Jẹnẹsis 13 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Ebram vẹ Lọt hẹrioma

¹ Etiyin Ebram de vrẹn nẹ Ijipt, te ọye vẹ aye rọye, kugbe obo ro vwori ejobi, ọ vẹ Lọt usun, vwo kpo obi Nẹgẹb.

² Asakiephana Ebram feri gangan vwẹ uchuru, idọnọ efuanfon kugbe oro.

³ O de vrẹn nẹ Nẹgẹb ọ da yan rhiri re te Bẹtẹl, re te asan rọ bọn utughẹ rọye phihọ ẹsosuọ, uvwre ri Bẹtẹl vẹ Ai,

⁴ re te asan rẹ Ebram ka so agbada phihọ ẹsosuọ na; Ebram de se odẹ rẹ Ọrovwohwo vwẹ Etiyin.

⁵ Lọt, vẹ Ebram gba usun na, ji vwo igegede kugbe uchuru vẹ itughẹ,

⁶ ọtiọye na otọ na gbe gba aye-en, kidie ayen vwo eyere buebu, ayen gbe sa dia kugbe-e,

⁷ oseghe kọ rhe dia vwe uvwre rẹ isuigodẹ rẹ Ebram vẹ isuigodẹ ri Lọt. Ọke yena ihwo ri Kenan kugbe ihwo ri Pẹriz je otọ na.

⁸ Ebram da ta ki Lọt, E gbi jẹ oseghe dia uvwre wẹ vẹ ọmẹ-ẹ kugbe uvwre rẹ isuigodẹ wẹn vẹ emẹ-ẹ, kidie avwanre iniọvo.

⁹ Ọ dia otọ na ejobi ri obaro wẹ na-a? Hẹriẹ oma wẹn nu vwe. Wo de kpo obọrhe, ki mi kpo obọhwẹre, eye wo de kpo obọhwẹre, ki mi kpo obọrhe.

¹⁰ Lọt da kpare opharo, ọ da mrẹ ushekpotọ ri Jọdan na rọ pha djidjiro wọnwọn kiri udju rẹ Ọrovwohwo, kiri otọ rẹ Ijipt vwẹ ọke re de kpo obi Zoar, kẹ enẹ ọ epha tavwe rẹ Ọrovwohwo ke rhe ghwọrọ Sodọm vi Gomora.

¹¹ Lọt ke jẹ ushekpotọ ri Jọdan na kẹ oma rọye, Lọt de nene obọrhe, kọye ayen da hẹriẹ oma nẹ ohwohwo

¹² Ebram da dia otọ ri Kenan, yi Lọt ra dia uherevie rẹ irere rẹ ushekpotọ na, o de mu erhọ kẹrẹ Sodọm.

¹³ Vwẹ ọke nana ihwo ri Sodọm na brare gangan, iruimwemwu ride na vwẹ obaro rẹ Ọrovwohwo.

¹⁴ Ọrovwohwo da ta kẹ Ebram, ri Lọt vwọ yanran nu nẹ, Kpare ẹro wẹn kpenu, vwẹ asan wọ epha na, ri wo ni obenu vẹ obotọ te obọrhe vẹ obọhwẹre,

¹⁵ kidie otọ na ejobi re wọ mrẹ na Me vwẹ ayen kẹ wẹ kugbe uvwiẹ wẹn bẹdẹ.

¹⁶ Mi ru uvwiẹ wẹn bu kiri ibiekpẹn rẹ otọ na, kọye ohwo de se kere ibiekpẹn rẹ otọ na, ko ji se kere uvwiẹ wẹn.

¹⁷ Vrẹn, yan nene ugrogro rẹ otọ na te ohẹhẹre rọye, kidie wẹn Me vwọ kẹ.

¹⁸ Ebram da ghwiẹ utughẹ rọye, ọ da rhe dia kẹrẹ ọhahe ri Mamre, rọ kẹrẹ Hebrọn, kẹ Etiyin ọ da so agbada kẹ Ọrovwohwo.