Ivie rẹ Ivẹ 2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Areyọ Ilaija kpo Odjuvwu

¹ Asakiephana rẹ Ọrovwohwo cha vwọ reyọ odju ro kinghoro vwo mu Ilaija kpo odjuvwu re, Ilaija vẹ Ilaesha da yan usun nẹ Gilgal rhe.

² Ilaija da ta kẹ Ilaesha nẹ, Hẹrhẹ vwẹ etinẹ, Me rẹ wẹ, fikiridie Ọrovwohwo ji uvwe kpo Bẹtẹl. Ẹkẹvuọvo Ilaesha da kpahe kẹ nẹ, Kirobo rẹ Ọrovwohwo herọ na, arhọ wẹ ke je herọ na, Me cha yan jẹ uwe vwo-o. Kọye ayen da yan kpo Bẹtẹl.

³ Emọ rẹ emraro re hẹ Bẹtẹl da yan rhe re vwa Ilaesha, ayen da ta kẹ nẹ, Wọ rha riẹn nẹ nonẹ Ọrovwohwo cha vwọ reyọ onini wẹn mie we? Ọ da kpahe kẹ ayen nẹ, Me riẹnre; ovwan fotovwi.

⁴ Ilaija da ta kẹ Ilaesha, hẹrhẹ vwẹ etinẹ, Me rẹ wẹ, fikiridie Ọrovwohwo ji uvwe kpo Jẹriko. Ẹkẹvuọvo ọ da kpahe kẹ nẹ, Kirobo rẹ Ọrovwohwo herọ na, arhọ wẹn ke je herọ na, Me cha yan ji uwe vwo-o. Ayen da rhe Jẹriko.

⁵ Emọ rẹ emraro re hẹ Jẹriko da yan si kẹre Ilaesha, ayen da ta kẹ nẹ, Wọ riẹn nẹ nonẹ Ọrovwohwo cha vwọ reyọ onini wẹn mie we? Ọ da kpahe nẹ, Me riẹnre; ovwan fotovwi.

⁶ Etiyin Ilaija da rha ta kẹ nẹ, Hẹrhẹ vwẹ etinẹ, Me rẹ wẹ; fikiridie Ọrovwohwo ji uvwe kpo Jọdan. Ẹkẹvuọvo ọ da ta nẹ, Kirobo rẹ Ọrovwohwo herọ na, arhọ wẹn ke je herọ na, Me cha yan ji uwe vwo-o. Kọye ayen ivẹ, de ku usun phihọ.

⁷ Eshare ujuvẹ gbẹ ihwe rẹ emọ rẹ emraro na de nene ayen, ayen da vwẹ oma da vwẹ ogboko rẹ ayen vwọ mrẹ nẹ ayen ivẹ mudia orhoma ri Jọdan.

⁸ Ilaija da ghwiẹ ewun rọye nẹ oma, o de kpirho koko, ọ da vwọ ghwiẹ ame rẹ urhie na, ame na da hẹriẹ ẹkẹn ivẹ, bẹsiẹ rẹ ayen ihwo ivẹ na vwọ wan otọ yaya vrẹn.

⁹ Ọke rẹ ayen vwọ wan vrẹn nu, Ilaija da ta kẹ Ilaesha, Nọ ekpẹn rẹ obo wọ guọnọre ni mi ru kẹ wẹ tavwe ra ke reyọ ovwẹ jẹ uwe vwo. Ilaesha da ta nẹ, Me rẹ wẹ, ju vwe reuku rẹ erhi ro rhe we na akuava.

¹⁰ Ọ da ta, Wọ nọ ekpẹn rẹ emu ọbẹnbẹn, ẹkẹvuọvo wo de rhie ẹro mrẹ vwẹ ra da reyọ ovwẹ ju we vwo kọ dia ọtiọye kẹ wẹ, ẹkẹvuọvo wọ gbe mrẹ vwẹ-ẹ, ọ rha cha sa dia eriyin kẹ wẹ-ẹ.

¹¹ Rẹ ayen vwo gbe ikun yanran, siẹvuọvo na, akpẹrẹ rẹ erhanre vẹ iyesi rẹ erhanre da rhe hẹriẹ ayen ihwo ivẹ. Odju ro kiughoro de mu Ilaija kpo odjuvwu.

