Jẹnẹsis 30 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹ Ọke ri Rachel vwọ mrẹ nẹ ọye rhe vwiẹ-ẹ, kọ rioma kpahe oniọvo rọye; ọ da ta ki Jekọp nẹ, Kẹ vwẹ ọmọ, ọ rha dia ọtiọye ki mi ghwu;

² Ophu de mu Jekọp kpahe Rachel, ọ da ta, Mẹvwẹ Ọghẹnẹ rọ karo owẹ evwiẹ?

³ Etiyin ọ da ta, Ọmọtẹ mẹ re se Bilhah na; bro ra rere ovwiẹ kẹ vwẹ, re emọ ro vwori ejobi kẹ mẹvwẹ ri vwiẹ ayen.

⁴ Ọ da vwi Bilhah kẹ vwọ rọvwọ: Jekọp de nene vwerhẹ

⁵ Bilhah da mrevun o de vwiẹ ọmọshare ki Jekọp.

⁶ Etiyin Rachel da ta, Ọghẹnẹ bru orhiẹ kẹ vwẹ, o de nyo urhuru mẹ ọ da kẹ vwẹ ọmọshare; o de mu odẹ kẹ nẹ Dan.

⁷ Ọmọtẹ ri Rachel na Bilhah da rhoma mrevun o de vwiẹ ọmọshare ki Jekọp.

⁸ Rachel da ta, Ogangan mẹ vẹ oniọvo mẹ vwo muabọ Me da marọ, Etiyin o de se odẹ rọye Naftali.

⁹ Ri Leah rha vwọ mrẹ nẹ ọye gbi vwiẹ-ẹ, ọ da reyọ ọmọtẹ rọye Zilpah vwọ ki Jekọp vwọ rọvwọ.

¹⁰ Etiyin ọmọtẹ ri Leah Zilpah de vwiẹ ọmọshare ki Jekọp.

¹¹ Leah da ta, Mi yovwerhi, Etiyin o de mu odẹ kẹ ni Gad;

¹² ọmọtẹ ri Leah Zilpah da rhoma vwiẹ ọmọshare ọfa ki Jekọp.

¹³ Leah da ta, Komavọ Me ghọghọ te, kidie eya na ki se vwe aghọghọ; Etiyin o de se odẹ rọye Asha.

¹⁴ Vwẹ ọke orhọ rẹ eka Rubẹn da mrẹ ivwritegbo vwẹ obo ẹghwa, ọ da vwẹ ayen rhe oni rọye Leah. Etiyin Rachel da ta ki Leah, Biko, Me rẹ wẹ, kẹ vwẹ ivwritegbo rẹ ọmọ wẹn na.

¹⁵ Ẹkẹvuọvo ọ da ta kẹ, Wo rori nẹ emu otete ru wo vwo mie vwe ọshare mẹ? Wo ji mie vwe ivwritegbo rẹ ọmọ mẹ rhe? Rachel da ta, Ko nene uwe vwerhẹ ason na fiki rẹ ivwritegbo rẹ ọmọ wẹn na.

¹⁶ Ri Jekọp vwo nẹ ẹghwa rhe vwẹ ovwọnvwọn Leah da ra vwa, ọ da ta, Wo bru vwe rhe ovwerhẹ, kidie Me vwẹ ivwritegbo re ọmọ mẹ vwọ yaro wẹ. Kọye o de nene vwerhẹ vwẹ ason yena.

¹⁷ Ọghẹnẹ de nyo enuebro ri Leah, ọ da mrevun o de vwiẹ ọmọshare rẹ iyori ki Jekọp.

¹⁸ Leah da ta, Ọghẹnẹ hwosa rẹ oyare mẹ kẹ vwẹ nure kidie Me vwẹ ọmọtẹ mẹ vwọ kẹ ọshare mẹ, o de se odẹ rọye Isaka.

¹⁹ Leah da rhoma mrevun, o de vwiẹ ọmọshare rẹ esan vwọ ki Jekọp.

²⁰ Etiyin Leah da ta, Ọghẹnẹ nẹrhẹ e ru emu aye kẹ vwẹ; vwẹ etinẹ na ọshare mẹ ko mu ọghọ kẹ vwẹ fikiridie mi vwiẹ emọ esan vwọ kẹ; o de se odẹ rọye Zẹbulọn.

²¹ Ukuko rọye o de vwiẹ ọmọtẹ, o de se odẹ rọye Dinah.

²² Ọghẹnẹ ke rhe karohọ Rachel, Ọghẹnẹ de nyo oviẹ rọye o de rhie urhoro rọye.

