Jẹnẹsis 45 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Josẹf vwẹ oma Rọye Phia kẹ Iniọvo Rọye Vughe

¹ Etiyin Josẹf gbi se chiri oma rọye vwẹ irharo rẹ ihwo ri mudia kẹrẹ-ẹ; ọ da van, E ji kohwo kohwo bi nu vwe oma. Ọtiọye na ohwo ọvuọvo rhe mudia kẹrẹ Josẹf ọke rọ vwọ vwẹ oma phia kẹ emesẹ rọye-e.

² O da viẹ phia, ihwo rẹ Ijipt na de nyo, ekru ri Fero ejobi de ji nyo.

³ Josẹf da ta kẹ emesẹ rọye, Mẹvwẹ Josẹf, ọsẹ Me je akpọ? Ẹkẹvuọvo emesẹ rọye gbe sa kpahe kẹ-ẹ, kidie ofu dje ayen hwe vwẹ obaro rọye.

⁴ Etiyin Josẹf da ta kẹ emesẹ rọye, We si kẹrẹ ovwẹ, Me rẹ ovwan. Ayen de si kẹrẹ. Ọ da ta, Mẹvwẹ Josẹf rẹ ọmọsẹ rẹ ovwan, rẹ ovwan shẹ kpo Ijipt.

⁵ We jẹn oma ro ovwa-an, eyẹ we jẹn ivun rẹ oma rẹ ovwan miovwo ovwa-an, fikiridie wa shẹ vwẹ rhe obonẹ, kidie Ọghẹnẹ ji vwe ka obaro re vwo sivwi arhọ.

⁶ Kidie owẹvwe na firi vwẹ otọ na ikpe ivẹ nana re; ikpe iyori ji chekọ rẹ ihwo de je voro eyẹ evuo.

⁷ Ọghẹnẹ ko ji vwe ka obaro rere e vwo sivwi umuku rẹ ihwo vwẹ akpọ na, rere ihwo rẹ ovwan buebu vwọ sa rhọ.

⁸ Ọtiọye na ọ gbe dianẹ ovwan ri ji vwe rhe obonẹ-ẹ, ẹkẹvuọvo Ọghẹnẹ; ọ da vwẹ ovwẹ ru ọsẹ ki Fero, kugbe olori rẹ uwevwi rọye ejobi vẹ osun rẹ otọ rẹ Ijipt ejobi.

⁹ Jọphẹre yan bru ọsẹ mẹ re wa ta kẹ, Enẹ Josẹf rẹ ọmọ wẹn tare, Ọghẹnẹ vwẹ ovwẹ ru olori rẹ Ijipt ejobi; yan bru vwe rhe, wo gbe eghẹrẹ-ẹ,

¹⁰ wọ cha dia otọ ri Goshẹn, ku wo si kẹrẹ ovwẹ, re owẹ te emọ wẹn kugbe emọ wẹn vẹ emọ rayen, te igodẹ wẹn, vẹ uchuru wẹn, kugbe obo wo vwori ejobi,

¹¹ kẹ Etiyin Me da ghẹre owẹ, kidie ikpe iyori soso rẹ owẹvwe na ji chekọ, ọ rha dia eriyi-in te owẹ te evwruwevwi wẹn ejobi, kugbe obo wo vwori ejobi da rhe kpẹn abọ rẹ.

¹² Vwẹ enẹna ẹro wẹn mrẹre, ẹro rẹ oniọvo mẹ Bẹnjamin je mrẹre, tanẹ unu mẹ re ta ota na kẹ wẹ na.

¹³ Wo mi gbe ikun rẹ erhuvwu mẹ re wọ mrẹre vwẹ Ijipt na kẹ ọsẹ mẹ, kugbe obo wọ mrẹre ejobi. Jọphẹre reyọ ọsẹ Me rhe obonẹ.

¹⁴ Ọ da gbanọ Bẹnjamin rẹ oniọvo rọye na ohọre ọ da viẹ, Bẹnjamin da je viẹ vwẹ ohọre rọye.

¹⁵ Ọ da fiọnfiọn emesẹ rọye ejobi unu ọ da viẹ ku ayen; rẹ ena ejobi vwọ wan nu emesẹ rọye ejobi de nene gbe ikun.

¹⁶ Rẹ usi rẹ ikun na vwo te uwevwi ri Fero, nẹ, Emesẹ ri Josẹf rhere, oma da vwerhe Fero vẹ idibo rọye gangan.

¹⁷ Fero da ta ki Josẹf, Ta kẹ emesẹ wẹn, Ru Ọnana kru eghwa kpahe eranvwe wẹn re we rhivwi kpo otọ ri Kenan,

¹⁸ Reyọ ọsẹ wẹn kugbe evwruwevwi wẹn, re we bru vwe rhe, ke Me vwẹ otọ esiri rẹ Ijipt na vwọ kẹ wẹ, ku wọ re ivwri rẹ otọ na.

¹⁹ Mi ji ji urhi, Ru Ọnana reyọ akpẹrẹ nẹ otọ rẹ Ijipt yanran re vwo mu imitete na vẹ eya wẹn, ji mu ọsẹ wẹn, ru wọ rhe.

²⁰ Wọ davwerhọ rẹ eyere wẹ-ẹn, kidie otọ esiri rẹ Ijipt na ejobi ewẹn.

²¹ Emọ rẹ Izrẹl de ghine ru ọtiọye; Josẹf da vwẹ akpẹrẹ kẹ ayen, kirobo ri Fero tare, ọ da vwẹ emuọre ke ayen vwẹ oyan na.

²² Ọ da vwẹ ewun rẹ orẹ kẹ ayen ọvuọvo, ẹkẹvuọvo ọ da vwẹ uchunu rẹ idọnọ uri gbẹ ujori ki Bẹnjamin kugbe iwun rẹ orẹ iyori.

²³ Ekuakua nana keye o vwo rhe ọsẹ rọye: oghwa rẹ ekẹtẹkẹtẹ ihwe re vọnre vẹ emu esiri rẹ Ijipt ejobi, oghwa rẹ ekẹtẹkẹtẹ rẹ eya ihwe rẹ ọkọka, ikara, kugbe emuọre rẹ oyan na kẹ ọsẹ rọye.

²⁴ O de siobọ nẹ emesẹ rọye yanran, rẹ ayen vwo kpo re, ọ da ta kẹ ayen, Wa ghwọ vwẹ idjerhe rẹ.

²⁵ Etiyin ayen de vrẹn nẹ Ijipt, ayen de rhi te otọ ri Kenan re vwa Jekọp rẹ ọsẹ rayen.

²⁶ Ayen da vuẹ, ni Josẹf je akpọ, kọye osun vwẹ otọ rẹ Ijipt. Oma de ro, kidie o se ayen gbuyota-a.

²⁷ Ẹkẹvuọvo ọke rẹ ayen vwo gbe ikun ri Josẹf ejobi vwọ kẹ, eta rọ ta kẹ ayen, kugbe ọke rọ vwọ mrẹ akpẹrẹ ri Josẹf vwo rhe ne vwo muo rhe, udu ri Jekọp da rhe sasa;

²⁸ Izrẹl da ta, O teri; Josẹf rẹ ọmọ mẹ je akpọ, Me yanran re Me ra mrẹ tavwe mi ki ghwu.