Livitikọs 16 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ẹdẹ Ra vwọ Gọ Ẹgua nẹ Oma

¹ Ọrovwohwo da ta kẹ Mosis, rẹ emeshare rẹ Erọn ivẹ vwo ghwu nu, ri si kẹrẹ obaro rẹ Ọrovwohwo ri de ghwu na,

² Ọrovwohwo da ta kẹ Mosis, Ta kẹ Erọn oniọvo wẹn nẹ ọ rha vwẹ ọke ejobi ro asan ọfuanfon na rọ hẹ evun re utughẹ na-a, vwe obaro re akpanurhe rẹ arodọvwẹ ro enu rẹ ekpeti na, O de rhe ghwu, kidie Me cha phia vwẹ evun rẹ egho vwẹ enu rẹ akpanurhe rẹ arodọvwẹ na.

³ Ẹkẹvuọvo enẹ kọye Erọn cha ro asan ọfuanfon na, ọ vẹ upene rẹ erhuẹn ọshare ro vwo ze izobo fiki rẹ umwemwu kugbe egbo ro vwo ze izobo rẹ ẹtorhẹ.

⁴ O mi ku ewun ọfuanfon rẹ ukpoyibo phihọ, vẹ ibuluku rẹ ukpoyibo ro kuhọ oma rọye, rọ gba umuehu rẹ esada mu ehun, vẹ erhu rẹ ukpoyibo ro vwo tughẹ, enana keye hẹ iwun efuanfon na. Kọ vwẹ ame họ oma rọye, tavwe ro ki ku ayen phihọ.

⁵ O mi mie ọghwẹgbe rẹ ihwo rẹ Izrẹl na ikri ivẹ re o vwo ze izobo fiki rẹ izobo rẹ umwemwu, kugbe egbo ọvo re o vwo ze izobo rẹ ẹtorhẹ.

⁶ Erọn Me vwẹ erhuẹn ọshare na ze izobo fiki rẹ izobo rẹ umwemwu na vwọ kẹ oma obọ rọye, re vwenẹ ọ vwọ gọ ẹgua nẹ oma rọye vẹ uwevwi rọye.

⁷ Tavwe ọ ke reyọ ẹvwe ivẹ na, Ọ Me vwẹ ayen phia vwẹ obaro rẹ Ọrovwohwo na vwẹ anurhoro rẹ utughẹ ra da vwa oma na,

⁸ Erọn mi mu itẹ rẹ ẹvwe ive na, itẹ ọvo vwọ kẹ Ọrovwohwo na itẹ rivẹ ke rha vwọ kẹ Azazẹl.

⁹ Erọn Me reyọ ẹvwe rẹ itẹ rẹ Ọrovwohwo muru na vwo ze izobo fiki rẹ izobo rẹ umwemwu;

¹⁰ ẹkẹvuọvo ẹvwe rẹ itẹ re Azazẹl muru na ke jovwo ọkpokpọ vwọ kẹ Ọrovwohwo na ra vwọ gọ ẹgua no oma, re vwenẹ e vwo siobọ no rọ evun rẹ aton na bru Azazẹl.

¹¹ Erọn kọ cha vwẹ erhuẹn ọshare na phia vwo ze izobo fiki rẹ izobo rẹ umwemwu rọye, o mi rhe phorho ẹgua nẹ oma rọye vẹ uwevwi rọye. O mi rhi hwe erhuẹn ọshare na vwo ze fiki rẹ izobo rẹ umwemwu rọye.

¹² Ọ Me rha reyọ ẹphẹre rọ vọnre vẹ imwerhanre vwo ne enu rẹ agbada rẹ ẹga rẹ Ọrovwohwo na rhe, ọ Me rha ghwẹ ẹkuobọ ivẹ vọn vẹ ugboduma re duvwuru hahavwe; ọ Me ghwẹ ra ro evun rẹ asan ra vwẹ amwa tan na.

¹³ O mi phi ugboduma phihọ erhanre vwẹ obaro rẹ Ọrovwohwo na, rere ivwirhi rẹ ugboduma na vwo rhurhu akpanurhe rẹ arodọvwẹ na rọ enu rẹ okọ na rẹ irhi rẹ Ọrovwohwo epha na, re vwenẹ o vwo je ghwo;

¹⁴ Ọ Me reyọ emerha rẹ ọbara rẹ erhuẹn ọshare na, Ọ Me vwẹ urhiabọ fẹrẹ ku obaro rẹ akpanurhe rẹ arodọvwẹ, Ọ Me fẹrẹ ku obaro rẹ ekpeti na asieghwrẹ.

¹⁵ Tavwe o ki rhi hwe ẹvwe ro che vwo ze izobo fiki rẹ umwemwu kẹ ihwo na ejobi, ọ Me reyọ ọbara rọye ra ro evun rẹ asan ra vwe amwa tan na, o mi ruo kirobo ro ru ọ rẹ erhuẹn ọshare na, ọ Me fẹrẹ ku enu rẹ akpanurhe rẹ arodọvwẹ na kugbe obaro rọye,

¹⁶ kẹ ọye o vwo phorho ẹgua nẹ asan ọfuanfon na, fiki rẹ ijẹfuọn rẹ ihwo rẹ Izrẹl vẹ oruchọ rayen, vẹ imwemwu rayen, otiọye o ji ru vwẹ evun rẹ utughẹ ra da vwa oma na, ro hẹ evun rẹ ohri rẹ ijẹfuọn rayen na.

¹⁷ E jẹn ohwo ọvuọvo dia evun rẹ utughẹ ra da vwa oma na-a vwẹ ọke rọ da cha ruọ rere o phorho ẹgua nẹ asan ẹshẹ na, bẹsiẹ ro vwo no rhe ro rhi vwo phorho oma rọye vẹ uwevwi rọye kugbe ukoko rẹ ihwo rẹ Izrẹl ejobi nu.