²³ Ọ da mrevun o de vwiẹ ọmọshare, ọ da ta, Ọghẹnẹ si vwe nẹ ehwẹjẹ;

²⁴ o de se odẹ rọye Josẹf, tanẹ, Je Ọrovwohwo vwẹ ọmọ ọfa vwo ba kẹ vwẹ,

Jekọp vẹ Laban de vẹ obo rọ ga Ẹga na wan

²⁵ Ri Rachel vwo vwiẹ Josẹf nu, Jekọp da ta ki Laban, Gbe si obo nu vwe, rere mi kpo uwevwi mẹ vẹ orho mẹ.

²⁶ Ke vwẹ eya mẹ vẹ emọ mẹ re Me ga ẹga rọye kẹ wẹ na, rere mi kpo, kidie wọ riẹn owian re Me wian kẹ wẹ.

²⁷ Ẹkẹvuọvo Laban da ta kẹ, Wọ da rhọvwe kẹ vwẹ ne Me ta ọtiọye, ke Me ta nẹ a mraro kẹ vwẹ ni fiki wẹ ọye Ọrovwohwo vwo bruphihọ kẹ vwẹ,

²⁸ se osa re Me re wẹ re Me hwa kẹ wẹ.

²⁹ Jekọp da ta kẹ, Wẹ vẹ ekpuyovwi wẹn riẹnre obo Me ga wẹ te, obo re uchuru wẹn yovwi te vwẹ obọ mẹ.

³⁰ Kidie uchuru wẹn pha tutuno vwẹ ọke re Me vwọ rhe, nẹ ọke yena rhe na i de bu gangan, Ọrovwohwo de bruphihọ kẹ wẹ vwi kabọ kabọ. Asakiephana kẹ ọke vọ Me rha vwọ wian kẹ omobọ mẹ?

³¹ Ọ da ta, Kidie Me kẹ wẹ? Jekọp da kpahe, Wọ kẹ vwẹ emuọvo-o; wo de se ru Ọnana kẹ vwẹ, ke Me rhoma churu igodẹ wẹn na Me Me rha sẹro rẹ ayen.

³² ju vwe wan uherevie rẹ igodẹ wẹ na nonẹ, rere Me sanọ igodẹ ri kere ipe kugbe emọ rẹ igodẹ rẹ ibiebi, kugbe ẹvwe ri kere ipe ejobi, eyena keye dia osa mẹ.

³³ Etiyin kọye wo de vughe ọvwata mẹ vwobọ, vwẹ ọke ri wọ da cha mrẹ osa mẹ. Kogodẹ kogodẹ eyẹ ẹvwe ro rhe vwo upee eyẹ obirii, wọ da mrẹ vwẹ ohri rẹ emẹ na, ji mi choro.

³⁴ Laban da ta, Oyoma gbe jọ dia obo wọ tare na.

³⁵ Ẹkẹvuọvo ẹdẹ yena Laban da sanọ egbo kugbe ẹkpro ri keri ipe kugbe iri vwo irhiẹ, iri vwo ipe efuanfon, kugbe ipe ibiebi, ọ da sanọ ayen ejobi vwọ kẹ emọ rọye ni sun;

³⁶ o de phi uvwre rẹ oyan rẹ ẹdọke erha vwọ kẹ oma rọye vi Jekọp; Jekọp da ghẹrẹ igodẹ ri Laban ri chekọ.

³⁷ Etiyin Jekọp da reyọ oghọ ọkpokpọ ri almond kugbe afon ọ da phia, o de kere fuanfon, ọ da vwẹ ẹbẹre ro kerẹ na vwọ phia.

³⁸ Ọ da vwẹ oghọ ro keri fuanfon na vwọ rẹrẹ asan rẹ igodẹ na da da ame. Kidie ẹvo vwiẹ vwẹ asan rẹ ayen da da ame na,

³⁹ igodẹ na de vwiẹ vwẹ obaro rẹ oghọ rẹ urhe ro keri ipe na, ẹvo de vwiẹ iri vẹ ipe efuanfon, ẹvo vẹ irhiẹ efa ibiebi.

⁴⁰ Jekọp da hẹriẹ imigodẹ na, o de hirhe opharo rẹ igodẹ na ku oghọ rẹ urhe re keri na kugbe ibiebi re igodẹ ri Laban, o de phi ekru rẹ igodẹ robọ rọye phi orhọ o rhe ku ayen kugbe iri Laban na-a.

⁴¹ Kọke kọke rẹ igodẹ re sasare de vwiẹ Jekọp mi phi oghọ na phihọ asan rẹ igodẹ da da ame asan rẹ igodẹ na da sa mrẹ, rere ayen vwo vwiẹ vwẹ obaro rẹ oghọ na,

⁴² ẹkẹvuọvo ere pha mwẹmwẹ re herọ o de mu ayen san, ere mwẹmwẹ na ke rẹ Laban, ere gangan ri chekọ ki ri Jekọp.

⁴³ Kẹnẹ Jekọp ru fe gangan, o de vwo uchuru, kugbe idibo rẹ emetẹ vẹ ere eshare kugbe iyesi vẹ ekẹtẹkẹtẹ.