Jona 3 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ekuorhẹriẹ ri Ninivẹ

¹ Etiyin ota rẹ Ọrovwohwo de bru Jona rhe vwẹ obọ rivẹ, tanẹ,

² Vrẹn ru wọ kpo Ninivẹ, orere rode yena, rere wo re ghwoghwo aghwoghwo re me cha ta kẹ wẹ na.

³ Ọtiọye na Jona de vrẹn o de kpo Ninivẹ, kirobo rẹ ota rẹ Ọrovwohwo epha. Asakiephana Ninivẹ na okporere rode gangan, ẹdẹ erha ọye a yan ohẹhẹre rọye vrẹn.

⁴ Jona da ro evun rẹ orere na, ọ da yan ẹdẹ ọvo kẹ ọke kpo. O de ghwoghwo, Chekọ ẹdẹ ujuvẹ, ka cha ghwọrọ Ninivẹ te otọ!

⁵ Ihwo ri Ninivẹ de se Ọghẹnẹ gbuyota; ayen de ghwoghwo ewẹvwe e chiro, ayen da vwẹ isiso rhuo; nẹ ohwo rọ marho vwẹ ohri rayen re te omotete rẹ ayen.

⁶ Etiyin ikun de re duvwu ovie ri Ninivẹ, o de vrẹn nẹ ekete rọye ọ da ghwiẹ adagba rọye nu, ọ da vwẹ isiso rhuo, o de bru oma phihọ iwurhie.

⁷ O de ghwoghwo aghwoghwo wan Ninivẹ ejobi, Vwẹ ogangan rẹ urhi rẹ ovie vẹ ehọnvwọre rọye, E jẹn ohwo eyẹ eranvwe, ekru rẹ erhuẹn eyẹ igode, davwẹ emuọvo-o, e jẹn ayen ria-a eyẹ ayen da ame-e,

⁸ ẹkẹvuọvo e jẹn ohwo eyẹ eranvwe vwẹ esiso rhuo re jẹn ayen viẹ hwe Ọghẹnẹ gangan; e, e jẹn ohwo kohwo siobọ nẹ uvun umwemwu rọye re o ji siobọ nẹ ozighi egbe ejobi.

⁹ Ono sa riẹn sẹ Ọghẹnẹ sa rhẹriẹ nẹ ophu ọgangan ro muo na, rere avwanre vwo je ghwo?

¹⁰ Ọke rẹ Ọghẹnẹ vwọ mrẹ obo rẹ ayen ruru, obo rẹ ayen siobọ nẹ idjerhe ọbrabra rayen, Ọghẹnẹ de siobọ nẹ iroro ọbrabra rọ jẹ kpahe ayen na, o rhe ruo-o.