Jerimaya 50 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Aroẹmrẹ Kpahe Babilọn

¹ Ota rẹ Ọrovwohwo tare kpahe Babilọn, kpahe otọ rẹ ihwo ri Kaldia vwẹ oma ri Jerimaya rẹ ọmraro na:

² Djẹ phia vwẹ ohri rẹ ẹgborho na wo ghwoghwo, vwẹ aphiana tan wo ghwoghwo, wo sionẹ-ẹ, re wo tanẹ: A reyọ Babilọn nure, oma vo Bẹl nure, ofu dje Mẹrodak nure. A vwẹ ema rọye jehwẹ, ofu dje edjọ rọye.

³ Kidie orere ọvo nẹ obọrhe ọnre rhe rhe vwọ suọ, ọ ro che ru otọ rọye ofefe, ohwo ọvuọvo rha dia-a, te ihwo te eranvwe cha djẹ no.

⁴ Vwẹ ẹdẹ yena vẹ ọke yena eriyin Ọrovwohwo tare, ihwo rẹ Izrẹl vẹ ihwo ri Juda che kuoma gbe, ayen cha, jẹ ayen viẹ; ayen cha guọnọ Ọrovwohwo Ọghẹnẹ rayen na.

⁵ Ayen cha nọ ekpẹn rẹ idjerhe ra wan kpo Zayọn, vẹ opharo re hirhe kuo tanẹ, Wa mọ re kuoma gbe Ọrovwohwo vwẹ ọphọ ẹriọ ri bẹdẹ ro je ẹro ẹchọrọ bẹdẹ.

⁶ Ihwo mẹ rhe dia kerẹ igegede ri ghwruru, isuigegede rayen sun ayen ghwru, ayen ku ayen rhẹriẹ vwẹ enu rẹ igbenu, nẹ ugbenu ride kpo ugbenu otete ayen yan ra, ogba rayen chọrọ ayen ero.

⁷ Otu re mrẹ ayen ejobi da guọghọ ayen, ivwighrẹ rayen da tanẹ, Ma re abe-e, kidie ayen ru umwemwu kpahe Ọrovwohwo, ẹdia rẹ esẹ rayen na.

⁸ Djẹ nẹ uherevie ri Babilọn, we nẹ otọ rẹ ihwo ri Kaldia na, re wa dia kerẹ ẹvwe rẹ eshare vwẹ obaro rẹ igegede na.

⁹ Kidie gbe no, me cha kpara vwọ so Babilọn usun rẹ ẹgborho ride na, ri nẹ orho rẹ obọrhe ọnre na cha, ayen cha hwa phihọ vwo suọ, etiyin e de muo yanran. Edada rayen họhọ ọgbofovwi re yonori ro fiabọ kpo-o.

¹⁰ A cha kua Kaldia fiotọ, otu re kuarọ ejobi evun kọ vọn ayen tunu, eriyin Ọrovwohwo tare.

¹¹ Owenẹ wọ ghọghọ, owenẹ oma vwerhe owẹ, E ọ ro gborho ukuẹriọ mẹ owenẹ wo vwo urhurhu kerẹ ọmọ rẹ erhuẹn rọ ria odi, rọ djẹ eya kerẹ esi ọshare,

¹² Oma cha vo oni wẹn tototo, ọ rọ vwiẹ wẹ na oma cha vuọ. Nighe, ọye cha ka uko vwẹ ẹgborho na ejobi, aton ọyaya ro shafon.

¹³ Fiki rẹ ophu rẹ Ọrovwohwo na a gbe sa dia-a, ẹkẹvuọvo ọ cha dia ofefe kakare, ohwo kohwo rọ wan Babilọn vrẹn ko gbunu ko fiunu fiki rẹ era rọye ejobi.

¹⁴ Hwa phihọ yariẹ Babilọn, ovwan si omurhabo ejobi wa sa, wa dobọjẹ-ẹ, kidie o ru umwemwu kpahe Ọrovwohwo.

¹⁵ Bunu yariẹ phihọ abọ rhọrọ re, edaji rọye she nure, igbẹhẹ rọye she ghwotọ. Kidie ọnana ihriẹriọ rẹ Ọrovwohwo, vwọ re ihri kẹ kirobo ro ruru.

¹⁶ Bru ọkekakon nu Babilọn, kugbe ohwo rọ yọnrọn arekpe vwẹ ọke rẹ orhọ na, fiki rẹ ọlọkọ rẹ ọroshenyẹ na, dohwo dihwo rọye che rhivwi bru ra, dohwo dotọ rọye cha djẹ ra.

