Jerimaya 32 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Jerimaya Dẹ otọ Vwi Anatot

¹ Ota rọ nẹ obọ rẹ Ọrovwohwo bru Jerimaya rhe vwẹ ukpe rẹ ihwe ri Zẹdikaya ovie ri Juda, vwẹ ukpe rẹ ihwe gbẹ ẹrenre ri Nebukadreza.

² Ọke yena otuo-fovwi rẹ ovie ri Babilọn yarie Jerusalẹm phihọ, ye e mu Jẹrimaya re ọmraro phihọ uwodi vwẹ ọguan rẹ ọhẹrhẹ rẹ ovie ri Juda.

³ Kidie Zẹdikaya ovie ri Juda muro phihọ uwodi, ta nẹ, Die sorọ wo vwọ mraro tanẹ, Enẹ Ọrovwohwo tare. Nighe mi phi orho nana phihọ obọ rẹ ovie ri Babilọn, kọ cha reyọ;

⁴ Zedikaya rẹ ovie ri Juda sa djẹ nẹ obọ rẹ ihwo ri Kaldia na-a, e che ghine phio phihọ obọ rẹ ovie ri Babilọn, ayen ki hirhe aro kuaro ta ota ayen je vwẹ ẹro mrẹ ohwohwo.

⁵ Ke ghini mu Zedikaya kpo Babilọn, oboyi kọye ọ dia bẹsiẹye me rhe vwọ mrẹ, eriyin Ọrovwohwo tare; wo de nene ihwo ri Kaldia họnre dede, wọ sa kparobọ-ọ.

⁶ Jẹrimaya da ta, Ota rẹ Ọrovwohwo bru vwe rhe:

⁷ Nighe, Hanamẹl ọmọ ri Shalọm oniọvo rẹ ọse wẹn na che bru we rhe tanẹ, De udju me rọ hẹ obo Anatọt, kidie wẹ ohwo ro fori rọ sa tan.

⁸ Kọye Hanamẹl rẹ oniọvo mẹ de bru vwe rhe vwẹ obo uwodi rẹ ọguan na kirobo rẹ ota rẹ Ọrovwohwo na epha, ọ da vuẹ vwẹ nẹ, Dẹ udju mẹ rọ hẹ obo Anatọt vwẹ otọ ri Benjamin, kidie we yi fo ohwo rọ je sa tan, dẹ ke oma wẹn. Me ke ghwa riẹn nẹ ọnana ota rẹ Ọrovwohwo na.

⁹ Me da ghine de udju rọ obo Anatọt na mie Hanamẹl rẹ omoni mẹ, me da vwanvwọn igho na kẹ, shekẹl ihwe gbẹ ighwrẹ rẹ idọnọ efuanfon.

¹⁰ Me da ghwẹ obọ phihọ ọbe na, me da ka oka phihọ, phi iseri phihọ, me da vwanvwọn igho na vwẹ ovwanvwọn.

¹¹ Me da reyọ ọbe ra vwọ she otọ na ra vwanvwere na, ro vwo erhọvwọn ra vwo she otọ na, vẹ ọbe ro rhiephihọ na

¹² me da vwẹ ọbe na kẹ Barọk ọmọ ri Neraya ọmọ ri Maseya, vwẹ aro rẹ Hanamẹl rẹ omoni mẹ vwẹ irharo rẹ iseri re ghwẹ obọ phihọ ọbe na, kugbe aro ri Ju ejobi ri tidia ọguan rẹ ẹrhẹrẹ na.

¹³ Me da vuẹ Barọk vwẹ irharo rayen, ta nẹ,

¹⁴ Enẹ Ọrovwohwo rẹ otuofovwi Ọghẹnẹ rẹ Izrẹl tare: Reyọ ọbe nana, te ọbe rẹ eshashẹ nana re rhurhuru na, ve ọbe nana re rhie phihọ na, re wo phi ayen phihọ evun rẹ ochẹ, rẹ ayen mrasan dia krekri.

¹⁵ Kidie enẹ Ọrovwohwo rẹ otuofovwi, Ọghẹne rẹ Izrẹl tare Iwevwi vẹ idju kugbe ogba ri vain a je cha rhoma de ayen vwẹ otọ nana.

