Isẹ 30 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

Eta rẹ Agur

¹ Eta rẹ Agur ọmọ ri Jakẹh ri Massa. Ohwo na da ta kẹ Ithiẹl, kẹ Ithiẹl vẹ Ukal:

² Uyota mi ghẹn nọ re vwo se vwe ohwo. Mi vwo ọhọ re vwo se vwe ohwo rẹ akpọ-ọ.

³ Mi ji yono aghwanre-e, eyẹ mi ji vwo erianriẹn rẹ ọfuanfon ọvuọvo na-a.

⁴ Ono ri yeri kpo obo odjuvwu ro de wotọ rhire? Ono ri mu ọdju phihọ obọ rhurhu? Ono re phare ame phihọ ewun rọye? Ono mu etan re akpọ na vi? Mavọ e se odẹ rọye, didi odẹ rẹ ọmọ rọye? Uyota wọ riẹnrẹ!

⁵ Ota kota rẹ Ọghẹnẹ ejobi uyota re; ọye ekpọfia kẹ ihwo re djẹ gbalọ.

⁶ Wo phiẹba eta rọyẹ-e, Ọ da rha ghwọ ku we, ku wọ cha dia ọvwọnrofian.

⁷ Emu ivẹ me yare mie we: wọ sia ayen kẹ vwẹ tavwe mi ki ghwu-u.

⁸ Kpọ ofian evwọnrọ vẹ ọphiẹnvwẹ chọ vwẹ ra shesheri, Wọ kẹvwẹ ogbere eyẹ efe-e, vwẹ emu ro fori ghẹrẹ ovwẹ.

⁹ Ọ rha dia ọtiọye-e evun da vọn vwẹ nọ, ke me sen wẹn, ke me ta nẹ, Ono Ọrovwohwo na vwo? eyẹ me da rha dia ogbere koko, ki mi che chuji, ye me phọphọ odẹ rẹ Ọghẹnẹ mẹ.

¹⁰ Wọ phọphọ odibo kẹ onini rọye-e, ọ da rha harhe owẹ, ko wo cha re abe.

¹¹ Ihwo evo herọ re harha esẹ rayen ri jẹ ẹrhovwo ẹnẹ kẹ oni rayen.

¹² Ihwo efa rha herọ ri roro oma rayen fuanfon ẹkẹvuọvo yẹ a je họ ayen nẹ ogbeku raye-en.

¹³ Efa herọ mavọ ẹro rayen kpenu te, ẹro rayen nẹ ohwo sua-a

¹⁴ Evo herọ rẹ ibiako rayen e pha kerẹ ọlọkọ, ibiako rayen e pha kerẹ aphia, rẹ ayen vwọ ghwọrọ ovwiogbere kufia nẹ otọ rẹ akpọ na, ọ rẹ akpọ bẹn nẹ ohri rẹ ihwo.

¹⁵ Ẹrhonrhon vwo emetẹ ivẹ; Kẹvwẹ, kẹvwẹ, ọye ayen viẹ. Emu erha evo herọ rẹ evun jẹ vọn; ẹne ke rha herọ re je tanẹ, Oteri-i.

¹⁶ Erivwi, evun rẹ ega, otọ na rọ da ame kọke kọke, kugbe erhanre ro jẹ tanẹ, Oteri.

¹⁷ Ẹro rọ vwẹ ọsọmọ jehwẹ rẹ ọjẹfia jo mu ọghọ kẹ oni rọye-e, okpemu rọ dia evun rẹ iyara cha sọhrọ, ekala ke cha riọ.

¹⁸ Emu erha herọ ri gbe vwe unu, Ọrẹne mi je otọ rọye ẹriẹn.

¹⁹ Idjerhe rẹ ugo rhan wan vwẹ obenu, idjerhe rẹ ọrọdekọ vwẹ enu rẹ oragha, idjerhe rẹ okọ biẹ vwẹ abadi rode, kugbe uruemu rẹ ọshare vẹ ọmọtẹ.

²⁰ Ọnana idjerhe rẹ igberadja; ọ ria yọ riẹn unu rọye, tanẹ, Mi ru chọ-ọ.

²¹ Emu erha akpọ na vwo kpogho, o de te ẹne nu oma gbe gba-a:

²² Ọviẹn ro rhivwi rhe dia ovie, kugbe ẹkpa rọ re evun vọn;

²³ aye ra vwẹ utuoma te rọ mrẹ ọshare, kugbe ukọpha ro rhi mie ọpha rọye ẹdia

²⁴ Emu ẹne nana re ma havwe vwẹ evun rẹ akpọ na, ẹkẹvuọvo ayen vwo aghwanre gangan:

²⁵ emeranranvwe rẹ otọ dia ihwo ri vwo ẹgba-a, dede na ayen se koko emuọre rayen hẹrhẹ ọke uvo;

²⁶ Afiotọn na ghwa dia ohwo ro vwo ẹgba nọ-ọ ẹkẹvuọvo ọ sa tọn unu rọye phihọ otọ rẹ eragha;

²⁷ Igurube vwo ovie-e, yẹ ayen ku usun phihọ yan;

²⁸ Ọhẹrhẹ-uwevwi na wo se mo phihọ obọ rhurhu, dede na ighẹn rẹ ovie a da mrẹ.

²⁹ Eranvwọn erha herọ re yan vẹ eheri; ẹne efa herọ re gọnọ vẹ ọrho vwẹ oyan rayen:

³⁰ Okpohrokpo na, rọ ma gan vwẹ ohri rẹ eranvwe ejobi rọ djẹ kẹ emuọvo-o,

³¹ Ogberhuane rọ jobọ jowọ, okri, kugbe ovie rọ gọnọ vwẹ obaro rẹ ihwo rọye.

³² Wọ da dia ohwo oghenghẹn ro muẹ oma wẹn kpenu, eyẹ ọ da dianẹ wọ jẹ iroro rẹ umwemwu, gba vwẹ obọ wẹn rhurhu unu wẹn.

³³ Kidie ameivie ra nyẹ koko dje, a da je nye unwen ọbara ko hwẹ cha, eriyin na ophu rọ riọ phia sua ofovwi.