Jona 2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Jona Nẹ Ẹrhovwo rẹ Ẹkpẹvwẹ

¹ Etiyin Jona da diẹ evun rẹ eri na da nẹ ẹrhovwo kẹ Ọrovwohwo Ọghẹnẹ rọye,

² tanẹ, Mi kperi se Ọrovwohwo, vwẹ evun rẹ uvwerhe mẹ, o de nyo kẹ vwẹ, vwẹ evun rẹ Erivwi mi de kperi, wo de ghine nyo urhuru mẹ.

³ Kidie wẹ re kpare ovwẹ phihọ evun rẹ okokodo, phihọ evun rẹ uherevie rẹ abadi, oghwe na de reghe uvwe phihọ, te ọgbogho na te ukori rẹ ame na de ghorie wan vwẹ.

⁴ Etiyin me da ta a kpare ovwẹ kufia nẹ obaro wẹn, Komavọ me rhoma sa kpare opharo vwo ni uwevwi ọfuanfon wẹn na?

⁵ Ame na re vwẹ phihọ, okokodo na da reghe uvwe phihọ, odi de rhurhu uyovwi mẹ

⁶ vwẹ obo esiri rẹ igbenu na. Me da yanran ro evun rẹ otọ ibregba rọye de huhu gbe vwẹ bẹdẹ, dede na wọ de si arhọ mẹ nẹ Ukpotọ na rhe, E Ọrovwohwo Ọghẹnẹ mẹ.

⁷ Ọke rẹ oma vwo ro vwe me da karohọ Ọrovwohwo ẹrhovwo mẹ de bru we rhe, vwẹ evun rẹ uwevwi ọfuanfon wẹn.

⁸ Otu ri mu ọghọ kẹ ema ifefe ri gbobonyẹ ọghọ rẹ uyota rẹ ayen mu.

⁹ Ẹkẹvuọvo me vẹ urhuru rẹ ẹkpẹvwẹ gbe che ze izobo kẹ wẹ. Obo ri mi veri dẹn me hwa osa rọye. Esivwo Ọrovwohwo o rheri!

¹⁰ Ọrovwohwo da ta ota kẹ eri na, ọ da kpa Jona phihọ otọ ọyaya.