¹⁶ Me vwọ reyọ ọbe rẹ eshashẹ na vwọ kẹ Barọk ọmọ ri Neraya na nu, me da rẹ Ọrovwohwo, tanẹ:

¹⁷ E Ọrovwohwo Ọghẹnẹ! Wọwẹ vwẹ ogangan wẹn rode na vẹ ẹgba rẹ obọ wẹn ma odjuvwu vẹ akpọ na! Emu ọvuọvo bẹn kẹ wẹ-ẹ.

¹⁸ Wẹ ro dje ẹguọnọ ro jẹrhẹriẹ kẹ uriori kpahe uriori ẹkẹvuọvo wọ hwa osa rẹ abe rẹ esemọ vwọ kẹ emọ rayẹn, E Ọghẹnẹ rode ro vwo ẹgba rẹ odẹ rọye hẹ Ọrovwohwo rẹ otuofovwi,

¹⁹ rọ rhoro vwẹ ẹghwanre vẹ ẹgba kugbe uruemu; rẹ ẹro rọye rhie phihọ kẹ idjerhe rẹ ihwo ejobi, ọ rọ je hwa osa kẹ ohwo kohwo kirobo rẹ idjerhe rọye vẹ emamo rẹ iruo rọye epha;

²⁰ ohwo rọ vwẹ eka vẹ imu rẹ igbunu vwọ phia vwẹ otọ rẹ Ijipt, ọ je vwọ nẹ Izrẹl kugbe ihwo rẹ akpọ na ejobi rhi te none na, wọ da re odẹ kẹ oma wẹn kirobo rẹ ọ epha nonẹ na.

²¹ Eka vẹ imu rẹ igbunu wọ vwọ reyọ ihwo wẹn Izrẹl nẹ otọ rẹ Ijipt rhe, kugbe obọ rẹ ọdo wẹn vẹ oshọ rode;

²² Wẹ kẹ ayen otọ nana, ru wo veri kẹ esẹ rayen nẹ wọ vwọ kẹ ayen na, otọ rọ djẹ ọkẹre rẹ ame rẹ ivie vẹ ọnyọn.

²³ Ayen da ruọ ra dia. Ẹkẹvuọvo ayen nyo urhuru wẹ-ẹ, ayen je yan phihọ urhi wẹ-ẹ; ayen ru emu ọvuọvo re wo jiji kẹ ayen nẹ ayen ru na-a, kọye umiovwo nana ejobi vwo bru ayen rhe.

²⁴ Nighe otuofovwi rhe riariẹ orere na phihọ rere ayen vwọ reyọ. Fiki rẹ ọlọkọ, owẹvwe vẹ ọtiekọ ọye e vwo siobọ nẹ orere na kẹ ihwo ri Kaldia ri phio na. Obo re wọ tare na ọ phiare, gbe nighe, wọ mrẹrẹ re.

²⁵ Dede na we, E Ọrovwohwo Ọghẹnẹ, re ta kẹ vwẹ, vwẹ igho de udju na re wo vwo iseri–-owenẹ a vwẹ orere na ke ihwo ri Kaldia dede.

²⁶ Ota rẹ Ọrovwohwo de bru Jerimaya rhe

²⁷ Nighe, Mẹvwẹ Ọrovwohwo na, Ọghẹnẹ rẹ ihwo ejobi; o vwo emu ọvo rọ ganọ kẹ vwẹ?

²⁸ Vwẹ ọtiọye na, enẹ Ọrovwohwo tare: Nighe, mi che phi orere nana phihọ abọ rẹ ihwo ri Kaldia ji phihọ obọ ri Nẹbukadreza ovie ri Babilọn, kọ cha reyọ.

²⁹ Ihwo ri Kaldia re họnra orere nana na cha rhe rhi phi erhanre phihọ orere na, rọ da torhẹ, kugbe uwevwi ra diẹ enu rayen de torhẹ ugboduma kẹ Baal ra da je udi ku edjọ na, rẹ ophu vwo mu vwe na.

³⁰ Kidie emọ rẹ Izrẹl vẹ emọ ri Juda rhe ji ru emuọvo-o jokpa rẹ umiovwo ọvo vwẹ obaro mẹ nẹ ọke emọ rhe, rẹ Izrẹl ji ru emu ọvo-o jokpa rẹ ophu mẹ rẹ ayen kpare ọvo, eriyin Orovwohwo tare.

