Jẹnẹsis 11 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Uwevwi rẹ Enu ri Babẹl

¹ Asakiephana akpọ na ejobi kẹ ephẹrẹ ọvo kugbe emeta tutuno.

² Ọke rẹ ihwo vwọ kua nẹ abọ rẹ ọnre da vacha re, ayen da rhe mrẹ uphephe ọvo vwẹ otọ ri Shinar ayen da dia Etiyin.

³ Ayen da ta kẹ ohwohwo, Yanrhe, e jẹn avwanre ma ikori ekpẹn, re anabọ torhẹ ayen. Ayen da vwẹ ikori ekpẹn na vwo ru elalọ, orhọnrhe kọye e vwọ gbe.

⁴ Ayen da rha ta, Yanrhe, e jẹn avwanre bọn orere kẹ oma rẹ avwanre, ra bọn uwevwi rẹ enu phihọ ro kpenu odjuvwu, re avwanre re odẹ kẹ oma rẹ avwanre, ọ rha dia eriyin avwanre ke cha hra vwẹ enu rẹ akpọ na ejobi.

⁵ Ọrovwohwo de wotọ rhe mrẹ orere na kugbe uwevwi rẹ enu na, rẹ emọ rẹ ihwo rẹ akpọ bọnre na.

⁶ Ọrovwohwo da ta, Nighe, ayen ohwo ọvo, ayen ki rhe vwo ephẹrẹ ọvo, Ọnana kẹ ẹtuọhọ rẹ emu rẹ ayen che ru: o gbi vwo emu ọvuọvo rẹ ayen guọnọ ru rọ cha bẹn ayen eruo-o.

⁷ Gba yanrhe, re wotọ rhe, ra dia Etiyin phi ozighi phihọ ephẹrẹ rayen, rere ayen jẹn ephẹrẹ rẹ ohwo ohwo enyo.

⁸ Kọye Ọrovwohwo da hra ayen nene enu rẹ akpọ na ejobi, ayen gbe bọn orere na ọfa-a.

⁹ Fiki rẹ ọtiọye na e de se odẹ rọye Babẹl, fikiridie Etiyin Ọrovwohwo de zighi ephẹrẹ rẹ akpọ na ejobi, kẹ Etiyin rhe Ọrovwohwo da hra ayen nene enu rẹ akpọ na ejobi.

Uvwiẹ ri Shẹm

¹⁰ Enana keye uvwiẹ ri Shẹm. Ọke ri Shẹm vwọ ghwo te ẹgbukpe ujori re, ọ da rhe dia ọsẹ ri Arpakshad, ikpe ivẹ rẹ oghwe na vwọ kpọnu;

¹¹ Shẹm ke rha rhe dia ro vwo vwiẹ Arpakshad nu ikpe uri ivẹ gbẹ ujori, o de vwiẹ emeshare vẹ emetẹ.

¹² Ọke rẹ Arpakshad vwọ dia ikpe ọgban gbẹ iyori re ọ da rhe dia ọsẹ ri Shelah;

¹³ Arpakshad vwo vwiẹ Shelah nu ọ da dia ikpe uri ivẹ gbẹ erha, o de rhe vwiẹ emeshare vẹ emetẹ.

¹⁴ Ri Shelah vwọ dia ikpe ọgban re, ọ da rhe dia ọsẹ rẹ Eber;

¹⁵ ri Shelah vwo vwiẹ Eber nu, ọ da dia ikpe uri ivẹ gbẹ erha, o de vwiẹ emeshare vẹ emetẹ.

¹⁶ Rẹ Eber vwọ dia ikpe ọgban gbẹ ẹne re, ọ da rhe dia ọsẹ ri Pẹlẹg,

¹⁷ rẹ Eber vwo vwiẹ Pẹlẹg nu ọ da dia ikpe uri ivẹ gbẹ ọgban, o de vwiẹ emeshare vẹ emetẹ.

¹⁸ Ri Pẹlẹg vwọ dia ikpe ọgban re, ọ da rhe dia ọsẹ ri Reu;

¹⁹ Ri Pẹlẹg vwo vwiẹ Reu nu ọ da dia ikpe uri gbẹ irhiri, o de vwiẹ emeshare vẹ emetẹ.

²⁰ Ri Reu vwọ dia ikpe ọgban gbẹ ivẹ re, ọ da rhe dia ọsẹ ri Serug,

²¹ ri Reu vwo vwiẹ Serug nu ọ da dia ikpe uri gbẹ ighwrẹ, o de vwiẹ emeshare vẹ emetẹ.

²² Ri Serug vwọ dia ikpe ọgban re, ọ da rhe dia ọsẹ ri Nahọr,

²³ Ri Serug vwo vwiẹ Nahọr nu, ọ da dia ikpe uri, ọ de vwiẹ emeshare vẹ emetẹ.

²⁴ Ọke ri Nahọr vwọ dia ikpe uje gbẹ irhiri re, ọ da rhe dia ọsẹ ri Terah;

²⁵ ri Nahọr vwo vwiẹ Terah nu ọ da dia ikpe ujori gbẹ ihwe gbẹ irhiri, o de vwiẹ emeshare vẹ emetẹ.

²⁶ Ri Terah vwọ dia ikpe ujorha gbẹ ihwe re, ọ da rhe dia ọsẹ rẹ Ebram, Nahọr, kugbe Haran.

Uvwiẹ ri Terah

²⁷ Enana keye uvwiẹ ri Terah. Terah ọye ọsẹ rẹ Ebram, Nahọr kugbe Haran; Haran kọye ọsẹ ri Lọt.

²⁸ Haran da karo rẹ ọsẹ rọye ghwu vwẹ otọ re de vwiẹ, vwi Ur ri Kaldia.

²⁹ Ebram vi Nahọr da reyọ eya, odẹ rẹ aye rẹ Ebram ki Serai, odẹ re aye ri Nahọr ki Milka, ọmọtẹ ri Haran ọsẹ ri Milka vẹ Iska.

³⁰ Serai kẹ ẹga, o vwiẹ ọmọ-ọ.

³¹ Terah da reyọ Ebram rẹ ọmọ rọye vi Lọt rẹ ọmọ ri Haran, rẹ ovwrọmọ rọye, vi Serai rẹ aye rẹ ọmọ rọye Ebram, ayen ejobi de ku usun phihọ ni Ur ri Kaldia vwo kpo Kenan, ẹkẹvuọvo rẹ ayen vwo te Haran ayen da daji Etiyin.

³² Ẹdẹ rẹ akpọ ri Terah ejobi da dia ikpe uri gbe iyori, Terah de ghwu vwi Haran.