Livitikọs 14 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Ọrovwohwo ke ta kẹ Mosis,

² Ọnana urhi rọ dia kpahe ẹdẹ rẹ orufuọn rẹ ọhọvwoti na. Kẹ a reyọ vwọ phia vwẹ obaro rẹ orherẹn na;

³ Orherẹn na Me yan nẹ evun rẹ erhọn na, orherẹn na Me nabọ fuẹrẹ. Emiavwe rẹ oti na de ghine kpore,

⁴ orherẹn na kọ tanẹ a vwi fiki rẹ ohwo re che ru fon na reyọ emephran ekpokpọ ivẹ re fonro kugbe urhe ri igedu kugbe isene kugbe ahworhẹ,

⁵ orherẹn na Me tanẹ ayen gbe hwe ọmọphran ọvo vwẹ ẹvwẹrẹ vwẹ enu rẹ ame rọ djẹ ọkẹre.

⁶ Ọ Me rha reyọ ọmọphran ọkpokpọ na vẹ urhe ri igedu na kugbe isene na vwọ ba ahworhe na, ọ mi dje ayen phihọ ọbara rẹ ọmọphran re hweri vwẹ ame rọ djẹ ọkẹre na;

⁷ Ọ Me fẹrẹ ku ohwo na re che ru fon nẹ oti na asiẹghwrẹn; kẹsiẹna o ki ghwoghwo nẹ oma rọye kpori, o mi siobọ nẹ ọmọphran ọkpokpọ na rọ rhan ro aghwa.

⁸ Ohwo re ru fon na Me ra fọnrhọn emwa rọye, ọ Me wanre ẹto rọye ejobi, ọ Me họ oma rọye, kọ fon; o de ru nu kọ ro evun rẹ erhọn na, ẹkẹvuọvo ọ Me vwerhẹ otafe rẹ utughẹ rọye ẹdẹ ighwrẹn.

⁹ Ẹdẹ rẹ ighwrẹn na da gba re ọ Me rhoma wanre ẹto rẹ uyovwi rọye ejobi nu; ọ Me wanre ẹto egba rọye vẹ ẹto ẹro rọye gbẹ ẹto rọye ejobi. Ọ Me rha fọnrhọn emwa rọye ejobi, ọ Me họ vwẹ evun rẹ ame, kẹsiẹye oma rọye ki kpo.

¹⁰ Ẹdẹ rẹrenren da gba nu ọ Me reyọ emegbo ivẹ ri vwo eka-an, kugbe omogodẹ rẹ aye rẹ ẹgbukpe ọvo ro je ekan evwo, vwọ ba izobo rẹ ọka ẹbẹre erha vwẹ ẹko ihwe rẹ ovwanvwọn rẹ eka na ra vwẹ evwri gua kugbe, kugbe ovwanvwọn rẹ evwri.

¹¹ Orherẹn ro che ruo fon na Me reyọ ohwo re che ru fon na ọ vẹ erọvwọ nana vwọ phia vwẹ obaro rẹ Ọrovwohwo, vwẹ asan unurhoro rẹ utughẹ ra da vwa oma na.

¹² Orherẹn na Me reyọ emegbo ọvo, o mi vwo ze izobo rẹ abe, ọ vẹ ovwanvwọn rẹ evwri na, O mi dju ayen vwo ze izobo rẹ edjuo vwẹ obaro rẹ Ọrovwohwo;

¹³ O mi rhe hwe omogodẹ na vwẹ asan re de hwe ọ rẹ izobo rẹ umwemwu na vẹ ọ rẹ ẹtorhẹ na, vwẹ evun rẹ ẹdia ọfuanfon na, kidie izobo rẹ abe na vẹ ọ ri fiki rẹ izobo rẹ umwemwu na, eye ẹkẹn rẹ orherẹn na: ọye ọ rọ ma fon ejobi.

¹⁴ Orherẹn na Me reyọ vwẹ ọbara rẹ izobo rẹ abe na, orherẹn na mi vwo te ẹroro rẹ orhọn rẹ obọrhe rẹ ohwo re che ru fon na, kugbe urhiabọ rode rẹ obọrhe rẹ ohwo na, kugbe urhiabọ rode rẹ owọrhe rẹ ohwo na.

¹⁵ Kẹsiẹye orherẹn na ke reyọ vwẹ ukoko rẹ evwri na o mi kuo phihọ ẹhẹrhobọ ọhwẹre rẹ ekpuyovwi rọye,

¹⁶ o mi dje urhiabọ rẹ obọrhe rọye phihọ evwri na rọ ẹhẹrhobọ ọhwẹre rọye na, ọ Me fẹrẹ evwri na abọ ighwrẹn ku obaro rẹ Ọrovwohwo.

