Joshua 11 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ephiokua ri Jabin vẹ Otu ri nenre

¹ Ọke ri Jabin ovie ri Hazọr vwo nyo ọnana, o de ji ohwo bru Jobab ovie ri Madọn, ji kugbe ovie ri Shimrọn, kugbe ovie rẹ Akshaf,

² kugbe ivie rẹ obohwẹre ọnre vwẹ obo orho rẹ igbenu na, kugbe obo Araba vwẹ obọrhe ọnre vwi Kinẹrọt, kugbe obo ushekpotọ, kugbe Nafotodor vwẹ obuko ọnre,

³ re te Kenan vwẹ obaro ọnre vẹ obuko ọnre, ihwo rẹ Amọr, ihwo ri Hẹt, ihwo ri Periz, kugbe ihwo ri Jebu vwẹ obo orho rẹ ugbenu, kugbe ihwo ri Hiv re hẹ otọ ri Hermọn vwẹ otọ ri Mizpah.

⁴ Ayen da yan phia, vẹ unuofovwi rayen ejobi, urogho rode na, buebu kerẹ ehavwo rọ oma rẹ urhie, vẹ iyesi buebu kugbe idjighere rẹ ofovwi.

⁵ Ivie nana ejobi de kuoma kugbe, ayen da rhe rhi mu erhọn kugbe vwẹ asan ame ri Mẹrọm, rhe họnre Izrẹl.

⁶ Ọrovwohwo da ta kẹ Joshua nẹ, Wọ djẹ oshọ rẹ aye-en, kidie odẹ rọ cha na vwẹ utiẹ ọkẹ ọtiọnana mi che phi ayen ejobi kua kẹ Izrẹl; ku we churu iyesi rayen kugbe wa me torhẹ idjighere rayen.

⁷ Ọtiọye na Joshua kọ rhe ro ayen kpregede ọ vẹ ihwo rẹ ofovwi rọye ejobi, vwẹ asan ame ri Mẹrọm, ayen da họrhọ ro ayen.

⁸ Ọrovwohwo de phi ayen phihọ obọ rẹ Izrẹl, ayen de hwe ayen ayen da djẹ ayen re te Sidọn Rode kugbe Misrefọtmaim, vwẹ obaro ọnre rhiri re te iyara ri Mizpeh; ayen de hwe ayen, bẹsiẹ rẹ ohwo ọvuọvo gbi chekọ-ọ.

⁹ Joshua de ru ayen kirobo rẹ Ọrovwohwo vuẹre; ọ da vwẹ ufi gba Iyesi rayen, ọ da torhẹ idjighere rayen.

¹⁰ Joshua de rhivwi vwẹ ọke yena, ọ da ra kua Hazọr, ọ da vwẹ ọlọkọ hwe ovie rọye, kidie Hazọr ọye uvi rẹ orho vwọ kẹ ivie rẹ ubrakpọ yena jovwọ.

¹¹ Ayen da vwẹ ọlọkọ hwe ihwo re herọ, a da ghwọrọ ayen ejobi; o vwo emu ọvuọvo rọ nwẹn re jovwo-o, ọ da tọrhe Hazọr.

¹² Irere rẹ ivie yena ejobi, kugbe ivie rayen ejobi. Joshua de mu ayen, ọ da vwẹ ọlọkọ hwe ayen, ghwọrọ ayen kakare, kirobo ri Mosis odibo rẹ Ọrovwohwo ji urhi kẹ.

¹³ Ẹkẹvuọvo o vwo orere ọvuọvo ro mudia phihọ enu rẹ ẹkuẹbe rẹ Izrẹl ghwọre-e, jokpa ri Hazọr ọvo; ri Joshua torhẹre.

¹⁴ Ekuakua rẹ Irere na ejobi kugbe ichuru re ayen, ihwo rẹ Izrẹl de mu ayen reyọ kẹ oma rayen, ẹkẹvuọvo ayen da vwẹ ọlọkọ hwe ohwo kohwo, bẹsiẹ rẹ ayen vwọ ghwọrọ ayen re, ayen yan jẹ obo re nwẹn vwo-o.

¹⁵ Kirobo rẹ Ọrovwohwo ji urhi kẹ Mosis odibo rọye, ọtiọye Mosis ji ji urhi ki Joshua, kẹ ọtiọye Joshua ruru; ọ jẹ emu ọvuọvo vwo-o vwẹ usun rẹ emu rẹ Ọrovwohwo ji urhi ki Mosis nẹ o ru na-a.

Joshua reyọ otọ na ejobi

¹⁶ Etiyin Joshua da reyọ etọ yena ejobi, orho rọ obo ugbenu na ejobi kugbe Nẹgeb vẹ etọ ri Goshẹn ejobi kugbe obo ushekpotọ na kugbe Araba ra ro irho rẹ obo ugbenu rẹ Izrẹl kugbe ishekpotọ rọye na,

¹⁷ nẹ ugbenu ri Halak, ro mu vwẹ ubrakpọ ri Seir, rhiri re te Ba-algad vwẹ iyara ri Lẹbanọn, vwẹ obotọ rẹ Ugbenu ri Hermọn. Ọ da reyọ ivie rayen ejobi, o de hwe ayen, ọ da teyọ ayen hwe.

¹⁸ Joshua vẹ ivie na de phi ofovwi krekri.

¹⁹ O vwo orere ọvuọvo rọ vẹ Izrẹl gba rhuẹre kugbe-e, jokpa rẹ ihwo re dia Hiv kugbe ihwo re dia Gibeọn; ayen da reyọ ayen ejobi vwe ofovwi.

²⁰ Kidie ọnana irueru rẹ Ọrovwohwo rere o ru udu rayen gan re ayen kpare ofovwi bru ihwo rẹ Izrẹl, rere a vwọ mrẹ asan vwọ ghwọrọ ayen kakare, aro rẹ ayen gbe dọ ohwo-o ẹkẹvuọvo ke hwerhe ayen nẹ otọ na kakare, kirobo rẹ Ọrovwohwo ji urhi kẹ Mosis.

²¹ Joshua da rhe vwẹ ọke yena, ọ da rhe djẹ ihwo rẹ Anakim nẹ orho rẹ ugbenu na, nẹ Hebrọn, nẹ Debir, nẹ Anab, ji nẹ irho rẹ ugbenu ri Juda, ji nẹ irho rẹ ugbenu rẹ Izrẹl; Joshua da guọghọ ayen vẹ irere rayen ejobi.

²² Ohwo rẹ Anakim ọvuọvo gbi chekọ vwẹ otọ rẹ ihwo rẹ Izrẹl na-a; jokpa ri Gaza, Gat, vẹ Ashdod, eye evo de chekọ.

²³ Kẹ ọtiọye Joshua wan reyọ otọ na ejobi, kirobo rẹ Ọrovwohwo ta kẹ Mosis, Joshua da vwọ kẹ Izrẹl vwọ riuku kirobo ra ghare ẹkẹn kẹ orua ọvuọvo. Ufuoma da rhe dia otọ na.