Isẹ 5 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Uchebro kpahe Ọfanrhiẹ

¹ Ọmọ mẹ kerhọn rẹ eta rẹ aghwanre mẹ, rhiẹ erhọn phihọ re eta mẹ ro owẹ;

² rere wo vwo vwo ọhọ, rere eberunu wẹn vwọ sẹro rẹ erianriẹn.

³ Kidie ugbunu rẹ aye ro gbe igberadja na o suẹn kerẹ ọnyọn ota rọye vwiọrọ nọ ori;

⁴ ẹkẹvuọvo oboba rọye o muenu kere akoro, dandan kere ọlọkọ rẹ ako ivẹ.

⁵ Owo yan rọye suẹn ohwo kpo ughwu, ichiyi rọye garo vi erivwi.

⁶ Ọ davwerhọn rẹ idjerhe rẹ arhọ-ọ; idjerhe rọye gboreghe ẹkẹvuọvo ọ riẹnre-e.

⁷ Asakiephana, emọ na, ovwan kerhọn mẹ, ovwan chuko kuẹ eta rẹ unu mẹ-ẹ.

⁸ Jẹn idjerhe wẹn tephe kẹ, wo siẹ kẹrẹ anurhoro rẹ uwevwi rọye-e;

⁹ wọ da rha vwẹ ọghọ wẹn ruẹse kẹ ihwo efa ikpe wẹn kẹ ihwo ri jẹ arodọvwẹ evwo.

¹⁰ Ọ rha dia ọtiọye-e erhorha ke cha reyọ ẹgba wẹn kẹ oma rayen, ihwo efa diodi keye cha re erere rẹ iruo wẹn.

¹¹ Okuko rọye vwẹ ẹdẹfa ku wo che brenu, vwẹ ọke rẹ uvwo wẹn vẹ oma wẹn da cha ghwọrọ

¹² ko wọ cha tanẹ, Egbe-e mi se mu oma phihọ ọghọ-ọ, udu mẹ sa reyọ uchebro-o!

¹³ Me kerhọn rẹ urhuru rẹ ihwo ri yono uvwe-e, eyẹ me sa davwerhọn rẹ eyono mẹ-ẹ.

¹⁴ Ẹdia rẹ ughwru koye mi mudia phihọ vwẹ ohri rẹ ọghwẹgbe na.

¹⁵ Gba da ame rẹ orhare ru wọ tọnre, ame rọ djẹ nẹ orhare rẹ obọ wẹn rhe.

¹⁶ Kẹ ogbugbu wẹn cha hrabọ ro asan na ejobi, rọ da djẹ ọkere ro evun rẹ irhuvwu.

¹⁷ Jẹn ayen dia kẹ oma wẹn ọvo, ọ dia fiki rẹ erhorha re vẹ owẹ gba herọ-ọ.

¹⁸ Jẹn ebruba dia kẹ ogbugbu wẹn, rere wọ ghọghọ vwẹ oma rẹ aye rẹ ọke emọ wẹn.

¹⁹ Uphophẹ rẹ aye, yoyovwi, ro si urhuru. Gbe jẹn ẹguọnọ rọye vwerhe owẹ oma vwẹ ọke ejobi, rere oruru rẹ erhuvwu rọye mu we kọke kọke.

²⁰ Ọmọ mẹ, die oruru rẹ aye ro gbe ọfarhiẹ na vwo mu we, ru wọ vwọ dje ruọ agada rẹ igberadja na?

²¹ Kidie idjerhe rẹ ohwo rẹ akpọ rhie phihọ vwẹ obaro rẹ Ọrovwohwo na, ọ rọ rhẹrẹ ichiyi rọye ejobi.

²² Orukuruku rẹ orumwemwu na gbarọ riariẹ, ufi rẹ oma ẹlaghọ rẹ umwemwu rọye muro.

²³ Ko ghwu kidie o se sun oma rọye-e, kọ ghwru fiki rẹ ugheghẹ rọye.