Isẹ 9 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

E Durhie rẹ Aghwanre kugbe Ugheghẹ

¹ Aghwanre bọn uwevwi rọye nure, ọ vwẹ osusun ighwrẹ rọye vi nure.

² O hwe eranvwe rọye nure, ọ gua udi rọye nure, ọ rhuẹrẹ imeje rọye phihọ nure rhe.

³ O jẹ ikọnpha rọye ruẹ otafe re se ayen nẹ asan ro me kpenu vwẹ orho na rhe,

⁴ kohwo kohwo ro ghẹri, jọ vwẹriẹ rhe etinẹ, ohwo ro vwo iroro-o ọye ọ ta kẹ nẹ,

⁵ yanrhe, wọ rhe re ikara mẹ, rere wọ rha da udi re me nabọ gua na.

⁶ Yan je ughenghẹn vwo, rere wọ rhọ, rere wọ vwọ yan vwẹ idjerhe rẹ orẹmrẹ.

⁷ Ohwo ro bru ekpa uche ekan ọye ọ mrẹ, ọ rọ ra ghwọ ku oruimwemwu ko wan omaobọ rọye oma.

⁸ Wọ ghwọ kuẹ ẹkpa-a ọ da rhe jẹ wẹ eghrẹn, ghwọ ku ọvwiroro, oma wẹn kọ vwerhọn.

⁹ Vwẹ uyono kẹ ọvwiroro, aghwanre rọye kọ rho phihọ; yono ọvwata, erianriẹn rọye kọ rho phihọ.

¹⁰ Oshọẹdjẹ rẹ Ọrovwohwo na ọyẹ ẹtuọhọ rẹ eghwanre, erianriẹn rẹ Ọfuanfon Ọvuọvo na ọye orẹmrẹ.

¹¹ Kidie oma mẹ ọye ovwan wan tọn, ikpe buebu keye a vwọ ba kẹ wẹ.

¹² Wọ da ghwanre, yo wọ ghwanre kẹ oma wẹn, wo de rhe miovwo unu, wọwẹ ọvo kọye ghwa ọghwa rọye.

¹³ Ẹkpa rẹ aye re dia ọgbota: ọ pha fanfanrhiẹ ọ riẹn omaẹvuọ-ọ.

¹⁴ O tidia anurhoro rọye, ohwarha rọ hẹ evun rẹ orho ọye ọ nabọ tidia phihọ.

¹⁵ Kẹ etiyin o de se ihwo re yan wan, ihwo re yan oyan rohọ rayen wan.

¹⁶ Ohwo ro ghẹnri, jọ vwẹriẹ rhe etinẹ, ohwo ro vwo ọhọ-ọ ọye ọ ta kẹ na.

¹⁷ Ame re chori vwerha, emu ra bẹbẹ re miẹmiẹ.

¹⁸ Ẹkẹvuọvo ọ rha riẹn nẹ erivwi hẹ etiyi-in, nẹ erhorha ri woro e hẹ obo Ushi.