¹⁷ Otọ rẹ evwri ro chekọ obọ rọye na, orherẹn na mi vwo te ẹroro rẹ orhọn rẹ obọrhe rẹ ohwo re ruẹ fuan na, kugbe urhiabọ rode rẹ obọrhe rọye kugbe urhiawọ rode rẹ owọrhe rọye, vwọ kpahe enu rẹ ọbara rẹ izobo rẹ abe na;

¹⁸ evwri ro rhe chekọ vwẹ obọ rẹ orherẹn na ko vwo te uyovwi rẹ ohwo re ruẹ fuan na. Kọye orherẹn na vwọ gọ ẹgua no oma vwẹ obaro rẹ Ọrovwohwo.

¹⁹ Orherẹn na mi rhe ze izobo rẹ umwemwu na, re ọ vwọ gọ ẹgua nẹ oma rẹ ohwo re ruẹ fuan na re ọ vwọ fon nẹ ijẹfuọn rọye. Kẹsiẹye o ki hwe eranvwe rẹ izobo rẹ ẹtorhẹ na,

²⁰ Orherẹn na Me vwẹ izobo rẹ ẹtorhẹ na kugbe rẹ ọka na ze vwẹ enu rẹ agbada na. Ke enẹ orherẹn na vwọ gọ ẹgua no oma, ke ọ fon.

²¹ Ẹkẹvuọvo ohwo na da dia oghẹre re udu rọye gbe gba ekuakua na-a, ọ Me reyọ omogodẹ rẹ ọshare ọvo vwo ze izobo rẹ abe re djuẹ na, vwọ gọ ẹgua no oma, kugbe ẹbẹre ọvo vwẹ ẹkẹn ihwe rẹ ovwanvwọn rẹ eka ra vwe evwri gbe kugbe ivẹ eyẹ inekuku ivẹ, ọtiobo rọ sa dẹ;

²² Ọ Me vwẹ ọvo ze izobo rẹ umwemwu ọrivẹ kẹ ọ rẹ izobo rẹ ẹtorhẹ.

²³ Ẹdẹ ẹrenren da gba nu ọ Me vwẹ ayen rhe orherẹn na fiki rẹ orufuọn rọye, vwẹ asan unurhoro rẹ utughẹ ra da vwa oma na, vwẹ obaro rẹ Ọrovwohwo na;

²⁴ Orherẹn na Me reyọ omogodẹ rẹ izobo rẹ abe na, kugbe ukoko rẹ evwri na, O mi dju ayen vwo ze izobo rẹ edjuo vwẹ obaro rẹ Ọrovwohwo.

²⁵ O mi hwe omogodẹ rẹ izobo rẹ abe na; Orherẹn na Me reyọ vwẹ ọbara rẹ izobo rẹ abe na, O mi vwo te ẹroro rẹ orhọn rọ obọrhe rẹ ohwo re che ru fon na, kugbe urhiabọ rode rẹ obọrhe rọye, kugbe urhiawọ rode rẹ owọrhe rọye.

²⁶ Orherẹn na mi rhe ku eme evwri phihọ ẹhẹrhobọ rẹ obọhwẹre rẹ obọ rọye;

²⁷ Ọ Me reyọ urhiabọ rẹ obọrhe rọye te evwri rọ obọhwẹre rọye na ọ Me fẹrẹ ku obaro rẹ Ọrovwohwo asiaeghwrẹn;

²⁸ Orherẹn na Me rha reyọ eme evwri ro chekọ vwẹ obọrhe rọye na te ẹroro rẹ orhọn rẹ obọrhe rẹ ohwo re ruẹ fuan na, kugbe urhiabọ rode rẹ obọrhe rọye, kugbe urhiawọ rode rẹ owọrhe rọye, vwẹ asan re ku ọbara rẹ izobo rẹ abe na phihọ

²⁹ evwri ro chekọ vwẹ obọ rẹ orherẹn na ko vwo te uyovwi rẹ ohwo re che ruẹ fuan na, vwọ gọ ẹgua no oma vwẹ obaro rẹ Ọrovwohwo.

³⁰ Kẹsiẹye, kọ vwẹ upene rẹ irure na eyẹ inekuku na rẹ ohwo na sa dẹ na ze izobo,

³¹ Ọvo ọ rẹ izobo rẹ umwemwu ọrivẹ ke vwọ kẹ izobo rẹ ẹtorhẹ na, ọ vẹ izobo rẹ ọka kẹ usun ọvo, Orherẹn na kọ gọ ẹgua no ohwo na oma vwẹ obaro rẹ Ọrovwohwo.

³² Ọnana ọye urhi rẹ orufuọn rẹ ohwo ro vwo emiavwe rẹ oti rọ sa mrẹ igho vwọ dẹ ekuakua rẹ orufuọn rọye-e.

³³ Ọrovwohwo na da ta kẹ Mosis vẹ Erọn nẹ

³⁴ ọke rẹ ovwan de rhi te otọ ri Kenan, re Me vwọ kẹ ovwan na, Mi de phi emiavwe rẹ oti phihọ uwevwi ọvo vwẹ otọ na re ovwan vwori na,

³⁵ ohwo ro vwo uwevwi na Me rhe ta kẹ Orherẹn na, nẹ Mi rori nẹ oghẹre rẹ emiavwe ọvo uwevwi mẹ.