¹⁷ Izrẹl kerẹ ogegede ra rhẹrẹ rẹ ikpohrokpo vwọ tua. Ẹsosuọ ovie rẹ Asiria re rerọ, vwẹ asakiephana kẹ Nebukadreza ovie ri Babilọn kẹ ọye rha gbẹrhiẹn ibeku rọye.

¹⁸ Ọtiọye na, enẹ Ọrovwohwo rẹ otuofovwu na tare, Ọghẹnẹ rẹ Izrẹl na: Nighe, me ra vwẹ ehwe kẹ ovie ri Babilọn vẹ otọ rọye, kirobo ri mi hwe ovie rẹ Asiria na.

¹⁹ Me cha reyọ Izrẹl rhivwi kpo egbri roye. Ọ cha re vwẹ enu ri Kamẹl vẹ evun ri Bashan, obo rọ guọnọre kọ cha vọn evun vwẹ enu rẹ igbenu itete rẹ Ifrem vi Giliad.

²⁰ Vwẹ ẹdẹ yena vẹ ọke yena, eriyin Ọrovwohwo tare, a cha guọnọ orukuruku vwẹ Izrẹl, a gbe mrẹ vwọ-ọ, kugbe umwemwu vwi Juda a gbe rnrẹ ọvuọvo vwọ-ọ, kidie umuku ri mi che jovwo mi che vwo ghovwo ayen.

²¹ Yanran ra vwọ so otọ ri Mirataim na, je vwọ so ihwo ri Pikọd Hwe, re wọ ghwọrọ ayen tototo, eriyin Ọrovwohwo tare, ru obo ri mi ji iji kẹ wẹ na ejobi.

²² Edo rẹ ofovwi hẹ otọ na, vẹ ẹghwọrọ rode!

²³ Mavọ umomo rẹ akpọ na soso e vwo bro phihọ otọ guọghọ! Mavọ Babilọn rhi vwo hirhe phihọ emuoshọ vwẹ ohri rẹ ẹgborho na?

²⁴ Me kpahe ufi kẹ wẹ o de mu we, E Babilọn, ye wọ riẹnre-e; a mrẹ we e de mu we, fikiridie wo nene Ọrovwohwo họnra.

²⁵ Ọrovwohwo rhie uwevwi rẹ ekuakua re ofovwi rọye re, ọ da ghwẹ ekuakua rẹ ophu rọye phihọ otafe, kidie Ọrovwohwo Ọghẹnẹ rẹ otuofovwi na vwẹ iruo ro ruẹ vwẹ otọ rẹ ihwo ri Kaldia na.

²⁶ Yanrhe vwọ suọ ni kabọ kabọ rhe; rhie erhu rẹ eka roye, ghwẹ koko kerẹ ẹko rẹ eka, ra ghwọrọ tototo; wo jẹn ẹmu ọvuọvo chekọ vwọ-ọ

²⁷ Hwe irhuẹn rọye ejobi, jẹn ayen yanran bru ọrohwe. Ekan kẹ ayen, kidie ẹdẹ rayen rhire, ọke rẹ ehwe rayen.

²⁸ Kerhọn! ayen djẹ vabọ nẹ otọ ri Babilọn, re ghwoghwo ihriẹriọ rẹ Ọrovwohwo Ọghẹnẹ rẹ avwanre na vwi Zayọn, ihriẹriọ fiki rẹ uwevwi rọye.

²⁹ Se esedada vwọ so Babilọn, ayen otu ri siẹ umurhabọ ejobi, muerhọn yariẹ phihọ, wo jẹ ohwo ọvuọvo vabọ-ọ. Hwa osa kẹ kerẹ obo rẹ iruo reyọ epha, ru kẹ kirobo ro ruru kẹ ihwo, kidie ọ vwẹ Ọrovwohwo na jehwẹ miomiovwi, Ọfuanfon Ọvuọvo rẹ Izrẹl na.

³⁰ Vwẹ ọtioye na imighene rọye che she vwẹ ọsuere rọye, ihwo rẹ ofovwi ejobi cha ghwọrọ vwẹ ẹdẹ yena, eriyin Ọrovwohwo na tare.

³¹ Nighe, me vwọ so owẹ, E ọ ro herẹ na, Ọrovwohwo Ọghẹnẹ rẹ otuofovwi na tare, kidie ẹdẹ wẹn rhire, ọke ri mi che vwo hwe we.

