Jerimaya 7 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Rhuẹrẹ Idjerhe Wẹn kugbe Uruemu Wẹn

¹ Ota ro nẹ obọ rẹ Ọrovwohwo bru Jerimaya rhe;

² Mudia vwe anurhoro rẹ uwevwi rẹ Ọrovwohwo, wo ghwoghwo ota nana, hlyo ota rẹ Ọrovwohwo na, ovwan ihwo ri Juda ejobi re ro inurhoro nana cha ga Ọrovwohwo na.

³ Enẹ Ọrovwohwo rẹ otuofovwi na tare, Ọghẹnẹ rẹ Izrẹl na Rhuẹrẹ idjerhe wẹn ve eyere wẹn phihọ ke me rhọvwe nẹ ovwan dia etinẹ.

⁴ Wo se eta rẹ ephiẹvwẹ nana gbuyota-a: Ọnana uwevwi rẹ Ọrovwohwo, uwevwi rẹ Ọrovwohwo na, uwevwi rẹ Ọrovwohwo na.

⁵ Kidie ovwan de ghine rhuẹrẹ idjerhe rẹ ovwan vẹ eyere rẹ ovwan phihọ rẹ ovwan de ghine ru ọsoso kẹ ohwohwo,

⁶ rẹ ovwan gbi shenyẹ ọrhorha-a, rẹ ovwan gbi shenyẹ ọmọphrorivwi-i, kugbe ayeuku-u, eyẹ ovwan gbi sun ọbara ekueku te otọ vwẹ etinẹ na-a, rẹ ovwan gbi nenesi rẹ eghẹnẹ efa-a kẹ emiovwo rẹ ovwa-an,

⁷ ke me rhọvwe nẹ ovwan dia etinẹ na, otọ re me vwọ kẹ esẹ rẹ ovwan rhabaye nẹ ayen dia bẹdẹ.

⁸ Nighe, ovwan vwẹ ẹro so eta ifefe ri fi emuọvo-o.

⁹ Kẹ we cho uji, dia ozighẹ, we gbe igberadja, duvwu iyori rẹ eku, torhẹ incens ki Baal, we nene eghẹnẹ efa re ovwan riẹnre-e,

¹⁰ wa rhoma cha we mi rhi mudia vwẹ obaro mẹ vwẹ uwevwi nana, ra vwẹ odẹ mẹ se na ro wa tanẹ, Esivwi avwanre!-–yẹ ovwan je rhoma ruẹ ẹgua nana?

¹¹ Kẹ uwevwi nana re vwo se odẹ mẹ na rhoma hirhe phihọ unu rẹ igbunegbu vwẹ ẹro rẹ ovwan? Nighe, ekpuyovwi mẹ mrerẹ nure, eriyin Ọrovwohwo na tare.

¹² Ke yanran kpo ẹdia mẹ rọ hẹ Shiloh, asan rẹ odẹ mẹ diare vwẹ ẹsosuọ, re wa mrẹ obo mi ruro fiki rẹ orukuruku rẹ ihwo mẹ Izrẹl.

¹³ Fiki rẹ obo rẹ ovwan vwo ru imu nana, vwẹ asakiephana, eriyin Ọrovwohwo na tare, ọke mi vwo dje ovwan ẹtẹta kẹ wa kerhọ-ọn, mi vwo se ovwan we nyori-i,

¹⁴ vwẹ ọtiọye na ki mi che ru kẹ uwevwi na ra vwẹ ode mẹ se na, re wa vwẹ ẹro so, kugbe asan na re me vwọ kẹ esẹ rẹ ovwan na, kirobo ri mi ru ki Shiloh.

¹⁵ Ke me djẹ ovwan nẹ obaro mẹ, kirobo me djẹ imoni rẹ ovwan kufia ye, uvwiẹ rẹ Ifrem ejobi.

Ophu rẹ Ọghẹnẹ kpahe Edjọegọ

¹⁶ Vwọ kẹ wẹ, wọ nẹ ẹrhovwo kẹ ihwo nana-a, wọ viẹ-ẹ eyẹ wọ nẹ ẹrhovwọ kẹ aye-en, wọ je rẹ vwọ kẹ aye-en, kidie mi che nyo we-e.

¹⁷ Wọ mrẹ obọ rẹ ayen ruẹ vwẹ irere ri Juda kugbe irhuvwu ri Jerusalẹm na?

¹⁸ Emọ na re du irhe koko, esemọ na de rhe koko erhanre na phihọ, eya na de gbe eka na, re ayen kake ikara kẹ ovie rẹ aye rẹ enu, ayen de ku udi ku edjọ efa, rẹ ayen vwọ kpare ophu mẹ.