¹⁸ Tavwe rọ ke yanran kpo obo agbada rẹ ẹga na rọ obaro rẹ Ọrovwohwo na o mi phorho ejobi nu, O Me rhe reyọ ọbara rẹ erhuẹn ọshare na vẹ ọbara rẹ ẹvwe na, o mi ku ayen phihọ ighoro rẹ eranvwe re yariẹ agbada rẹ ẹga na ejobi na phihọ.

¹⁹ O Me vwẹ urhiabọ fẹrẹ ọbara na kuo asieghwrẹn, rere ọ vwọ fon nẹ ẹgua rẹ ijẹfuọn rẹ ihwo rẹ Izrẹl.

²⁰ Ọke ro de phorho ẹgua nẹ asan ẹshẹ na ọ vẹ utughẹ ra da vwa oma na kugbe agbada rẹ ẹga na ejobi nu, ọ Me reyọ ẹvwe ọkpokpọ na vwọ nẹ.

²¹ Erọn Me ghwẹ abọ ivẹ kpahe uyovwi rẹ ẹvwe ọkpokpọ na, Ọ Me rhọvwe imwemwu rẹ ihwo rẹ Izrẹl ejobi, phihọ uyovwi rẹ ẹvwe na, kugbe ẹgua rayen ejobi, vẹ urhi emiovwo, kugbe orukuruku rayen ejobi; Ọ Me ghwa ayen ejobi phihọ uyovwi rẹ ẹvwe na, Ọ da djẹ yanran kpo obo aton, ohwo ra rhuẹrẹ kpahe jovwo na kọye suo yanran.

²² Ẹvwe na kọye ghwa orukuruku rayen na ejobi vwo kpo asan re ohwo epha-a, ko siobọ no ro evun re aton na yanran.

²³ Tavwe Erọn ki rhivwi ru evun rẹ utughẹ ra da vwa oma na, Ọ Me ghwie iwun efuanfon na ro ku phihọ ro ke ro evun rẹ asan ẹshẹ na phihọ otọ, Ọ Me yan jẹ ayen vwo Etiyin;

²⁴ Ọ Me ra họ oma rọye vwẹ evun rẹ ame vwẹ asan ọfuanfon na, o mi ku iwun rọye phihọ oma, ọ Me yan phia, re ze izobo rọye rẹ ẹtorhẹ kugbe izobo rẹ ẹtorhẹ rẹ ihwo na, ọ Me rhuẹrẹ arhuẹrẹ kẹ oma rọye kugbe ihwo na.

²⁵ Ọ Me rha torhẹ ivwri rẹ eranvwe re vwo ze izobo fiki rẹ izobo rẹ umwemwu na vwẹ enu rẹ agbada rẹ ẹga na.

²⁶ Ohwo ro sun ẹvwe na kpo obo rẹ Azazẹl na kọ fọnrhọn emwa rọye ọ Me rha họ oma rọye vwẹ evun rẹ ame, kẹsiẹye ọ ke ro evun rẹ erhọn na.

²⁷ Erhuẹn ọshare re vwo ze izobo fiki rẹ izobo rẹ umwemwu na ọ vẹ ẹvwe rẹ izobo rẹ imwemwu na, ra vwẹ ọbara rẹ rayen rọ evun rẹ asan ẹshẹ na rẹ a vwọ gọ ẹgua na nu na, ke muo ro otafe nẹ evun rẹ erhọn na; a Me vwẹ erhanre torhẹ ophiẹn rayen vẹ uvwo rayen kugbe isọn rayen ejobi.

²⁸ Ohwo rọ torhẹ ayen na Me fọnrhọn emwa rọye ọ Me rha họ oma rọye vwẹ evun rẹ ame, kẹsiẹye ọ ke ro evun rẹ erhọn na.

²⁹ Ọnana kọ dia urhi re vwo sun ovwan bẹdẹ nẹ, vwẹ eghwrẹn, ẹdẹ ihwe rọye, ku wa vwẹ oja re oma rẹ ovwan, we rhe ru iruo-o, te ọmotọ te ọrhorha rọ ohri rẹ ovwan;

³⁰ kidie ẹdẹ nana ọye a vwọ gọ ẹgua nẹ ovwan oma; vwo nẹ imwemwu rẹ ovwan ejobi rere ovwan vwọ dia fuanfon vwẹ obaro rẹ Ọrovwohwo na.

³¹ Kẹ ovwan vwo ru ẹdidjala ẹdẹ rẹ omaerovwo ra vwẹ ọghọ kẹ, wa vwẹ oja re oma re ovwan; Ọnana iji ri bẹdẹ na.

³² Orherẹn ra vwẹ ori ghworo uyovwi re vwo mu orherẹn vwẹ ẹdia rẹ ọsẹ rọye, kọye cha gọ ẹgua na nu, yo ku iwun rẹ esada efuanfon rẹ ẹga na phihọ;

³³ O mi phorho ẹgua nẹ ẹshẹ na ejobi, o mi rhe phorho ẹgua nẹ utughẹ ra da vwa oma na vẹ agbada rẹ ẹga na, O ki rhe phorho ẹgua nẹ irherẹn na ejobi oma kugbe ihwo rẹ ukoko na ejobi.

³⁴ Ọnana kọ dia urhi re vwo sun ovwan bẹdẹ, re a vwọ gọ ẹgua nẹ ihwo rẹ Izrẹl oma ẹsiẹvo ẹgbukpe fiki rẹ imwemwu rayen ejobi Mosis de ghine ru ọtiobo rẹ Ọrovwohwo na jiji rayen vwọ kẹ.