³² Ọ ro herẹ na cha yẹghrẹ ro de she, ọ rọ kparọ vrẹn rha dia-a, ki mi che koko erhanre phihọ irere rọye, kọ cha guọghọ otu re yareriẹ phihọ ejobi.

³³ Enẹ Ọrovwohwo rẹ otuofovwi na tare: E shenyẹ ihwo rẹ Izrẹl, ihwo ri Juda ji kugbe ayen rhe, otu ri mu ayen imu yọnrọn ayen kokoroko, ayen rhọvwe siobọ nẹ aye-en.

³⁴ Ọ rọ tan ayen hirhe na ogba ọgangan, Ọrovwọhwo rẹ otuofovwi na ọye odẹ rọye. O che mie ayen unu vwo gun, rere ọ vwọ mrasan kẹ akpo na omerovwo, ẹkẹvuọvo ọdjorho kọye dia kẹ ihwo ri Babilọn.

³⁵ Ọlọkọ vwẹ enu rẹ ihwo ri Kaldia, eriyin Ọrovwohwo tare, ji kugbe enu rẹ ihwo ri Babilọn, vwẹ enu rẹ isun vẹ evwaghwanre rọye!

³⁶ Ọlọkọ vwẹ enu rẹ ihwo re bọ epha, rere ayen vwọ mrasan hirhe phihọ ẹkpa! Ọlọkọ vwẹ enu rẹ egba ofovwi rọye, rere ayen vwọ mrasan ghwọrọ!

³⁷ Ọlọkọ vwẹ enu rẹ iyesi vẹ ekpẹrẹ rọye, vẹ enu rẹ otuofovwi erhorha re hẹ uherevie rọye, rere ayen vwọ hirhe oma phihọ eya! Ọlọkọ vwe enu re efe rọye ejobi, rere a vwọ kua ayen fiotọ!

³⁸ Ekpakpọ vwẹ enu rẹ ame rọye, rere ayen vwọ mrasan kpọ yamu! Kidie otọ rẹ ema o ruẹ, ayen mworhuẹ rẹ edjọgọ.

³⁹ Ọtiọye na eranvwe re djọma vẹ erha ke cha dia evun ri Babilọn, igomugoro re cha dia evun rọye; a gbe sa dia ọfa bẹdẹ-ẹ, e rhe se yere e yere vwọ vwẹ edje ke edje bẹdẹ-ẹ.

⁴⁰ Kirobo rẹ ọke rẹ Ọghẹnẹ vwo gere Sodọm vi Gomora vẹ irere re kẹrẹ ghwiotọ ye, eriyin Ọrovwohwo tare, ọtiọye ohwo gbe sa dia etiyi-in, ọmọ rẹ ohwo rha yan vwọ-ọ.

⁴¹ Nighe, ihwo evo nẹ obọrhe ọnre cha, ẹgborho rẹ egba vẹ ivie buebu e rọ kpara nẹ ugbo shesheri rẹ akpọ na cha.

⁴² Ayen yọnrọn umurhabọ vẹ ubiri, Ayen ihwo ọkon, inẹ aruẹdọ-ọ Edo rayen họhọ ohonre rẹ abadi, ayen gua vwẹ enu rẹ iyesi, ayen rhuẹrẹ oma phihọ kerẹ ohwo ro kpo ofovwi vwọ so owẹ. E ọmọtẹ ri Babilọn!

⁴³ Ovie ri Babilọn nyo usi rayen, abọ rọye de she ghwrọghọ, ophu de muo, odjadja kerẹ ọ rẹ aye rọ chuẹ uvwiẹ.

⁴⁴ Nighe, kirobo rẹ okpohrokpo nẹ oghwaghwo ri Jọdan cha vwọ so ogba rẹ igegede ye, mi che ru ayen re djẹ jovwo kpregede, ohwo ro jevwe kọye mi vwo mu vwẹ enu rọye. Kidie kono họho ovwẹ? Ono che si ọbe se vwe? Didi osuigegede se mudia vwẹ obaro mẹ?

⁴⁵ Ọtiọye na gbe nyo iroro rẹ Ọrovwohwo jẹn kpahe Babilọn, vẹ obo ro ruru kpahe otọ rẹ ihwo ri Kaldia na: Omuẹro e che kpono igegede itete rayen yanran, Omuẹro obo re phia kẹ ayen che gbe ogba rẹ igegede rayen unu.

⁴⁶ Akpọ na che kpogho vwẹ edo rẹ emuo ri Babilọn, e che nyo oviẹ rọye vwẹ uherevie rẹ irere na.