eyẹ omogodẹ eyẹ ẹvwe vwẹ evun rẹ erhọn na, eyẹ otafe o de hwe,

⁴ o rhe muo rhe obaro rẹ unurhoro rẹ utughẹ ra da vwa oma na-a, rọ da vwọ kpẹvwẹ Ọrovwohwo na vwẹ obaro rẹ ọgarivi rẹ Ọrovwohwo na-a, ke kere ohwo yena phihọ ohwo rọ re abe rẹ ọbara; kugbe ẹgua rẹ ọbara ehwe; ke sio nẹ ohri rẹ ihwo rọye.

⁵ Ọnana kọ dia ọtiọye rere ihwo rẹ Izrẹl vwọ reyọ eranvwe rayen hweri vwẹ evun rẹ aghwa, vwo rhe Ọrovwohwo na, vwo rhe orherẹn na vwẹ unurhoro rẹ utughẹ ra da vwa oma na, rere e hwe ayen vwo ze izobo rẹ ufuoma vwọ kẹ Ọrovwohwo na.

⁶ Orherẹn na Me fẹrẹ ọbara rọye ku agbada rẹ ẹga rẹ Ọrovwohwo na vwẹ asan unurhoro rẹ utughẹ ra da vwa oma na, Ọ Me rha torhẹ ivwri rẹ eranvwe na re o gbo ọnrhe ororo kẹ Ọrovwohwo na.

⁷ Vwẹ ọtiọye na ayen rhe che hwe eranvwe rayen kẹ ẹdjọ rẹ aghwa-a, e re ayen bẹbẹ gọ na. Ọnana urhi re vwo sun ayen bẹdẹ nẹ edje ra ro edje.

⁸ Wọ ke rha ta ka ayen nẹ, ohwo kohwo ro hẹ uwevwi rẹ Izrẹl, eyẹ ọrhorha rọ ohri rayen, ro ze izobo rẹ ẹtorhẹ eyẹ ẹkpẹvwẹ,

⁹ rọ rha ghwa rhe unurhoro rẹ utughẹ ra da vwa oma na-a, rere ọ reyọ vwo ze kẹ Ọrovwohwo-o ohwo yena ke sio nẹ otu rẹ ihwo rọye.

A Gha Ọbara

¹⁰ Ọ da dianẹ ohwo rẹ uwevwi rẹ Izrẹl, eyẹ ọrhorha rọ ohri rayen na da re ọbara, ki mi hirhe opharo mẹ ku ohwo yena rọ re ọbara na, mi mi sio nẹ ohri rẹ ihwo rọye.

¹¹ Kidie arhọ rẹ oma na evun rẹ ọbara na ọ epha, Me ke rha reyọ kẹ ovwan vwẹ enu rẹ agbada rẹ ẹga na rere a vwọ gọ ẹgua nẹ ovwan oma, kidie ọbara na ọye si ẹgua nẹ ohwo oma, fiki rẹ arhọ rọ evun rọye.

¹² Fiki rẹ Ọnana kọye Me vwọ ta kẹ ihwo rẹ Izrẹl, nẹ e jẹn ohwo ọvo ria ọbara vwẹ ohri rẹ ovwa-an, e ji jẹ ọrhorha rọ ohri rẹ ovwan re ọbara-a.

¹³ Ohwo kohwo rọ uwevwi rẹ Izrẹl eyẹ ọrhorha rọ ohri rayen, rọ sa eranvwe eyẹ ọphran hwe, ọ da dia ọ ra sa ria ejobi o mi su ọbara rọye ejobi tototo phihọ otọ ọ Me ghwẹ ekpẹn rhurho.

¹⁴ Kidie arhọ ri keranvwe keranvwe ejobi ọye ọbara rọye; kọye Me vwọ ta kẹ ihwo rẹ Izrẹl, nẹ ovwan ria ọbara ri keranvwe keranvwe-e, kidie arhọ ri kemu kemu ejobi ọye ọbara rọye, Ohwo rọ rerọ ejobi ke hwe kufia.

¹⁵ Ohwo kohwo rọ rha re eranvwe rọ fian ghwu eyẹ ọ rẹ eranvwe rẹ eranvwe ọfa hweri, owene ọ dia ọmotọ eyẹ ọrhorha, jọ fọnrhọn emwa rọye, rere ọ je họ oma rọye vwẹ evun rẹ ame, ọ Me rha dia vwi te ijẹfuọn re te ovwọnvwọn.

¹⁶ Ẹkẹvuọvo ọrha fọnrhọn emwa rọye rọ da họ oma rọye-e, kọ ghwa orukuruku rọye.