³¹ Orere nana kpare ophu vẹ ivuemiovwo mẹ, nẹ ẹdẹ ra vwọ bọn rhi te nonẹ na, eriyin na ki mi che ghwie nẹ obaro mẹ.

³² Fiki rẹ umiovwo rẹ emọ rẹ Izrẹl vẹ emọ ri Juda ejobi rẹ ayen ruru vwọ nẹrhẹ ovwẹ phihọ ophu–ivie rayen vẹ isun rayen, irherẹn rayen vẹ emraro rayen, ihwo ri Juda vẹ ihwo re dia Jerusalẹm.

³³ Ayen hirhe obuko rayen ku vwe ọ dia opharo raye-en, obo mi dje ayen eyeyono te na ayen sa kerhọn vwọ reyọ uyono-o.

³⁴ Ayen phi ometuo rayen phihọ uwevwi ra vwẹ odẹ mẹ se vwo miovwo.

³⁵ Ayen bọn asan rọ kpenu kẹ Baal vwẹ iyara rẹ ọmọ ri Hinọm, rẹ ayen da vwẹ emeshare vẹ emetẹ rayen vwọ gọ iye kẹ Mọlẹk, mi ji aye-en, ọ je hẹ iroro mẹ-ẹ, nẹ ayen ru ẹgua nana, vwọ nẹrhe Juda ru umwemwu.

³⁶ Asakiephana enẹ Ọrovwohwo, Ọghẹnẹ rẹ Izrẹl na tare, kpahe orere nana rẹ ovwan ta na, E phio phihọ obọ rẹ ovie ri Babilọn rọ vwẹ ọlọkọ vẹ owẹvwe kugbe ọtiekọ hwe.

³⁷ Nighe, Me cha ghwẹ ayen koko nẹ irere kirere re me vwẹ ophu ọgangan mẹ vẹ ivue miovwo mẹ djẹ ayen ra na rhe etinẹ, kẹ ayen dia egbẹrhẹnẹdẹ.

³⁸ Ayen ke cha dia ihwo mẹ ke me cha dia Ọghẹnẹ rayen.

³⁹ Me cha kẹ ayen udu ọvo vẹ idjerhe ọvo, rere ayen vwọ djẹ oshọ mẹ bẹdẹ, fiki rẹ erhuvwu rayen, vẹ erhuvwu rẹ emọ rayen re cha vwẹ obuko.

⁴⁰ Ke me vẹ ayen cha re ọphọ ri bẹdẹ bẹdẹ, iroro esiri re me jẹn kpahe ayen jovwo mi gbi siobọ nọ-ọ, ki mi phi oshoẹdjẹ mẹ phihọ udu rayen re ayen ju vwe ẹdjẹ jovwo.

⁴¹ Me cha ghọghọ vwẹ emu esiri ri mi ru kẹ ayen, ke me kọn ayen phihọ evun rẹ otọ nana vwẹ esegbuyota, kugbe udu vẹ ẹnwẹn mẹ ejobi.

⁴² Kidie enẹ Ọrovwohwo na tare: Ọtiobo me ghwẹ umiovwo nana rode na phihọ enu rẹ ihwo nana na, eriyin me je cha ghwẹ erhuvwu ri mi veri kẹ ayen na phihọ enu rayen rhe.

⁴³ A cha de idju vwẹ otọ nana rẹ ovwan ta ota rọye nẹ, ofefe ghevweghe ro vwo ohwo-o eyẹ eravwe-e na ke phio phihọ abọ rẹ ihwo ri Kaldia.

⁴⁴ A cha vwẹ igho de idju vwọ vwobọ ọbe rẹ eshashẹ ka ghwẹ obọ phihọ ji se oseri kpahọ vwẹ otọ ri Benjamin, vwẹ asan re yariẹ Jerusalẹm phihọ kugbe irere ri Juda, vwẹ irere rẹ obọ igbenu na, vwẹ irere re obi Shefela, kugbe evun rẹ irere rẹ obi Nẹgẹb na; kidie me cha vwẹ oyovwe rayen rhivwi rhe ayen, eriyin Ọrovwohwo tare.