¹² Ilaesha da mrẹ, o de kperi phia, Ọsẹ mẹ, Ọsẹ mẹ! akpẹrẹ rẹ Izrẹl vẹ ẹdjẹ-iyesi rọye! Ọ gbe mrẹ ọfa-a. Etiyin ọ da reyọ emwa rọye ọ da bẹrẹ ayen ẹbẹbẹre.

Ilaesha reyẹ ẹdja rẹ Ilaija

¹³ Etiyin ọ da rhọrọ ukpo rẹ Ilaija ro she va abọ, o de rhivwi kpo orhoma rẹ urhie ri Jọdan re mudia.

¹⁴ Etiyin ọ da reyọ ukpo rẹ Ilaija ro she va abọ na, ọ da vwọ fa ame na, ọ da tanẹ, Tivọ Ọrovwohwo Ọghẹnẹ rẹ Ilaija na epha? Ọke rọ vwọ ghwiẹ ame na nu, ame na da hẹriẹ oma ẹkẹn ivẹ. Ilaesha da wan vrẹn.

¹⁵ Ọke rẹ emọ rẹ emraro na re hẹ Jẹriko vwọ kparo mrẹ, ayen da tanẹ, Erhi rẹ Ilaija kua ro Ilaesha oma. Ayen da rhe vwa, ayen da vwẹ uyovwi te otọ kẹ.

¹⁶ Ayen da ta kẹ, Nighe asakiephana idibo wẹn vẹ egba rẹ eshare ujuvẹ gbẹ ihwe ye hẹ etine na; biko jẹ ayen yanran ra guọnọ Ọrovwowe na, siẹvo yẹ Erhi rẹ Ọrovwohwo na ro muro na yan jo vwo vwẹ enu rẹ ugbenu eyẹ evun rẹ iyara. Ọ da ta nẹ, Ovwan ji ihwo-o.

¹⁷ Ẹkẹvuọvo ayen vwo djẹ ẹtẹta kẹ, oma da rhe vuọ, ọ da tanẹ, Ovwan ji. Ayen de ji eshare ujuvẹ gbẹ ihwe, ayen da guọnọ ẹdẹ erha ẹkẹvuọvo ayen mrẹ rẹ-ẹ.

¹⁸ Ayen de bro rhe rọ vwọ hẹrhẹ vwi Jẹriko, ọ da ta kẹ ayen nẹ, Me vuẹ ovwan jovwo nẹ ovwan ra-a?

¹⁹ Eshare rẹ orere na da ta kẹ Ilaesha nẹ Nighe, asan ra fan orere na phihọ oyoyovwi kirobo rẹ ọrovwavwanre je mrẹ na; ẹkẹvuọvo ame rọye ọbrabra, otọ rọye yovwẹ emu-u.

²⁰ Ọ da tanẹ, A vwẹ egebule ọkpokpọ kẹ vwẹ, re phi ughweraka phihọ evun rọye. Ayen da reyọ rhe.

²¹ Etiyin ọ da yan kpo ogbugbu rẹ ame, o de tue ughweraka phihọ, ọ da tanẹ, Enẹ Ọrovwohwo tare, Mi ru ame nana yoyovwi nure; kẹ etinẹ yanran, ughwu eyẹ umiovwo rhe che no rhe-e.

²² Ọtiọye ame na kẹ oyoyovwi rhi te nonẹ kirobo rẹ Ilaesha tare.

²³ Ọ da yan nẹ etiyin kpo Bẹtẹl, ọke rọ vwọ yanran vwẹ idjerhe, imitete rẹ emeshare ẹvo de nẹ evun rẹ orere na rhe ke vwọ jehwẹ tanẹ, yeri kpenu wẹ ohwerhe akpan na yeri kpenu wẹ ohwerhe akpan na.

²⁴ Ọ de ku oma rhẹriẹ ọke rọ vwọ mrẹ ayen, ọ da vwẹ odẹ rẹ Ọrovwohwo duvwu ayen iyori. Udibo ivẹ de nẹ evun rẹ aghwa rhe ri hwe emeshare ujuvẹ gbẹ ivẹ na.

²⁵ Nẹ etiyin o de kpo ugbenu ri Kamẹl, kẹ etiyin o rhivwi nu kpo Sameria.