Jerimaya 42 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Jerimaya Vuẹ Uwevwi rhe Johanan

¹ Etiyin ijurhi rẹ ofovwi na ejobi, vẹ Johanan ọmọ ri Karia vẹ Azaraya ọmọ rẹ Hoshaya, kugbe ihwo na ejobi nẹ otete re te orọde rayen, ki rhi si kẹre

² Ayen da ta kẹ Jerimaya rẹ ọmraro na, Jẹn omaevwerhe rẹ avwanre te obaro wẹn wọ rẹ Ọrovwohwo Ọghẹnẹ wẹn na kẹ avwanre, kidie umuku rẹ avwanre ro chekọ na rhe bu-u, kirobo rẹ ẹro wẹn je ghwa mrẹ na.

³ Gba rẹ Ọrovwohwo Ọghẹnẹ wẹn na so se dje idjerhe rẹ avware wan kẹ avwanre, vẹ obo rẹ avwanre ru.

⁴ Jerimaya rẹ omraro na da ta kẹ ayen, Mi nyo ovwanvwan, nighe, kirobo rẹ wa nọre na me cha rẹ Ọrovwohwo Ọghẹnẹ rẹ ovwan na, emu kemu rẹ Ọrovwohwo kpahe kẹ ovwan me cha vuẹ ovwan, me sa djahe emu ọvuọvo kẹ ovwa-an.

⁵ Etiyin ayen da ta kẹ Jerimaya nẹ, Jẹn Ọrovwohwo dia omamọ rẹ oseri rẹ uyota ke avwanre ọ da dianẹ avwanre rha yọnrọn ota rẹ Ọrovwohwo Ọghẹnẹ wẹn na ro ju we bru avwanre rhe na-a.

⁶ Owenẹ oyovwiri eyẹ omiovwiri dede, me nyo urhuru rẹ Ọrovwohwo Ọghẹnẹ rẹ avwanre ohwo re me ju we brẹ ra na, rere ọ vwọ mrasan yovwi kẹ avwanre ọke me de nyo urhuru rẹ Ọrovwohwo Ọghẹnẹ rẹ avwanre na.

⁷ Ẹdẹ ihwe vwọ wan nu ota rẹ Ọrovwohwo ki bru Jerimaya rhe.

⁸ Etiyin o dẹ se Johanan ọmọ ri Karia vẹ ijurhi rẹ ofovwi ejobi ri nene koko, vẹ ihwo na ejobi nẹ ọ rẹ otete re tẹ ọrode rayen.

⁹ Ọ da vuẹ ayen nẹ. Enẹ Ọrovwohwo, Ọghẹnẹ rẹ Izrẹl tare, ohwo ru we ju vwe bru ra ni mi re vwerhe oma rẹ ovwan kẹ na.

¹⁰ Ọ da dianẹ we ghinẹ dia otọ nana, etiyin ke me bọn ovwan me gbe guọghọ ovwa-an, ke me kọn ovwan, me gbe kọrọ ovwa-an, kidie me rhẹriẹ nẹ umiovwo ri mi ru ovwan na re.

¹¹ Wa djẹ oshọ rẹ ovie ri Babilọn na-a, ohwo rẹ oshọ rọye mu ovwan na, wa djẹ oshọ rọye-e, eriyin Ọrovwohwo tare, kidie me vẹ ovwan herọ, ki mi sivwi ovwan mi ji si ovwan nẹ obọ rọye rhe.

¹² Mi ni arodọvwẹ rẹ ovwan, rere ọ vwọ mrasan ni arodọvwẹ rẹ ovwan ro jẹn ovwan dia evun rẹ otọ rẹ ovwan na.

¹³ Ẹkẹvuọvo ọ da dianẹ wa tare nẹ, Ma cha dia evun rẹ otọ nana-a, wọ da gan udu kẹ urhuru rẹ Ọrovwohwo Ọghẹnẹ rẹ ovwan na,

¹⁴ tanẹ, Ẹjo, ma yan kpo otọ rẹ Ijipt, asan me de jẹ ofovwi ẹmrẹ, eyẹ jẹ edo rẹ owanre enyo, eyẹ owẹvwe rẹ emuọre gbi hwe-e,

¹⁵ re ma dia oboyi, otiọye na we gbe nyo ota rẹ Ọrovwohwo na, E umuku ri chekọ vwi Juda. Enẹ Ọrovwohwo rẹ otuofovwi, Ọghẹnẹ rẹ Izrẹl na tare, Ọ da dianẹ wa tọn opharo rẹ ovwan vi Ijipt vwọ ruọ ra dia,

¹⁶ Ọtiọye na ọlọkọ rẹ oshọ rọye mu ovwan na kọ vwa ovwan vwẹ otọ rẹ Ijipt; owẹvwe rẹ oshọ rọye mu ovwan na kọ nene ovwan kpẹkpẹkpẹ kpo Ijipt, kẹ etiyin we de ghwu.

¹⁷ Eshare ejobi rẹ tọn opharo rayen vi Ijipt ri kpo oboyi ra dia na ọlọkọ che hwe ayen, owẹvwe vẹ ọtiekọ che hwe ayen, o che vwo ohwo ro che chekọ kẹ ayen vwẹ umiovwo re me vwo bru ovwan cha na.

¹⁸ Kidie enẹ Ọrovwohwo rẹ otuofovwi Ọghẹnẹ rẹ Izrẹl tare, Ọtiobo rẹ ophu vẹ ivuemiovwo mẹ hwẹ ku ihwo ri Jerusalẹm na, ọtioye ivuemiovwo mẹ ji hwẹ ku ovwan vwẹ ọke ru we de kpo Ijipt. Wa cha dia isọn, emuroshọ, ekan, vẹ ehwẹjẹ rode. Wa gbe mrẹ etinẹ na ọfa-a.

¹⁹ Ọrovwohwo ta kẹ ovwan nure, E umuku ro chekọ vwi Juda, We kpo Ijipti-i. We jo mu ovwan ẹro gba gba nẹ me phẹphẹ ovwan unu nonẹ na,

²⁰ nẹ wa da yan ghwru arhọ rẹ ovwan ko nene. Kidie we ju vwe bru Ọrovwohwo Ọghẹnẹ rẹ ovwan, nẹ, Nẹ ẹrhovwo kẹ Ọrovwohwo Ọghẹnẹ rẹ avwanre na kẹ avwanre, re wo ghwoghwo kẹ avwanre emu kemu rẹ Ọrovwohwo Ọghẹnẹ rẹ avwanre djeri avwanre ruo.

²¹ Mi ghwoghwiro kẹ ovwan nonẹ na, ẹkẹvuọvo emu ọvuọvo rẹ Ọrovwohwo Ọghẹnẹ rẹ ovwan na ju vwe nẹ me ta kẹ ovwan o ri we nyori herọ-ọ.

²² Asakiephana we jo mu ovwan ẹro nẹ obo rẹ ovwan ra ra dia na, ọlọkọ vẹ owẹvwe kugbe ọtiekọ che hwe ovwan vwẹ oboyi.