¹⁹ Mẹvwẹ kọye ayen kpare ophu na? eriyin Ọrovwohwo na tare. Ọ dia omobọ rayen, ayen vwo gbe ozighi na?

²⁰ Vwẹ ọtiọye na enẹ Ọrovwohwo Ọghẹnẹ na tare: Nighe, mi che ku ivuemiovwo mẹ vẹ ophu mẹ phihọ etinẹ na, phihọ enu rẹ ohwo vẹ eranvwe, phihọ enu rẹ irhe rẹ aghwa vẹ emamọ rẹ otọ na, ọ cha la e se fuo-o.

Ehwe ri Juda fiki rẹ Emuokpahọ Rọye

²¹ Enẹ Ọrovwohwo rẹ ofovwi na tare, Ọghẹnẹ rẹ Izrẹl na: Gba vwẹ izobo rẹ ẹtorhẹ wẹn vwo ba izobo wẹn, wọ re uvwo na.

²² Kidie vwẹ ẹdẹ re me vwọ reyọ ayen nẹ otọ rẹ Ijipt rhe na, me ta ota kẹ esẹ rẹ ovwa-an eyẹ mi ji ji urhi kẹ ayen kpahe izobo rẹ ẹtorhẹ kugbe izobo-o.

²³ Ẹkẹvuọvo urhi nana me vwọ kẹ ayen, Nyo urhuru mẹ, ke me dia Ọghẹnẹ kẹ ovwan, ovwan ke dia ihwo mẹ, rere wa yan vwẹ idjerhe ejobi ri mi dje kẹ ovwan rere o vwo yovwi kẹ ovwan.

²⁴ Ẹkẹvuọvo ayen nyori-i, ayen kerhọ-ọn, ẹkẹvuọvo ayen da yan nene iroro rẹ obo rayen vẹ udu ọgangan rẹ udu umwemwu rayen, ayen da ya kpuko o gbe dia obaro-o.

²⁵ Nẹ ẹdẹ rẹ esẹ rẹ ovwan vwo nẹ otọ rẹ Ijipt rhe rhi te none na, mi vwo ji idibo mẹ emraro na ejejo bru ayen, nẹ ẹdẹ ra ro ẹdẹ,

²⁶ dede na ayen kerhọn mẹ-ẹ, ayen je vwẹ erhọn kpotọ-ọ, ẹkẹvuọvo ayen vẹ udu kpohro, ayen ru miovwi nọ esẹ rayen.

²⁷ Eriyin na gba ta eta nana kẹ ayen, yẹ ayen cha kerhọn wẹ-ẹ. Wo che se ayen, ye ayen cha kpahe kẹ wẹ-ẹ.

²⁸ Wọ me ta kẹ ayen nẹ, Ọnana orere rọ kerhọn rẹ urhuru rẹ Ọrovwohwo Ọghẹnẹ raye-en, ayen reyọ ẹghwọ kuo rọye-e, uyota ghwuru kpimẹ e bruro nẹ ẹbẹrunu rayen.

²⁹ Bru ẹto wẹn wo do kufia, kpare ugoroviẹ vwẹ enu rẹ ugbenu phrẹphrẹphrẹ na, kidie Ọrovwohwo siẹn ọchuko kẹ uvwiẹ nana rẹ ophu rọye muọ na.

³⁰ Fikiridie emọ ri Juda ru emu omiomiovwi vwẹ obaro mẹ eriyin Ọrovwohwo na tare, ayen mu orukuruku rayen vi vwẹ uwevwi ra vwẹ odẹ mẹ se na, ayen de gbe ẹgua.

³¹ Ayen bọn ẹdia ro kpenu ri Tofẹt, rọ hẹ iyara rẹ emọ ri Hinnọm, rẹ ayen da torhẹ emeshare vẹ emetẹ rayen vwẹ erhanre; ọ re me vuẹ aye-en, ro ji nẹ iroro mẹ rhe-e.

³² Ọtiọye na, gbe nighe, ẹdẹ cha, eriyin Ọrovwohwo na tare, re vwo je se Tofẹt ọfa, ẹkẹvuọvo ke se iyara rẹ Ihwehwe, kidie Tofẹt kọye ayen che shi ihwo phihọ, kidie asan ọfa gbe herọ-ọ.

³³ Irivwi rẹ ihwo nana ke cha dia emuọre kẹ emephran rẹ enu, ji kugbe eranvwe rẹ otọ na, ohwo ọvuọvo ro cha djẹ oshọ mu ayen gbe herọ-ọ.

³⁴ Ki mi fue urhuru rẹ aghọghọ vẹ omavwerhovwẹ nẹ irere ri Juda kugbe Jerusalẹm ejobi, urhuru rẹ opha vẹ ọshare rọye, kidie otọ na cha dia ofefe.