Jerimaya 37 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

E Mu Jerimaya Kanre

¹ Zedikaya ọmọ ri Josaya, ohwo ri Nebukadreza ovie ri Babilọn vwo mu ovie vwẹ otọ ri Juda ọ da re uvie vwẹ ẹdia ri Konaya ọmọ ri Jehoiakim

² Ẹkẹvuọvo te ọye vẹ idibo rọye eye ihwo rẹ otọ na re kerhọn rẹ eta rẹ Ọrovwohwo rọ wan oma ri Jerimaya rẹ ọmraro ta na-a.

³ Ovie Zedikaya de ji Jehukal ọmọ ri Shelemaya, vẹ Zẹfanaya orherẹn na, ọmọ ri Maseya, bru Jerimaya re ọmraro na rhe nẹ, Re Ọrovwohwo Ọghẹnẹ rẹ avwanre na kẹ avwanre.

⁴ Ọke nana ji Jẹrimaya je yan ruẹ ihwo na yan kpo, kidie ye ji muo phihọ uwodi-i.

⁵ Otu rẹ ofovwi ri Fero de nẹ Ijipt rhe; re ihwo ri Kaldia ri ki Jerusalẹm phihọ vwo nyo ikun rayen, ayen de sioma reyọ nẹ Jerusalẹm.

⁶ Ọye ota rẹ Ọrovwohwo de bru Jerimaya rẹ ọmraro na rhe.

⁷ Enẹ Ọrovwohwo tare, Ọghẹnẹ rẹ Izrẹl: Enẹ wọ ta kẹ Ovie ri Juda ro ju we rhe nọ vwẹ obọ me na, Nighe, otu rẹ ofovwi ri Fero re rhe chọ we uko muegbe ri vwo rhivwi kpo Ijipt re, kpo otọ raye.

⁸ Ihwo ri Kaldia che rhivwi cha rhe họnre orere nana, ayen cha reyọ, ayen da vwẹ erhanre vwọ torhẹ.

⁹ Enẹ Ọrovwohwo tare, Wọ phiẹn omobọ wẹ-ẹn, ta nẹ, ihwo ri Kaldia ghine cha yan jẹn avwanre vwo, kidie ayen cha da oma ji-i.

¹⁰ Kidie owenẹ ovwan se hwe otu rẹ ofovwi rẹ ihwo ri Kaldia na soso re họnre ovwan na, rẹ ihwo re woma ọvo de chekọ, vwẹ dohwo dutughẹ rẹ ayen epha, ayen de vrẹn ayen cha vwẹ erhanre torhe orere nana.

¹¹ Asakiephana ọke rẹ otu rẹ ofovwi rẹ ihwo ri Kaldia vwo rhivwi nẹ Jerusalẹm fiki rẹ ẹcha rẹ otu rẹ ofovwi ri Fero,

¹² Jerimaya de nẹ Jerusalẹm kpo otọ ri Bẹnjamin re ọ reyọ ute rọye vwẹ uherevie rẹ ihwo na.

¹³ Ọke rọ vwọ hẹ unurhoro ri Bẹnjamin, isodje ọvo rọ rhere re se Irija rẹ ọmọ ri Shelemaya, ọmọ ri Hananaya, de mu Jerimaya rẹ ọmraro na, ta nẹ, Wọ djẹ bru ihwo ri Kaldia ra.

¹⁴ Jerimaya da ta, Ọye ofian; me dje bru ihwo ri Kaldia-a. Ẹkẹvuọvo Irija rhọvwe kerhọn rọye-e, o de mu Jerimaya rhe isun na.

¹⁵ Isun na de mu ophu kpahe Jerimaya, ayen de hwe ayen de muo phihọ uwodi vwẹ uwevwi ri Jonatan rẹ osiẹbe na, kidie a rhẹriẹ uwevwi yena phihọ uwodi nure.

Zedikaya vẹ Jẹrimaya Ro Ẹguare

¹⁶ Ọke ri Jerimaya vwo te uwodi rẹ ọgọdọ na rọ rhe vwọ dia etiyin ẹdẹ buebu re,

¹⁷ Ovie Zedikaya de ji ohwo re se, Ovie na da bẹbẹ nọ vwẹ uwevwi rọye, ta nẹ, Ota nẹ obọ rẹ Ọrovwohwo rhe? Jerimaya da ta, Ota herọ Kẹsiẹye ọ ke ta, E che phi we phihọ obọ rẹ ovie ri Babilọn.

¹⁸ Jerimaya da vuẹ Ovie Zedikaya, Die mi ru we eyẹ idibo wẹn eyẹ ihwo nana rọ chọre we vwo mu vwe phihọ uwọdi na?

¹⁹ Bovọ emraro wẹn na epha re mraro kẹ wẹ, nẹ Ovie ri Babilọn cha rhe ro de mu kpahe owẹ kugbe otọ nana-a.

²⁰ Gbe nyo, me rẹ wẹ, E ọrovwovwe ovie me, jẹ orẹ mẹ rhe obaro wẹn, wọ gbe reyọ ovwe rhivwi kpo uwevwi ri Jonatan rẹ osiẹbe na-a, mi de rhe ghwu vwẹ etiyin.

²¹ Eriyin na Ovie Zedikaya ki ji urhi ayen ki phi Jerimaya phihọ ọguan rẹ isodje rọ rhẹrẹ na, kẹdẹ kẹdẹ kọye a vwọ kẹ ọko rẹ ikara ọvo nẹ urhuvwu rẹ ọkakikara na cha, bẹsiẹye rẹ ikara rẹ orere na rhi vwo re. Ọtiọye Jerimaya da dia ọguan rẹ isodje rọ rhẹrẹ na.