Jerimaya 9 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ E manẹ uyovwi mẹ kẹ ame, rẹ ibiẹrọ mẹ da dia ogbugbu rẹ oviẹ? rere me a vie te ason te uvo fiki rẹ irivwi rẹ ọmọtẹ rẹ ihwo mẹ na!

² E manẹ ke me sa bọn uwevwi ọvo kẹ erhorha vwẹ evun rẹ atọn na, rere me yan jẹ ihwo na vwo, me hẹriẹ oma mẹ nẹ ayen! Kidie ayen ejobi igberadja usun rẹ ihwo re vwọrọn efian.

³ Ayen kpirhi ẹrẹnvwe rayen kerẹ umurhabọ; efian ọ dia uyota-a ọye ma rho vwẹ otọ na, kidie ayen nẹ umwemwu ra ro umwemwu, ye ayen riẹn vwẹ-ẹ, eriyin Ọrovwohwo na tare.

⁴ Dohwo dọrivẹ rọye kẹnẹ oma kẹ, wọ vwẹ ẹro so oniọvo ọvuọvo-o oniọvo koniọvo riodọvwe, ọrivẹ kọrivẹ muẹ ohwo phọphọ.

⁵ Dohwo dọrivẹ rọye phiẹnre ọ rọ ta uyota herọ-ọ; ayen yono ẹrẹnvwe rayen obo ra vwọrọn ofian, ayen ruẹ umwemwu yẹ uvwerhi jẹn ayen kurhẹriẹ-ẹ.

⁶ Ghwẹ oshenyẹ rhurhu oshenyẹ, ophiẹnvwe rhurhu ophiẹnvwe, ayen rhọvwe riẹn vwẹ-ẹ, eriyin Ọrovwohwo na tare.

⁷ Ọtiọye na enẹ Ọrovwohwo rẹ otuofovwi na tare. Nighe, me cha fa ayen re me davwe ayen, kẹ ọvọ mi rhe ru, vwi fiki rẹ ihwo mẹ

⁸ Ẹrẹnvwe rayen vẹ obi kerẹ odada; Ota rẹ ophiẹnvwe ọ ta; dohwo dunu rọye vwọ ta ọta rẹ ufuoma kẹ ọrivẹ rọye, yẹ iroro ro vwo hwe hẹ udu rọye.

⁹ Mi gbe hwe ayen vwi fiki rẹ imu nana-a, eriyin Ọrovwohwo na tare; mi gbi reihri na kẹ oma mẹ kpahe orere ọtiọnana?

¹⁰ Viẹ wo beroma kẹ igbenu na, je viẹ ovie kẹ odi rẹ aghwa na, kidie aguọghọ ayen ohwo ọvuọvo gbe wan vrẹ-ẹn e gbi nyo oviẹ rẹ uchuru vwọ-ọ, te emephran rẹ obenu kugbe e eravwe rẹ aghwa dje ghwru.

¹¹ Mi che ru Jerusalẹm phihọ erhurhu, mi che ruo phihọ unu rẹ erha mi che ru irere ri Juda phihọ ofefe, ihwo gbe dia-a.

Ẹguọghọ kugbe Imu re Do Cha

¹² Ono ohwo rọ ghwanre rọ sa riẹn otọ rẹ ọnana? Ono unu rẹ Ọrovwohwo tarọ kẹ, ro ghwoghwo phia? Die jabọ rẹ otọ na vwo miovwi, vwọ dia ofefe kerẹ aghwa rẹ ohwo ọvuọvo gbe wan vrẹ-ẹn?

¹³ Ọrovwohwo tare nẹ: Fiki rẹ obo rẹ ayen vwọ siẹn urhi mẹ ri mi phihọ obaro rẹ ayen na, re ayen rhe nyo urhuru mẹ-ẹ na, vwọ yan nene-e na,

¹⁴ ẹkẹvuọvo yẹ ayen ji nene udu ọgangan rayen, ayen da yan nene Baal, kirobo esẹ rayen yono ayen.

¹⁵ Vwẹ ọtiọye na enẹ Ọrovwohwo rẹ otuofovwi na, Ọghẹnẹ rẹ Izrẹl, tare Kighe, me cha vwẹ akoro vwọ ghẹrẹ ihwo nana, me da vwẹ ame rẹ obi kẹ ayen da.

¹⁶ Ke me cha hra ayen ro ohri rẹ ẹgborho na re ayen te esẹ rayen riẹnre-e, ki mi ji ọlọkọ nene ayen, bẹsiẹye me vwọ guọghọ ayen nu.

¹⁷ Enẹ Ọrovwohwo rẹ otuofovwi na tare. Roro, wo eya rẹ uvweri na rhe, vuẹ rhe ewena rẹ eya na rere e rhe.

¹⁸ Jẹ ọ phẹrẹ ayen obọ rere ayen rhe viẹ oviẹ kẹ avwanre, rere ibiẹro rẹ avwanre vwo sun ame, rere iphophẹro rẹ avwanre vwọ djẹ ame.

¹⁹ Kidie enyo edo rẹ oviẹ vwi Zayọn: Mavọ a ghwọrọ avwanre te! Oma vọ avwanre tototo, fikiridie ma yan je otọ na vwọ, kidie ayen guọghọ ẹdia rẹ avwanre te otọ.

²⁰ Ovwan gbe nyo, E eya, ota rẹ Ọrovwohwo na, re we jẹ erhọn rẹ ovwan reyọ ota rẹ ugbunu rọye, yono emetẹ wẹn obo ra viẹ dohwo dọrivẹ rọye so ine rẹ uvweri kẹ.

²¹ Kidie ughwu te evakpo rẹ avwanre re, ọ rọ ighẹn rẹ avwanre re, o re bru emọ na nẹ irhuvwu rẹ avwanre, imighene na nẹ ọguan na.

²² Ta, Enẹ Ọrovwohwo na tare: Irivwi rẹ ihwo na che she, kerẹ isọn ra kpare phihọ uphephẹ kerẹ ekrẹbe rẹ ihwo ri vuẹ orhọ ohwo ọvuọvo gbe ghwẹ ayen koko-o.

Erianriẹn rẹ Ọghẹnẹ Hẹ Urinrin Rẹ Ohwo

²³ Enẹ Ọrovwohwo tare: E jẹn ọvwaghwanre yoma rẹ aghwanre rọye-e, e jẹn ọgba vwẹ ẹgba rọye yoma-a, e jẹn ọdafe vwẹ efe rọye yoma-a,

²⁴ ẹkẹvuọvo ọ rọ yoma gba vwẹ ọna yoma, nẹ ọye vughe uvwe ọye je riẹn vwẹ, nẹ mẹvwẹ Ọrovwohwo ro nẹ ẹguọnọ ro jẹrhẹriẹ, rọ guọnọ uyota kugbe ọvwata vwẹ akpọ na, kidie imu nana ri je vwe eriyin Ọrovwohwo na tare:

²⁵ Nighe, ẹdẹ cha vwobọ eriyin Ọrovwohwo na tare, ri mi che vwo hwe otu re yanvwere dede na ayen je hẹ upheruphe.

²⁶ Ijipt, Juda, Idọm, emọ rẹ Ammọn, Moab, kugbe otu re dia aton ejobi ri bru akakọ rẹ ẹto rayen, kidie ẹgborho nana yanvwere-e a je yanvwe uwevwi rẹ Izrẹl ejobi vwẹ udu-u.