Joshua 16 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ubrotọ ra vwọ kẹ Ifrem kugbe Manasse

¹ Ẹkẹn ro te uvwie ri Josef de nẹ Jọdan re te Jeriko, vwẹ obaro ọnre re ame ri Jeriko, ra rọ evun rẹ aghwa, nẹ Jeriko re te orho rẹ ugbenu vwẹ Bẹtẹl,

² nẹ Bẹtẹl re te Luz, ọ da rha wan etiyin vrẹn re te Atarọt, vwẹ ubrakpọ rẹ Akit,

³ ọ da rha wan rhe otọ vwẹ obuko ọnre re te ubrakpọ rẹ ihwo ri Jaflẹt rhiri re te ẹkuotọ rẹ Bethọron, a ke rhe mrẹ Gẹza, o de rhi vwo oba vwẹ obo abadi.

⁴ Ihwo ri Josẹf, Manasse vẹ Ifrem, da reyọ ekẹn uku rayen.

⁵ Ubrakpọ rẹ ihwo rẹ Ifrem vwẹ ekrekru rayen kẹ ọna: ughwru rẹ ukuẹriọ rayen vwẹ obaro ọnre da dia Atarọt-addar rhiri re te obenu ri Bethọrọn,

⁶ ughwru na da wan etiyin re te obo abadi Mikmetat da obọhwẹre ọnre; vwẹ obaro ọnre ughwru na de kurheriẹ o de hirhe aro ku Ta-anat-shiloh, ọ da wan yanran re te ovrẹn ri Janoah vwe obaro ọnre rọye,

⁷ nẹ Janoah ughwru na de rhe kpotọ re te Atarot kugbe Naarah, re duvwu Jeriko, o de rhi vwo oba vwi Jọdan.

⁸ Nẹ Tappuah, ughwru na da rhe wan fi obuko ọnre re te ẹtẹrhe ri Kanah, o de rhi vwo oba vwẹ obo abadi. Kẹ ọtiọye ukueriọ re ihwo rẹ Ifrem epha vwẹ ekrekru rayen,

⁹ vẹ irho re phihọ ovwarhe vwọ kẹ ihwo rẹ Ifrem vwẹ evun rẹ ukueriọ ri Manasse, irho yena vẹ ẹko rayen.

¹⁰ Dede na ye ayen sa djẹ ihwo ri Kenan re dia otọ na ejobi vwi Geza no-o; ọtiọye na ihwo ri Kenan ke dia uherevie rẹ ihwo rẹ Ifrem rhi te nonẹ na ẹkẹvuọvo ayen da rhe dia eviẹn ra gba vwo ruẹ iruo.