³⁶ Orherẹn na Me tanẹ a ghwa emu ejobi nẹ evun rẹ uwevwi na tavwe re o ki re ni emiavwe na, rere e vwo je emu ejobi rẹ uwevwi na e se ijẹfuọn; e de ru etiọye nu Orherẹn na mi re ni uwevwi na.

³⁷ Ọ Me nabọ ni emiavwe na, oka rẹ emiavwe na da igbẹhẹ rẹ uwevwi na ye ọ epha kere ọgiọgiọ ye ọ vwara, oka na de rhe kpotọ vrẹn igbẹhẹ ri chekọ.

³⁸ Orherẹn na Me ro otafe rhe asan unurhoro rẹ uwevwi na, o Me kare uwevwi na ẹdẹ ighwrẹn.

³⁹ Ẹdẹ rẹ ighwrẹn na da gba nu orherẹn na mi rhivwi rhe rhi no oka rẹ emiavwe na da rho phihọ vwẹ enu rẹ igbẹhẹ rẹ uwevwi na,

⁴⁰ Orherẹn na Me tanẹ e si oragha rẹ emiavwe na epha nẹ evun re uwevwi na rere e re kuofia phihọ asan ro jẹfuọn vwẹ otafe re orere na,

⁴¹ O Me rha tanẹ a nabọ hroro evun rẹ uwevwi na ejobi tototo, unuhu re hrohro nẹ uwevwi na rhe ejobi a Me ra ghwẹ ayen kufia vwe asan ro jẹfuọn vwẹ otafe rẹ orere na,

⁴² Kẹsiẹye ihwo na ke reyọ oragha efa phihọ edia re si eragha na nu, Ọ Me rha rhoma rhare ayen kugbe uwevwi na ejobi

⁴³ Emiavwe na de rhe rhivwi rhe uwevwi ọvo na, re si eragha na nu ra rhare nu na,

⁴⁴ Orherẹn na Me rhoma re no, oka rẹ emiavwe na da rho phihọ vwẹ evun rẹ uwevwi na, yẹ omamọ rẹ emiavwe rẹ oti ro muoshọ hẹ evun rẹ uwevwi na, yẹ ijẹfuọn ọ epha,

⁴⁵ ọ Me guọghọ uwevwi na te otọ ro irhe te eragha te ekpẹn ejobi ọ Me ghwa ayen nẹ evun rẹ orere na vwo kpo asan ro jẹfuọn.

⁴⁶ Vwẹ ọtiọye na ohwo rọ ro evun rẹ uwevwi na vwẹ ọke ra vwọ kare ẹchẹ rẹ uwevwi na kọ dia vwi ijẹfuọn re te ovwọnvwọn,

⁴⁷ ohwo kohwo ro shevwerhẹ uwevwi yena kọ je fọnrhọn emwa rọye, kohwo kohwo rọ re emu vwẹ uwevwi na kọ fọnrhọn emwa rọye.

⁴⁸ Ẹkẹvuọvo orherẹn na da rhe ri no, oka re emiavwe na rha rho phihọ-ọ, ra vwọ rhare uwevwi na nu, orherẹn na ko ghwoghwo nẹ uwevwi na pha fuanfon kidie emiavwe na nuro.

⁴⁹ Vwọ kẹ orufuọn rẹ uwevwi na kọ reyọ emephran itete ivẹ, vwọ ba urhe rẹ igẹdu kugbe isene vẹ ahworhẹ,

⁵⁰ o mi hwe ọmọphran ọvo vwẹ evun rẹ ẹvwẹrẹ vwẹ asan ame rọ djẹ ọkere,

⁵¹ Ọ Me reyọ urhe ri igedu na vẹ ahworhe na vwọ ba isene na vẹ ọmọphran ọkpokpọ ro chekọ na, o mi duvwu ayen phihọ ọbara rẹ ọmọphran ro hweri nure kugbe evun rẹ ame na rọ djẹ ọkẹre na, ọ Me fẹrẹ ku uwevwi na abọ ighwrẹn.

⁵² Kẹ ọtiọye na ọye ọ vwọ reyọ ọbara rẹ ọmọphran na phorho uwevwi na ro da fon, te ame na rọ djẹ ọkere na kugbe ọmọphran ọkpokpọ na vẹ urhe ri igedu na vẹ ahworhẹ vẹ isene na,

⁵³ ọ mi rhe siobọ nu ọmọphran ọkpokpọ na re ọ rhan nẹ evun rẹ orere na kpo evun rẹ aghwa, kọye ọ vwọ gọ ẹgua nẹ evun uwevwi yena, o ke rhe dia fuanfon.

⁵⁴ Ọnana ọye urhi rẹ emiavwe rẹ oti ejobi vwọ kẹ ekpọmọsẹ,

⁵⁵ ọ da dia oti rọ evun rẹ ewun eyẹ uwevwi,

⁵⁶ kugbe asan rọ vwọre eyẹ ọ ro horhieri,

⁵⁷ kọye a vwọ riẹn nẹ o jẹfuọn eyẹ ọ fonro Ọnana ọye urhi rẹ oti.